Read Time:4 Minute, 15 Second
(ފޮޓޯ ކްރެޑިޓްސް: ފެނަކަ)
އައްޑޫ ސިޓީގެ ގުޅިފައިވާ ރަށްތަކަށް މިހާރު ކުރިމަތިވެފައިވާ ކަރަންޓުގެ މައްސަލަ ހައްލު ކުރުމަށް ބޭނުންވާ ސްޕެއާ ޕާޓްސް ހޯދުމުގެ މަސައްކަތް ކުރަމުންދާ ކަމަށް ފެނަކަ ކޯޕަރޭޝަން ލިމިޓެޑް އިން ވިދާޅުވެއްޖެއެވެ. ފެނަކަ އިން ނެރުނު ބަޔާނެއްގައި ވިދާޅުވީ އައްޑޫ ސިޓީގައި ޤާއިމުކޮށްފައިވާ ސީޕީއެސްގެ ޖެންސެޓްތަކަކަށް މައްސަލަ ދިމާވެ، ކަރަންޓުގެ ހިދުމަތަށް ބުރޫއަރާފައިވާ ކަމަށާއި މި މައްސަލަ ހައްލުކުރުމަށް މަސައްކަތް ކުރަމުންދާ ކަމަށެވެ. އަދި މި މަސައްކަތުގެ ނަތީޖާއެއްގެ ގޮތުން ސްޕެއާ ޕާޓްސް ލިބި، އެއް ޖެންސެޓުގެ މައްސަލަ މިއަދު ހައްލުވާނެ ކަމަށް ފެނަކަ އިން ވަނީ ވިދާޅުވެފައެވެ.
ހަމައެއާއެކު ބާކީ ސްޕެއާ ޕާޓްސް ލިބުނު އަވަހަކަށް ދެން ހުރި ޖެންސެޓުތައް ހައްލުކުރުމަށް މަސައްކަތް ކުރެވޭނެ ކަމަށް ވެސް ވަނީ ވިދާޅުވެފައެވެ. އަދި މި މައްސަލަ ހައްލުވަންދެން ކަރަންޓު ލޯޑް ހިފެހެއްޓުމަށްޓަކައި، ގުޅިފައިވާ ރަށްތަކުގެ އެކި ސަރަހައްދުތަކުން، އެކުލަވާލެވޭ ތާވަލާއި އެއްގޮތަށް، ކަރަންޓު ކެނޑުމަށް ހަމަޖެހިފައިވާ ކަމަށް ފެނަކައިން ވަނީ އަންގާފައެވެ. މިކަމުގެ ސަބަބުން އައްޑޫގެ ގުޅިފައިވާ ރަށްތަކުގެ ރައްޔިތުންނަށް ދިމާވާނެ ދަތިތަކަށް ނިހާޔަތަށް މައާފަށް އެދޭ ކަމަށާއި މި މައްސަލަ ވީހާވެސް އަވަހަކަށް ހައްލުކޮށް ކަރަންޓުގެ ހިދުމަތް އާއްމު ހާލަތަކަށް ގެންނަން މެދުނުކެނޑި މަސައްކަތް ކުރަމުންދާ ކަމަށް ވެސް ފެނަކަ އިން ވަނީ ވިދާޅުވެފައެވެ.
އައްޑޫ ސިޓީގެ ގުޅިފައިވާ ރަށްތަކަށް ދިމާވާ ކަރަންޓުގެ މައްސަލަ ހައްލުކުރަން އެ ސިޓީގައި 30 މެގަވޯޓްގެ ޕަވާ ޕްލާންޓެއް ގާއިމް ކުރުމަށް ޗައިނާގެ ޑޮންގްފަންގް އިލެކްޓްރިކް އިންޓަނޭޝަނަލް ކޯޕަރޭޝަންއާ ހަވާލު ކުރީ މިދިޔަ އަހަރު އޭޕްރީލް މަހު 18ގައެވެ. ކުރީގެ ޖަނަރޭޓަރުތައް މެއިންޓެއިންނުކޮށް ހުރުމުން އެތަކެތި ހުރީ ހަލާކުވެފައި ކަމަށާއި އެ ސިޓީއަށް ކަރަންޓު ފޯރުކޮށްދެނީ 18 ވަރަކަށް ޖަނަރޭޓަރު ބަހައްޓައިގެން ކަމަށް ފެނަކައިން ވަނީ މީގެ ކުރިން ވިދާޅުވެފައެވެ. ޖަނަރޭޓަރުތަކުގެ ހާލަތު ރަނގަޅު ކުރުމަށް ބޭނުންވާ ސްޕެއާތައް ހޯދުމާއި ކެޕޭސިޓީ އިތުރުުކުރުމާއި ހަލާކުވެފައިވާ ޖަނަރޭޓަރުތަކުގެ ބަދަލުގައި އިތުރު ޖަނަރޭޓަރު ފޮނުވުމުގެ މަސައްކަތްތައް ފެނަކައިން ދަނީ ކުރަމުންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0