Read Time:3 Minute, 42 Second
(ފޮޓޯ ކްރެޑިޓްސް: އިސްލާމިކް މިނިސްޓްރީ)
ބޯންމެރޯ ޓްރާންސްޕްލާންޓް ހެދުމަށް މިވަގުތު 22 ކުދިން ވެއިޓިން ލިސްޓްގައި ތިބި ކަމަށް ހެލްތު މިނިސްޓްރީން މިއަދު ހާމަކޮށްފިއެވެ. އެ މިނިސްޓްރީން ވިދާޅުވި ގޮތުގައި، މިދިޔަ އަހަރު 14 ކުދިން ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވެއެވެ. މިހާތަނަށް ހަތް ކުއްޖަކު ޓްރާންސްޕްލާންޓް ނިންމާފައިވާއިރު، މިވަގުތު ހަތް ކުދިން ރާއްޖެއިން ބޭރުގައި ދަނީ ފަރުވާ ހޯދަމުންނެވެ. އަދި ހަ ކުއްޖަކު ބޯންމެރޯ ނިންމުމަށްފަހު ރާއްޖެ އައިއިރު، އެއް ކުއްޖަކު ނިޔާވެފައިވާ ކަމަށްވެސް މިނިސްޓްރީން ވަނީ ވިދާޅުވެފައެވެ.
ރާއްޖެއިން ބޭރުގައި ތިބި ކުދިންގެ ތެރެއިން ތިން ކުއްޖަކު އަންނަ މަހު ރާއްޖެ އަންނަ އިރު، ބާކީ ހަތަރު ކުދިންގެ ފަރުވާ މިވަގުތު ދަނީ ކުރިއަށެވެ. އަދި މިއަހަރު އިތުރު 10 ކުދިން ބޯންމެރޯ ހެދުމަށް ބޭރަށް ފޮނުވާނެ ކަމަށާއި، އޭގެ ތެރެއިން ފަސް ކުދިންގެ ބޯންމެރޯ ސްޕެޝަލިސްޓް ރިވިއު ހެދުމަށްފަހު އެކަމާ ގުޅިގެން ތައްޔާރީތައް ވަމުންދާ ކަމަށްވެސް ހެލްތު މިނިސްޓްރީން ވިދާޅުވެއެވެ. ތެލެސީމިއާ ކުދިންނަށް ދެމެހެއްޓެނިވި ގޮތެއްގައި ހިލޭ ބޯންމެރޯ ހަދައިދިނުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ. މިގޮތުން، ޒަކާތު ފަންޑުގެ ޚަރަދުގައި ކޮންމެ އަހަރަކު 10 ކުއްޖެއްގެ ބޯންމެރޯ ހެދުމަށް އިސްލާމިކް މިނިސްޓްރީ އާއި ހެލްތު މިނިސްޓްރީން ވަނީ މިދިޔަ އަހަރުގެ ފެބްރުއަރީ މަހު އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން ބޯންމެރޯ ހަދަން ކޮންމެ ކުއްޖަކަށް އެއް މިލިއަން ރުފިޔާއާ ހަމައަށް އެހީ ދޭގޮތަށް ވަނީ ހަމަޖެހިފައެވެ.
މީގެއިތުރުން، ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާ ކުދިންގެ ތެރެއިން ގިނަ ކުދިން ފޮނުވަނީ އިންޑިއާގެ ހޮސްޕިޓަލްތަކަށެވެ. އަދި ބައެއް ކުދިން ފޮނުވަނީ ތައިލެންޑަށެވެ. ބޯންމެރޯ ޓްރާންސްޕްލާންޓް ހެދުމަށް އެވްރެޖްކޮށް 45 ދުވަހާއި 60 ދުވަހާ ދެމެދުގެ މުއްދަތެއް ނަގައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0