އުންރުވާ އަށް އެހީތެރިވެ ޣައްޒާ އާރާސްތުކުރަން އެހީވާން ރާއްޖެއިން ގޮވާލައިފި

Read Time:3 Minute, 12 Second

(ފޮޓޯ ކްރެޑިޓްސް: ވަގުތު)

ފަލަސްތީނުގެ ރެފިއުޖީންގެ ހައްގުތަކަށް މަސައްކަތްކުރާ އދ.ގެ އެޖެންސީ، އުންރުވާގެ ދެމެހެއްޓެނިވިކަމަށް އެހީތެރިވެ މަސައްކަތްތައް ކުރުމަށާއި، ޣައްޒާ އާރާސްތުކުރުމުގެ ރަނގަޅު މަސައްކަތްތަކެއް ކުރުމަށް ދުނިޔޭގެ ބާރުތަކަށް، ދިވެހިރާއްޖެއިން ގޮވާލައިފިއެވެ. ރާއްޖެއިން މިކަންކަމަށް ގޮވާލާފައިވަނީ ނޯވޭގައި ކުރިއަށް ދިޔަ “ގްލޯބަލް އެލަޔަނަސް ފޯރ ދި އިމްޕްލިމެންޓޭޝަން އޮފް ޓޫ-ސްޓޭޓް ސޮލިއުޝަން”ގެ ތިންވަނަ ބައްދަލުވުމުގައެވެ. ދެ ދައުލަތުގެ ހައްލު ހޯދުމަށް ގޮވާލާ ބައިނަލްއަޤުވާމީ ފެންވަރުގައި މަސައްކަތްކުރާ މި އެލަޔަންސްގެ ބައްދަލުވުމުގައި ރާއްޖެއިން ބައިވެރިވެވަޑައިގެންނެވީ، ޖަރުމަންވިލާތަށް ކަނޑައަޅުއްވާފައި ހުންނަވާ ސަފީރު، އައިޝަތު ޝާން ޝާކިރުއެވެ.

ޚާރިޖީ ވުޒާރާއިން ވިދާޅުވެފައިވަނީ ސަފީރުގެ ވާހަކަފުޅުގައި ޣައްޒާގެ ހާލަތު އިޔާދަކޮށް، އާރާސްތުކުރުމަށް ބޭނުންވާ ވަސީލަތްތަކާއި، ފަންނީ އެހީތެރިކަން ދިނުމަށްވެސް ގޮވާލެއްވިކަމަށެވެ. އަދި، ބައިނަލްއަޤުވާމީ މައިދާނުގައި އިޒްރާއިލު އިސްވެ އޮވެ، އުންރުވާގެ މަސައްކަތްތަކަށް ގޮންޖަހާ، ހުރަސް އެޅުމަށް ކުރަމުންދާ މަސައްކަތްތައް ހުއްޓުވުމަށްވެސް އެލަޔަންސްގެ މެންބަރު ޤައުމުތަކަށް ގޮވާލެއްވިއެވެ.

2023ގެ އޮކްޓޯބަރު މަހުގެ ކުރީކޮޅުން ފެށިގެން އިޒްރާއިލުން ޣައްޒާގައި ހިންގަމުންދާ ގަތުލްއާންމުގެ ހަމަލާތައް ހުއްޓާލުމަށް، އިޒްރާއިލާއި ހަމާސް ޖަމާއަތުންވެސް އެއްބަސްވެފައިވާއިރު، ޣައްޒާ އަށް ވަނީ އެތައް ގެއްލުންތަކެއް ލިބިފައެވެ. އެންމެ ޒަރޫރީ ފެނާއި، ކާބޯތަކެއްޗާއި، ގެދޮރާއި، ސިއްހީ އަދި އެނޫންވެސް ވަސީލަތްތައްވަނީ އެއްކޮށް ހަލާކުވެގެންގޮސްފައެވެ.