20 ޓަނުގެ މުދަލާއެކު އެފްކޮމް ކާގޯގެ ފުރަތަމަ ފްލައިޓު ރާއްޖެ އަތުވެއްޖެ

Read Time:3 Minute, 57 Second

ވެލާނާ އިންޓަރނޭޝަނަލް އެއާޕޯޓް (ވީއައިއޭ) އިން އެފްކޮމް ކާގޯއާ ގުޅިގެން ޗާޓަރޑް ޝެޑިއުލްޑް ކާގޯ ޚިދުމަތް ފަށައި ފުރަތަމަ ފްލައިޓް ރާއްޖެ އަތުވެއްޖެއެވެ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ނެރުނު ބަޔާނެއްގައި ވިދާޅުވެފައިވާ ގޮތުން މި އައު ޚިދުމަތުގެ ދަށުން، އިންޑިއާގެ ޗެންނާއިއިން ފުރި އެފްކޮމް ކާގޯގެ ފުރަތަމަ ފްލައިޓުން 20 ޓަނުގެ ކާގޯ ވަނީ ވީއައިއޭއަށް އެތެރެކޮށްފައެވެ. މި ކާގޯ އެކްސްޕޯޓްކޮށްފައިވަނީ އެތިހާދު އެއަރވޭސްގެ ފްލައިޓެއް މެދުވެރިކޮށްކަން އެމްއޭސީއެލްއިން ފާހަގަކޮށްފައިވެއެވެ.

އެފްކޮމް ކާގޯއިން ހަފްތާއަކު 3 ފްލައިޓް އޮޕަރޭޓްކުރުމަށް ވަނީ ރޭވިފައެވެ. އަދި ކުރިއަށް އޮތްތަނުގައި މި އޮޕަރޭޝަންތައް އިތުރަށް ފުޅާކުރުމަށް އެމްއޭސީއެލްއިން ވަނީ ރާވާފައެވެ. މީގެ އިތުރުން، ވީއައިއޭ މެދުވެރިކޮށް ކާގޯ މޫވްމަންޓް ހަރުދަނާކުރުމަށް ޓަކައި، ބޮޑެތި އެއަރލައިންތަކާއެކު އިންޓަލައިން އެއްބަސްވުންތައް ޤާއިމުކުރުމުގެ މަސައްކަތް ވެސް އެފްކޮމް އެއަރލައިންސްއިން ކުރަމުންދާ ކަމަށް ބަޔާނުގައި ވިދާޅުވެފައިވެއެވެ. އެމްއޭސީއެލްއިން ފާހަގަކުރި ގޮތުގައި، މި އައު ޚިދުމަތާއެކު ވީއައިއޭއިން ދެމުންދާ ކާގޯގެ ޚިދުމަތްތައް ވަނީ އިތުރަށް ފުޅާވެފައެވެ. އަދި ދުނިޔޭގެ ކާގޯ ކަނެކްޓިވިޓީ ލޮޖިސްޓިކްސް ޗެއިންގައި ވީއައިއޭގެ ހިއްސާ އޮތުމަކީ ރާއްޖޭގެ އިޤްތިޞާދަށް އެމްއޭސީއެލްއިން ވަމުން އަންނަ ހިއްސާ އިތުރަށް ވަރުގަދަވާނެ ކަމެއް ކަމަށް އެ ކުންފުނިން ދެކެއެވެ.

އެމްއޭސީއެލްއިން އިތުރަށް ވިދާޅުވެފައިވަނީ، ބައިނަލްއަޤްވާމީ މިންގަނޑުތަކަށް ފެތޭގޮތަށް ސަލާމަތާއި ރައްކާތެރިކަން ކަށަވަރުކޮށް، ފުރިހަމަ ޚިދުމަތްތަކެއް ކަސްޓަމަރުންނަށް ފޯރުކޮށްދިނުމަށް އެ ކުންފުނިން އަބަދުވެސް މަސައްކަތްކުރަމުންދާ ކަމަށެވެ. ވެލާނާ އިންޓަރނޭޝަނަލް އެއަރޕޯޓް ތަރައްޤީކުރުމުގެ މަޝްރޫޢުގެ ތެރޭގައި ހިމެނިގެން ތަރައްޤީކޮށްފައިވާ އައު ކާގޯ ޓާމިނަލް ހުޅުވާފައިވަނީ މިދިޔަ އަހަރުގެ ކުރީކޮޅުގައެވެ. އެ ޓާމިނަލާއެކު އަހަރަކު ޖުމުލަ 120،000 ޓަނުގެ ކާގޯގެ ޚިދުމަތް ދެވޭނެ ޤާބިލުކަން ހުންނާނެއެވެ.