ހާލުގައި ޖެހުނު އުމްރާވެރިން ރާއްޖެ ގެންނަން ހައްޖު ކޯޕަރޭޝަނުން އެހީ ވަނީ

Read Time:4 Minute, 7 Second

އުމްރާގެ އަޅުކަމަށް ސައުދި އަރަބިއްޔާގެ މައްކާއަށް ގޮސް އެނބުރި ނާދެވިފައި ތިބި އުމްރާވެރިން އަނބުރާ ރާއްޖެއަށް ގެނައުމަށް ކުރަންޖެހޭ ކަންކަމުގެ އިންތިޒާމުތައް ހަމަޖެއްސުމުގެ މަސަައްކަތް މޯލްޑިވްސް ހައްޖު ކޯޕަރޭޝަނުން ފަށައިފިއެވެ. ސައުދީގައި ތާށިވެފައި ތިބި ހިޖްރާ އުމްރާ ގްރޫޕްގެ އުމްރާވެރިންގެ ތެރޭގައި 24 މީހަކު ހިމެނެއެވެ. އޭގެ ތެރޭގައި ކުޑަކުދިންވެސް ހިމެނެއެވެ. އެ މީހުން ތާށިވެފައި ތިބިކަން އެނގުމާއެކު އިސްލާމީ ކަންތައްތަކާއި ބެހެ ވުޒާރާ އާއި ކަމާ ގުޅުން ހުރި އެހެން އިދާރާތަކާއި ކުންފުނިތަކުން އެ މީހުންނަށް އެހީވުމުގެ މަސައްކަތް ވަނީ ފަށައިފިއެވެ.

ހައްޖު ކޯޕަރޭޝަންގެ މެނޭޖިންގ ޑިރެކްޓަރ މުހައްމަދު ޝަކީލް އެކްސްގައި ކުރެއްވި ޕޯސްޓެއްގައި ވިދާޅުވީ، ހާލުގައި ޖެހުނު މީހުން ރާއްޖެ ގެނައުމުގެ ކަންކަން ވަޒީރު ޑރ. މުހައްމަދު ޝަހީމް އަލީ ސައީދުގެ އިރުޝާދުގެ ދަށުން ހައްޖު ކޯޕަރޭޝަނުން ކުރަމުންދާ ކަަމަށެވެ. ޝަކީލްގެ އެ ޕޯސްޓާއި ގުޅިގެން ވަޒީރު ޑރ. ޝަހީމް ވިދާޅުވީ “މޯލްޑިވްސް ޙައްޖު ކޯޕަރޭޝަން ވަރުގަދަ ކަމާއެކު ވުޖޫދުގައި އޮންނަންޖެހެނީ ކީއްވެގެންކަން ޙާލުގެ ދުލުން ނުކިޔައިދޭތޯ؟ ހައްޖު ކޯޕަރޭޝަނާ މެދު ދިވެހިން އުފާވާންވާނެ،”. ކަމަށެވެ.

އެ އުމްރާ ގްރޫޕްގެ ފަރާތުން ދިޔަ މީހަކު މީސް މިޑިއާގައި ބުނެފައި ވަނީ އޭނާއަކީ އެ ގްރޫޕްގެ ފަރާތުން އުމްރާއަށް އައިސް ހުރި މީހެއް ކަމަށެވެ. އަދި މި ގްރޫޕްގައި އޭނާއާއެކު 25 ވަރަކަށް މީހުން އައިސް މައްކާގައި ތިބި ކަމަށްވެސް ބުނެފައި ވެއެވެ. “ކުޑަކުޑަ ތުއްތު ކުދިންވެސް އެބަތިބި، އަޅުގަނޑުމެން ރާއްޖެއިން ފުރުމުގެ ކަންތައް ދިޔައީ ވަރަށް ހާލުގައި، ތަޅުވާ ތަޅުވާފައި އަޅުގަނޑުމެން ތިން ބައި ކޮށްފައި ތިން ފްލައިޓަކުން މައްކާއަށް ފޮނުވީ، މައްކާގައި އަޅުގަނޑުމެން ތިއްބާ އެއް ރޭ ދަންވަރު އަޅުގަނޑު ހޮޓަލުންވެސް ބޭރުކޮށްލި”.’

އެ މީހާ ބުނެފައި ވަނީ މިހާރު އުމްރާގެ ހުރިހާ ކަމެއް ނިމި މިތިބީ ރާއްޖެ ނުދެވިފައި ކަމަށެވެ. “އެއްވެސް މީހަކަށް ރިޓާން ޓިކެޓެއް މި މީހުން ނުދޭ، އަދި ޓިކެޓް ނުވެސް ނަގާ އަދިވެސް، ޗުއްޓީ ހަމަވެގެން ޑިއުޓީއަށް ދާން ޖެހޭ ބަޔަކު ޑިއުޓީއަށް ނުދެވިފައި މިތިބީ، ސްކޫލް ހުޅުވިގެން ކިޔަވަން ނުދެވިފައި ކުޑަކުދިން އެބަ ތިބި.”.