ހުރިހާ ފޯމު ރިވިއުކުރުމުގެ ބަދަލުގައި، 4000 ފްލެޓް ލިބުނު ފަރާތްތަކުގެ ލިސްޓު ވެރިފައިކުރަނީ

Read Time:7 Minute, 1 Second

(ފޮޓޯ ކްރެޑިޓްސް: ވަގުތު)

ނިމިދިޔަ ސަރުކާރުން ކުރިއަސް ގެންދިޔަ ގެދޮރުވެރިޔާ ސްކީމްގެ ދަށުން ފްލެޓަށް އެދި ހުށަހެޅި ހުރިހާ ފަރާތްތަކެއް ރިވިއު ކުރުމުގެ ބަދަލުގައި 4000 ފްލެޓް ލިބުނު ފަރާތްތަކުގެ ލިސްޓް ވެރިފައި ކުރުމަށް އިމާރަތްކުރުމާއި ގެދޮރުވެރިކަމާއި ބިނާރާ ބެހޭ މިނިސްޓްރީއިން ނިންމައިފިއެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިމާރަތްކުރުމާއި ގެދޮރުވެރިކަމާއި ބިނާރާ ބެހޭ މިނިސްޓަރު ޑރ. އަބްދުﷲ މުއްތަލިބު ވިދާޅުވީ ގެދޮރުވެރިޔާ ސްކީމުގެ ތެރެއިން ދެ ކޮޓަރީގެ އެޕާޓްމަންޓުތަކަށް 6،000 މީހުން އަދި ތިން ކޮޓަރީގެ އެޕާޓްމަންޓްތަކަށް 14،000 މީހުން ކުރިމަތިލާފައިވާ ކަމަށެވެ. އެ ހުށަހެޅުންތައް ރީ އިވެލުއޭޓް ކުރުމުގެ މަސައްކަތް ކުރުމާއި ފައިނަލް ލިސްޓު ނެރުމުގެ މަސައްކަތް މިދިޔަ 14 މަސް ތެރޭގައި ކުރުމަށް މަސައްކަތް ކުރި ކަމަށާއި އެކަމުގައި ބޮޑެތި މައްސަލަތަކެއް ދިމާވެ ފްލެޓް ލިސްޓު އާންމުކުރުމަށް ލަސްވެފައިވާ ކަމަށް ވިދާޅިވިއެވެ.

(ފޮޓޯ ކްރެޑިޓްސް: ރައްޔިތުންގެ މަޖިލިސް)

“ގެދޮރުވެރިކަމުގެ މިނިސްޓްރީއާއި ހަވާލުވުމަށްފަހު ކަންކަން ހިނގާފައިވާ ގޮތް ބަލައި އައި އިއުލާނުކޮށްފައިވާ ލިސްޓާ ގުޅޭގޮތުން ރައީސް ހާމަކުރައްވާފައިވާ ސިޔާސަތާއި އެއްގޮތަށް ދިއުމަށްޓަކައި އަދި އޭސީސީއާއި އެހެން އިދާރާތަކުން ހާމަކޮށްފައިވާ ކަންބޮޑުވުމަށް ބަލައި މިހާރު ނިންމާފައިވަނީ ފްލެޓަށް އެދިފައިވާ ފޯމުލާފައިވާ ހުރިހާ ފަރާތްތަށް އިވެލިއުއޭޓްކުރުމުގެ ބަދަލުގައި 15 ނޮވެމްބަރު 2023 ގައި ގެޒެޓްކޮށްފައި ލިސްޓުގެ ވެރިފިކޭޝަން ޕްރޮސެސްއެއް ކުރިއަށް ގެންދިއުމަށް.” މުއްތަލިބު ވިދާޅުވިއެވެ. އެ ވެރިފިކޭޝަން ޕްރޮސެސް ކުރިއަށް ގެންދާއިރު ބަލާނީ 26 ޖޫން 2022 ގައި ގެޒެޓްކުރެވުނު ގެދޮރުވެރިޔާ ސްކީމްގެ ދަށުން ފްލެޓް ދޫނުކުރާނެ އުސޫލް ޖީ (20) 2022 އަށް ކަމަށާއި އަދި އެޕްލިކޭޝަން ހުށަހެޅުމަށް ތައްޔާރުކޮށްފައިވާ ގެދޮރުވެރިން ޕޯޓަލްގައި ދީފައިވާ އިރުޝާދުތަކަށް ކަމަށް ވިދާޅުވިއެވެ.

