ސްޓެލްކޯއަށް ލިބުނު ކާމިޔާބީގެ ސިއްރަކީ ރައީސް މުއިއްޒުގެ ދުރުވިސްނުންތެރިކަމާއި ލީޑާޝިޕް: ފަހުމީ

Read Time:4 Minute, 26 Second

ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަށް މިއަދު ލިބުނު ކާމިޔާބީގެ ސިއްރަކީ ރައީސް ޑރ. މުހައްމަދު މުއިއްޒުގެ ދުރުވިސްނުންތެރިކަމާއި އެމަނިކުފާނުގެ ލީޑާޝިޕުގެ ހަރުދަނާކަމުން ހޯދުނު ކާމިޔާބީއެއް ކަމަށް ސްޓެލްކޯގެ މެނޭޖިންގ ޑިރެކްޓަރު ހުސައިން ފަހުމީ ވިދާޅުވެއްޖެއެވެ.

ސްޓެލްކޯ އިން ހުޅުމާލޭގެ ދެވަނަ ފިޔަވަހީގައި ގާއިމުކޮށްފައިވާ 132 ކިލޯވޯލްޓްގެ ހައިވޯލްޓޭޖް ސަބްސްޓޭޝަން ގްރޭޓަރ މާލެ އިންޓަކަނެކްޝަން ގްރިޑާ ގުޅާލުމުގެ މަސައްކަތް ވަނީ ކާމިޔާބުކަމާއެކު ނިންމާލާފައެވެ. މި ކަމާއި ގުޅިގެން ފަހުމީ ކުރެއްވި ޓްވީޓެއްގައި ވިދާޅުވީ މި މަސައްކަތް ނިންމާލާފައިވަނީ ކަރަންޓު މެދުކެނޑުން ވަރަށް މަދުކޮށްގެން ކަމަށާއި މި ކާމިޔާބީ ހޯދުމުގައި ސްޓެލްކޯގެ އިންޖިނިއަރުންނާއި މުވައްޒަފުންގެ މަސައްކަތަށް ޝުކުރު އަދާކުރައްވާ ކަމަށެވެ.

“މި ކާމިޔާބީ ޙާޞިލުކުރުމުގައި އަޅުގަނޑުމެންގެ އިންޖިނިއަރުންނާއި މުވައްޒަފުންގެ ފަރާތުން ފާހަގަކޮށްލެވޭ ހިތްވަރާއި ޕްރޮފެޝަނަލިޒަމަށް އަޅުގަނޑު ވަރަށް އިޚްލާޞްތެރިކަމާއެކު ތަޢުރީފު ކުރަން. މުވައްޒަފުންގެ ކެތްތެރިކަމާއި އެއްބާރުލުން ފާހަގަކޮށް ވަރަށް އިޚްލާޞްތެރިކަމާއެކު ޝުކުރު ދަންނަވަން.” ފަހުމީ ވިދާޅުވިއެވެ.

ފަހުމީ ވިދާޅުވި ގޮތުގައި މިފަދަ ބޮޑު ކާމިޔާބީއެއް ސްޓެލްކޯއަށް މިއަދު ހާސިލް ކުރެވުނީ ރައީސް ޑރ.މުހައްމަދު މުއިއްޒުގެ ދުރުވިސްނުންތެރިކަމާއި އެމަނިކުފާނުގެ ލީޑާޝިޕުގެ ސަބަބުން ކަމަށެވެ. އެހެންކަމުން ފަހުމީ ވަނީ ރައިސް މުއިއްޒުއަށް ހާއްސަ ޝުކުރެއް އަދާކުރައްވައިފައެވެ.

ޓްރާންސްމިޝަން އެންޑް ޑިސްޓްރިބިއުޝަންގެ ޖެނެރަލް މެނޭޖަރު އިބްރާހިމް ނާޝިދު ވިދާޅުވި ގޮތުގައި، މި މަސައްކަތް ކުރިއަށް ގެންދިއުމަށް ކުރިން އަންދާޒާކޮށްފައިވަނީ މާލޭގެ 10 ސަރަހައްދަކުން ކަރަންޓު މެދުކަނޑާލަން ޖެހޭނެ ކަމަށެވެ. ނަމަވެސް މޫސުން ތަންދިނުމާއެކު، މާލޭގެ ދެ ސަރަހައްދަކުން އެއް ގަޑިއިރަށްވުރެ މަދު ވަގުތުކޮޅަކަށް ކަރަންޓު މެދުކަނޑާލައިގެން މި މަސައްކަތް ނިންމާލެވިފައިވާ ކަމަށް އޭނާ ވިދާޅުވިއެވެ. މި މަސައްކަތް ނިމުމާއެކު، ހުޅުމާލޭގެ ދެވަނަ ފިޔަވަހީގެ ކަރަންޓުގެ ޚިދުމަތް އިތުރަށް ހަރުދަނާވެ އިތުބާރު ބޮޑުވެގެންދާނެއެވެ. އަދި މުޅި ގްރޭޓަރ މާލެ ސަރަހައްދުގެ ކަރަންޓުގެ ވިއުގަ އިތުރަށް ވަރުގަދަވެގެންދާނެ ކަމަށް ވެސް ސްޓެލްކޯއިން ވަނީ ބުނެފައެވެ.