ހަތަރު ވަޒީރުންނަށް މަޖިލީހުން ރުހުން ދީފި

Read Time:4 Minute, 40 Second

ރައީސް ޑރ. މުހައްމަދު މުއިއްޒު، މިދިޔަ ޑިސެމްބަރު މަހު ވަޒީރުންގެ މަޖިލީހަށް ގެންނެވި ބަދަލުތަކުގެ ދަށުން އައްޔަނުކުރެއްވި ހަތަރު ވަޒީރުންނަށް ރައްޔިތުންގެ މަޖިލީހުން ރުހުން ދެއްވައިފިއެވެ.

މަޖިލީހުން ރުހުން ދިން ވަޒީރުންނަކީ:

މިނިސްޓާ އޮފް ފިނޭންސް އެންޑް ޕްލޭނިން: މޫސާ ޒަމީރު (ތ. ބުރުނި، ނިވައިދޮށުގެ)
މިނިސްޓާ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް: ޑރ. އަލީ ހައިދަރު އަހްމަދު (މއ. ވެނީލާގެ)
މިނިސްޓާ އޮފް އެގްރިކަލްޗާ އެންޑް އެނިމަލް ވެލްފެއާ: ޑރ. މަރްޔަމް މާރިޔާ (މއ. މާރާދަގެ)
މިނިސްޓާ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާ: ޑރ. އަބްދުﷲ މުއްތަލިބު (ގދ. ފިޔޯރީ، ގުލްބަކާގެ)

ޒަމީރު އައްޔަންކުރުމަށް ފެންނަ ކަމަށް ވޯޓު ދެއްވާފައި ވަނީ 69 މެންބަރުންނެވެ. ނުފެންނަ ކަމަށް އެއްވެސް ،މެންބަރަކު ވޯޓު ދެއްވާފައެެއް ނުވެއެވެ. ހައިދަރު އައްޔަން ކުރުމަށް ފެންނަ ކަމަށް ވޯޓު ދެއްވާފައި ވަނީ 63 މެންބަރުންނެވެ. ނުފެންނަ ކަމަށް ހަ މެންބަރަކު ވޯޓު ދެއްވާފައި ވެެެއެވެ. މާރިޔާ އާއި މުއްތަލިބު އައްޔަން ކުރުމަށް ފެންނަ ކަމަށް 70 މެންބަރުން ވޯޓު ދެއްވާފައިވެއެވެ. އަދި ނުފެންނަ ކަމަށް އެއްވެސް މެންބަރަކު ވޯޓު ނުދެއްވައެވެ. އެ ވަޒީރުންނަށް ރުހުން ދިނުމުގެ މައްސަލަ ރައްޔިތުންގެ މަޖިލީހަށް ހުށަހެޅީ، މިދިޔަ ބުރާސްފަތި ދުވަހު ބޭއްވި ދައުރުން ބޭރުގެ ޖަލްސާގައެވެ. އަދި މިއަދު ބޭއްވި ކޮމިޓީ ބައްދަލުވުމުގައި ހާޒިރުވެ ވަޑައިގެން ތިއްބެވި ހުރިހާ މެންބަރުންގެ އިއްތިފާގުން ވަނީ މި ވަޒީރުންނަށް ރުހުން ދިނުމަށް ފާސް ކުރައްވައިފައެވެ.

މި ބަދަލުތަކާއެކު، ކުރިން އޮތް މިނިސްޓްރީ އޮފް ހައުސިން ލޭންޑް އެންޑް އާބަން ޑިވެލޮޕްމަންޓް ވަނީ އުވާލައިފައެވެ. އަދި އެ މިނިސްޓްރީގެ މެންޑޭޓުތައް އެހެން މިނިސްޓްރީތަކަށް ބަދަލުކުރައްވާފައިވެއެވެ. މިގޮތުން، ޕްލޭނިންގެ މަސައްކަތް މިހާރު ހަވާލުކުރައްވާފައިވަނީ ފިނޭންސް މިނިސްޓްރީއާއެވެ. އަދި ބޯހިޔާވަހިކަމުގެ މަސައްކަތް ހަވާލުކުރައްވާފައިވަނީ އަލަށް އުފައްދަވާފައިވާ ކޮންސްޓްރަކްޝަން މިނިސްޓްރީއާއެވެ. މި ބަދަލުތަކަކީ ސަރުކާރުގެ މަސައްކަތްތައް އިތުރަށް ހަރުދަނާކޮށް، ޚިދުމަތްތައް ފުޅާކުރުމަށް ގެންނަވާފައިވާ ބަދަލުތަކެއް ކަމަށް ސަރުކާރުން ވަނީ ވިދާޅުވެފައެވެ. ގާނޫނުގައިވާ ގޮތުގައި ރައީސުލްޖުމްހޫރިއްޔާ ވަޒީރުންގެ މަޖިލީހަށް ބަދަލެއް ގެންނެވި ނަމަވެސް އަދި ވަޒީރުންގެ މަޖިލީހަށް ބޭފުޅަކު އައްޔަން ކުރެއްވި ނަމަވެސް ރައްޔިތުންގެ މަޖިލީހުގެ ރުހުން ހޯދަން ޖެހެއެވެ.