ސައުދީގައި ތާށިވެފައި ތިބި އުމްރާވެރިންނަށް ވަޒީރު ގުޅުއްވައިފި، އުމްރާވެރިންނަށް އެހީވަނީ!

Read Time:4 Minute, 0 Second

(ފޮޓޯ ކްރެޑިޓްސް: ވަގުތު)

ސައުދީގައި ތާށިވެފައި ތިބި ހިޖްރާ އުމްރާ ގްރޫޕްގެ އުމްރާވެރިންނަށް އިސްލާމީ ކަންތައްތަކާއި ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ގުޅުއްވައިފިއެެވެ. އެ އުމްރާ ގްރޫޕްގެ ފަރާތުން ދިޔަ މީހަކު މީސް މިޑިއާގައި ބުނެފައި ވަނީ އޭނާއަކީ އެ ގްރޫޕްގެ ފަރާތުން އުމްރާއަށް އައިސް ހުރި މީހެއް ކަމަށެވެ. އަދި މި ގްރޫޕްގައި އޭނާއާއެކު 25 ވަރަކަށް މީހުން އައިސް މައްކާގައި ތިބި ކަމަށްވެސް ބުނެފައި ވެއެވެ.

“ކުޑަކުޑަ ތުއްތު ކުދިންވެސް އެބަތިބި، އަޅުގަނޑުމެން ރާއްޖެއިން ފުރުމުގެ ކަންތައް ދިޔައީ ވަރަށް ހާލުގައި، ތަޅުވާ ތަޅުވާފައި އަޅުގަނޑުމެން ތިން ބައި ކޮށްފައި ތިން ފްލައިޓަކުން މައްކާއަށް ފޮނުވީ، މައްކާގައި އަޅުގަނޑުމެން ތިއްބާ އެއް ރޭ ދަންވަރު އަޅުގަނޑު ހޮޓަލުންވެސް ބޭރުކޮށްލި”.’ އެ މީހާ ބުނެފައި ވަނީ މިހާރު އުމްރާގެ ހުރިހާ ކަމެއް ނިމި މިތިބީ ރާއްޖެ ނުދެވިފައި ކަމަށެވެ. “އެއްވެސް މީހަކަށް ރިޓާން ޓިކެޓެއް މި މީހުން ނުދޭ، އަދި ޓިކެޓް ނުވެސް ނަގާ އަދިވެސް، ޗުއްޓީ ހަމަވެގެން ޑިއުޓީއަށް ދާން ޖެހޭ ބަޔަކު ޑިއުޓީއަށް ނުދެވިފައި މިތިބީ، ސްކޫލް ހުޅުވިގެން ކިޔަވަން ނުދެވިފައި ކުޑަކުދިން އެބަ ތިބި.”. ވަޒީރު ވިދާޅުވީ، މައްކާގައި މިވަގުތުގައި އޮތް މޯލްޑިވްސް ޙައްޖު ކޯޕަރޭޝަންގެ މެދުވެރިކޮށް، ހާލުގައި ޖެހުނު އުމްރާވެރިންނަށް އެހީވުމަށް މަސައްކަތްކުރަމުންދާ ކަަމަށެވެ. “އަޅުގަނޑުވާނީ ހައްޖު ކޯޕަރޭޝަންގެ އެމްޑީއަށް އިރުޝާދު ދީފައި،”. ވަޒީރު ވިދާޅުވިއެވެ.

ވަޒީރު ވިދާޅުވީ، ދިވެހި އެއްވެސް ރައްޔިތަކަށް ދިމާވާ ދަތިކަމެއްގައި އެހީ ނުވެ ނުތިބޭނެ ކަމަށާއި، ރައީސް އަބަދުވެސް އިރުޝާދު ދެއްވަނީ ރައްޔިތުންނާ ގާތުން މަސައްކަތްކުރުމަށް ކަމަށްެވެ. “މައްކާގައި ދަތިޙާލަތެއް މެދުވެރިވެފައިވާ އުމްރާވެރިންގެ ބޭފުޅުންނާ މިރޭ އަޅުގަނޑުވަނީ ގުޅައި ވާހަކަ ދައްކައި މިހާރުގެ ޙާލަތު ބަލައިފަ. އިންޝާ ﷲ އެބޭފުޅުންނަށް ދިމާވެފައިވާ ދަތިކަން ހައްލުކުރުމަށް މިދަނީ މަސައްކަތްކުރަމުން،”. ވަޒީރު ވިދާޅުވިއެވެ. ވަޒީރު ވަނީ އުމްރާވެރިންނާ މެދު އިހްމާލުވި ހިޖުރަ ގްރޫޕްގެ ވެރިންގެ މައްސަލަ ތަހުގީގުކޮށް ފިޔަވަޅު އަޅާނެ ކަމުގެ ޔަގީންކަވްސް ދެއްވާފައެވެ.