އެގޮތުން މާލޭގައި ދިރިއުޅޭތާ 15 އަހަރު ވެއްޖަކަން ސާބިތު ކުރުމަށް ހުށަހެޅިދާނެ ކަމަށް ޕޯޓަލްގައި ބަޔާންކޮށްފައިވާ ލިޔެކުންތަކަކީ އެ ސްކީމްގައި ފޯމްތައް އިވެލުއޭޓްކުރުމަށް ބަލަންޖެހޭ ލިޔުންތައް ކަމަށް ވިދާޅުވިއެވެ. ޕޯޓަލްގައި އިރުޝާދު ދީފައިވާ ހަ ބާވަތެއްގެ ލިޔުމެއްވާ ކަމަށާއި އެއީ:

ވޭދުވެދިޔަ 15 އަހަރުގެ ތެރޭގައި މާލޭގައި ވަޒީފާ އަދާކުރި އަދި މިހާރު ވަޒީފާ އަދާކުރަމުންދާތަނުގެ ލިޔުން
އަނބިމީހާ ނުވަތަ ފިރިމީހާ ވޭދުވެދިޔަ 15 އަހަރުގެ ތެރޭގައި ވަޒީފާ އަދާކުރި އަދި މިހާރު ވަޒީދާ އަދާކުރަމުންދާތަނުގެ ލިޔުން
15 އަހަރުގެ ތެރޭގައި މާލޭގެ ސްކޫލ،ް ކޮލެޖް، ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަމުގެ ލިޔުން
އަނބިމީހާ ނުވަތަ ފިރިމީހާ 15 އަހަރުގެ ތެރޭގައި މާލޭގެ ސްކޫލ،ް ކޮލެޖް، ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަމުގެ ލިޔުން
ދަރިން15 އަހަރުގެ ތެރޭގައި މާލޭގެ ސްކޫލ،ް ކޮލެޖް، ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަމުގެ ލިޔުން
ޕެންޝަނާއި ބެހޭ ލިޔުންތައް

(ފޮޓޯ ކްރެޑިޓްސް: ވަގުތު)

މިނިސްޓަރު ވިދާޅުވީ ބައެއް ފަރާތްތަކުން އެޕްލައި ކުރިއިރު އުސޫލްތަކާއި އިރުޝާދުތަކަށް ނުފެތޭ ލިޔުންތައް ހުށަހަޅާފައިވާކަން އޭސީސީއިން ފާހަގަކޮށްފައިވާ ކަމަށެވެ. އަދި ޝަކުވާގެ މުއްދަތުގައި އެކި ކަހަލަ ލިޔެކިއުންތައް ހުށަހަޅާފައިވާކަން ފާހަގަކޮށްފައިވާ ކަމަށްވެސް ވިދާޅުވިއެވެ.އެހެންވެ އެފަދަ ލިޔުންތައް ބަލައިގަތުމަށް ނުފެންނަ ކަމަށް އޭޖީއިން ލަފާދީފައިވާ ކަމަށް މިނިސްޓަރު ވިދާޅުވިއެވެ. އެހެން ކަމުން ޕޯޓަލްގައި ހުށަހެޅިދާނެކަމަށް ބަޔާންކޮށްފައިވާ ލިޔުންތައް ނޫން ލިޔުންތަކަކީ ގާނޫނީގޮތުން ބަލައިގަނެވޭނެ ލިޔުންތަކެއް ނޫން ކަމަށް ވިދާޅުވިއެވެ.