އައިރީނާގެ ބައްދަލުވުމުގައި, ކަރަންޓު ވިއުގަތަކުގެ ފެންވަރު މަތިކުރުމުގެ މުހިންމުކަން ވަޒީރު ތޯރިގު ފާހަގަކުރައްވައިފި

Read Time:3 Minute, 48 Second

އިންޓަރނޭޝަނަލް ރިނިއުބަލް އެނަރޖީ އެޖެންސީ (އައިރީނާ) ގެ 15 ވަނަ އެސެމްބްލީގެ ސައިޑް އިވެންޓެއްގައި، ދިވެހިރާއްޖޭގެ މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާރޖީ، ޠޯރިޤް އިބްރާހީމް ބައިވެރިވެވަޑައިގެން، ކަރަންޓު ވިއުގަތައް ތަރައްޤީކުރުމުގެ މުހިންމުކަން ފާހަގަކުރައްވައިފިއެވެ.

“ރައުންޑްޓޭބަލް ޑައިލޮގް އޮން ކްލައިމެޓް ޕްރިންސިޕަލްސް ޓު އަންލޮކް ގްރިޑް ފައިނޭންސިންގ” ގެ ނަމުގައި ބޭއްވި މި ބައްދަލުވުމުގައި، މިނިސްޓަރ ޠޯރިޤް އިބްރާހީމް ވާހަކަފުޅު ދައްކަވަމުން ވިދާޅުވީ، ކަރަންޓު ވިއުގަތައް މޮޑަނައިޒްކޮށް ފުޅާކުރުމަށް އަވަސް ގޮތެއްގައި އިންވެސްޓްމަންޓްތައް އިތުރުކުރުމަކީ މިހާރު ކޮންމެހެން ކުރަންޖެހިފައިވާ ކަމެއް ކަމަށެވެ. މިކަމުގެ ސަބަބުން އިޔާދަކުރަނިވި ހަކަތައިގެ ބޭނުން އިތުރުކޮށް، ކާބަން ބޭރުކުރާ މިންވަރު މަދުކުރުމަށް އެހީތެރިވެދޭނެކަން ވަޒީރު ވަނީ ފާހަގަކުރައްވާފައެވެ. މި ބައްދަލުވުމުގައި ބައިވެރިވި އެހެން ޤައުމުތަކުގެ ތަޖުރިބާކާރުން ވެސް، ކަރަންޓު ވިއުގަތަކުގެ މުހިންމުކަމާއި، އެކަމަށް ބޭނުންވާ ފައިނޭންސިންގ ހޯދުމުގެ ގޮންޖެހުންތަކާ ބެހޭގޮތުން މަޝްވަރާކުރެއްވިއެވެ. އަދި މިކަމަށް ޙައްލު ހޯދުމަށް އެކި ޤައުމުތަކުން ގެންގުޅޭ އުކުޅުތަކާ ބެހޭގޮތުން ވެސް މަޢުލޫމާތު ޙިއްޞާކުރެވުނެވެ.

މި ބައްދަލުވުމުގައި މިނިސްޓަރ ޠޯރިޤް އިބްރާހީމް ބައިވެރިވެވަޑައިގަތުމަކީ، ދިވެހިރާއްޖެއިން ތިމާވެށި ރައްކާތެރިކުރުމާއި މޫސުމަށް އަންނަ ބަދަލުތަކާ ގުޅޭގޮތުން ކުރަމުންދާ މަސައްކަތްތަކަށް ބައިނަލްއަޤްވާމީ މައިދާނުގައި އިތުރު ސަމާލުކަމެއް ހޯދައިދިނުމަށް އެޅުނު މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ. މިފަދަ ބައިނަލްއަޤްވާމީ މައިދާނެއްގައި ދިވެހިރާއްޖޭގެ އަޑު އިއްވުމަކީ ވަރަށް މުހިންމު ކަމެއް ކަމަށް ކަމާއި ބެހޭ މާހިރުން ދަނީ ބުނަމުންނެވެ. މިކަމުގެ ސަބަބުން ރާއްޖެއަށް ބޭނުންވާ ފަންނީ އަދި މާލީ އެހީތެރިކަން ހޯދުމަށް އިތުރު ފުރުޞަތުތަކެއް ހުޅުވިގެންދާނެއެވެ.