Read Time:4 Minute, 6 Second
ރާއްޖޭގެ ރަށްތައް އުފެދިފައި ހުންނަ ގޮތުން ކޮންމެ ރަށެެއްގައި އެންމެ އެކަށީގެންވާ ވަޒީފާތައް އަދާކުރުމަކީ އުނދަގޫ ކަމެކެވެ. އާއިލާގެ ކައިރީގައި، ދަރިންގެ ހެދި ބޮޑުވުމުގެ ދުވަސްވަރު ކައިރީގައި ހުރުމަކީ އެހެންނަމަވެސް، އެތައް ބައެއްގެ އުންމީދެވެ. ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ހުވަދު އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ދިމާވީ ތަފާތުކަމަކާއެވެ.
މަރުޙަބާ ދެންނެވުމަށް ގދ. ކަނޑުހުޅުދޫ ބަނދަރު ސަރަހައްދަށް އެއްވެފައި ތިބި ރައްޔިތުންނާ ސަލާމް ކުރައްވަމުން ދަނިކޮށް ކުޑަކުއްޖަކު، ކަރުދާސްކޮޅެއް ދިއްކޮށްލެއްވިއެވެ. ސަލާމް ކުރައްވާ އަވަދިވެގެން ރައީސް ބޭނުންފުޅުވެލެއްވީ ކަރުދާސް ކޮޅުގައި އޮތީ ކޮންކަމެއްތޯ ބެއްލެވުމަށެވެ. ކޮންމެ ދަތުރުފުޅެއްގައިވެސް ރައީސަށް އެތައް ރައްޔިތުންނެއް އެތައް ކަމެއް ދަންނަވައެވެ. އެހެންނަމަވެސް، މި ފަހަރުގެ އެދުން ތަފާތެވެ. ކުޑަކުއްޖާ، އާޔަލްގެ އެދުމަކަށްވީ އެއަތޮޅު އެހެން ރަށެއްގެ ޕޮލިސް ސްޓޭޝަންގައި މަސައްކަތް ކުރަމުންދާ އޭނާގެ ބައްޕަ އާ ބައްދަލު ކޮށްދިނުމެވެ.
ރައީސް ވަނީ ކުޑަ ވަގުތުކޮޅެއްގެ ތެރޭގައި މި އެދުން ހަގީގަތަކަށް ހައްދަވާ ދެއްވާފައެވެ. އާޔަލްގެ ބައްޕައާ މަދު ވަގުތުކޮޅެއްގެ ތެރޭގައި ބައްދަލު ކުރެވޭނެ ގޮތް ހަމަޖައްސާ ދެއްވިއެވެ. މިކަމާ ގުޅިގެން ފުލުހުންގެ ތަރުޖަމާނު އަޙުމަދު ޝިފާން ވިދާޅުވީ އެ ކުއްޖާ އަށް އެއް އަހަރުން ފެށިގެން ބައްޕަ އުޅެނީ ރަށުން ބޭރުގައި ކަމަށް ވުމުން، ރައީސް ބޭނުންފުޅުވީ ރައީސް އެ ރަށުން ފުރާވަޑައިގަތުމުގެ ކުރިން ވާންއޮތްކަމެއްނަމަ ބައްޕަ އާއި ކުއްޖާއާ އެކު ބައްދަލުވާނެ ފުރުސަތު އޮތްތޯ ބެއްލެވުމަށް ކަމަށެވެ. އަދި ކުއްޖާގެ ބައްޕަ ހުރީ ކައިރި ރަށެއްގެ ޕޮލިސް ސްޓޭޝަނެއްގައިކަމުން އެވަގުތަށް އެކަން ފުލުހުންގެ ހިދުމަތުން ހަމަޖައްސައިދީފައިވާކަމަށް ވިދާޅުވިއެވެ.
ހަމައެހެންމެ، މިކަމުގައި، އެ ޚިދުމަތުގެ މުވައްޒަފުންނާމެދު ޢަމަލުކުރަމުންދާ އުސޫލުތަކާއި ތަފާތު ގޮތަކަށް ޢަމަލުކޮށްފައިނުވާނެ ކަމަށްވެސް އޭނާ ވިދާޅުވިއެވެ. އާޔަލްގެ ބައްޕަ ރަށަށް އައުމުން، ކުއްޖާ އަދި އާއިލާއިން ވަނީ ބަނދަރަށް ގޮސް ހޫނު މަރުހަބާއެއް ކިޔާފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0