Read Time:3 Minute, 57 Second
(ފޮޓޯ ކްރެޑިޓްސް: ރައީސް އޮފީސް)
ސިޔާސީ ފަރާތްތަކަށް ނުވަތަ އެނޫންވެސް ބަޔަކަށް ރާއްޖޭގެ ގައުމީ ހަމަޖެހުން ނަގާލުމުގެ ޖާގަ ނުދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ. ގއ. މާމެންދޫގައި މިރޭ ބޭއްވި ޖަލްސާގައި ވާހަކަ ދައްކަވަމުން ރައީސް ވިދާޅުވީ، “މިގައުމުގައި އަޅުގަނޑެއް ސިޔާސީ ގޮތުން އެއްވެސް މީހަކަށް އަނިޔާ ނުކުރާނަން، ބަދަލު ހިފުމެއް ނޯންނާނެ” ކަމަށެވެ. އަދި އެމަނިކުފާނު ބޭނުންވަނީ ގައުމުގައި “ހަގީގީ މާނައިގެ ހަމަޖެހުން އޮންނަން” ކަމުގައިވެސް އެމަނިކުފާނު ވިދާޅުވިއެވެ.
“އަޅުގަނޑުމެންގެ ގައުމަށް ތަރައްގީ އޭގެ ހަގީގީ މާނައިގަ ގެނެސްދެވިގެންދާނީވެސް ހަމަޖެހުމާ އެކީގަ. ހަގީގީއޭ މިދެންނެވީ ވަށާޖެހިފައިވާ ތަރައްގީއެއް އަޅުގަނޑު ބޭނުން ވަނީ ގައުމަށް އަންނަން. އުމްރާނީ ތަރައްގީއާ އެކީގަ އަޅުގަނޑުމެންގެ ވިސްނުން ތަރައްގީވެ އަޅުގަނޑުމެންގެ އަޚްލާގު ތަރައްގީވެ އަޅުގަނޑުމެންގެ މުޖްތަމައުގެ އުޅުންތަކާއި ގުޅުންތައް ހެޔޮ މަގުން ތަރައްގީވަމުން ގޮސް އޮންނަ ވަށާ ޖެހޭ ތަރައްގީއަކަށް ވާން،” ރައީސް ވިދާޅުވިއެވެ.
ރައީސް ވިދާޅުވީ ތަރައްގީގެ ފުރިހަމަ ނަފާ ރައްޔިތުންނަށް ލިބޭނީ ގައުމުގައި ހަމަޖެހުން ގާއިމް ކުރެވިގެން ކަމަށެވެ. އެގޮތުން އެމަނިކުފާ ވަނީ ގައުމީ އަދި ފަރުދީ ވިސްނުމެއްގައި ގައުމުގެ ހަމަޖެހުމަށް އެމަނިކުފާނު ކުރައްވަމުން ގެންދަވާ މަސައްކަތްފުޅަށް އެއްބާރުލުން ދެއްވުމަށް ރައްޔިތުންގެ ކިބައިން އެދިވަޑައިގެންފައެވެ. އަދި އެކަމަކީ ގައުމަށް ކޮށްދެވޭ ވަރަށް މުހިއްމު ކަމެއް ކަމުގައިވެސް ރައީސް ފާހަގަކުރެއްވިއެވެ.
“މިގައުމުގަ ސިޔާސީ ފަރާތްތަކުން އަދި އެނޫންވެސް ބަޔަކަށް މި ހަމަޖެހުން ނަގާލުމަކަށް އަޅުގަނޑެއް ޖާގައެއް ނުދޭނަން. އެއްވެސް ފުރުސަތެއް އެކަމަކަށް ނުދޭނަން” ރައީސް ވިދާޅުވިއެވެ. އެމަނިކުފާނު ވިދާޅުވީ އެކަމަށް އެއްވެސް ބަޔަކު އެއްވެސް ކަމެއް ކުރަން މަސައްކަތްކޮށްފިނަމަ “އެކަން ގައުމީ ވިސްނުމެއްގައި ހުއްޓުވައި، ގައުމީ ހަމަޖެހުން ޔަގީން ކުރާނަން” ކަމަށެވެ. އަދި އެކަން ކުރައްވާނީ ސާބިތުކަމާއެކުގައި ކަމަށްވެސް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0