Read Time:4 Minute, 43 Second
(ފޮޓޯ ކްރެޑިޓްސް: ރައީސް އޮފީސް)
ގއ. ނިލަންދޫގެ ރައްޔިތުންނަށް ދިމާވެފައިވާ ގިނަ ގޮންޖެހުންތަކަށް މިއަަހަރުގެ ތެރޭގައި ހައްލު ހޯއްދަވައިދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެ އެވެ. ހުވަދު އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު އެއަތޮޅު އުތުރުބުރީ ނިލަންދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ އެކަނިކުފާނުގެ އަމާޒަކީ އެރަށަކަށް ތަރައްގީ ގެންނަ އިރު އެތަރައްގީއަކި ރައްޔިތުން އެދޭފަދަ ތަރައްގީއަކަށް ވުން ކަމަށެވެ. އެގޮތުން ނިލަންދޫ ރައްޔިތުންގެ ހުރި ކަންބޮޑުވުންތަކަށް ރިއާޔަތްކޮށް މިއަހަރުގެ ބަޖެޓުގައި ހިމަނައިގެން ކުރިއަށް ގެންދަން ރާވާފައިވާ ކަންކަން ކަމަށް ރައީސް ވަނީ އަލިއަޅުއްވާފައެވެ.
ރައީސް ވިދާޅުވީ ނިލަންދޫގެ ބަނދަރަށް ދިމާވެފައިވާ ދަތިކަމަކީ އެރަށުގެ ގިނަ ބަޔަކަށް ދަތިތަކެއް ކުރިމަތިވާ ކަމެއް ކަމަށާއި ބަނދަރު އިތުރަށް ފުރިހަމަ ކުރުމަށްޓަކައި “ރައްޔިތުން އެދޭ ގޮތަށް އެކަން އަޅުގަނޑު ކޮށްދޭނަން” ކަމަށެވެ. “މިރަށުގެ ދަނޑުވެރިންނާއި، އަދި މިރަށުގެ ޖުމްލަކޮށް މަސައްކަތުގަ އަދި ދިރިއުޅުމުގަ ވަރަށް މުހިއްމު ރަށުގެ ހިމާޔަތްކަން. ރަށުގެ ރަށްގިރުމުގެ މައްސަލައަށް ހައްލެެއް ގެނެސްދިނުން އަދި ރަށުގަ އެކި އެކި މަސައްކަތްތައް ކުރުމުގައިވެސް ގިރާ ސަރަހައްދު ހިމާޔަތް ކުރުމަކީ ވަރަށް މުހިއްމު ކަމެއް” ރައީސް ވިދާޅުވިއެވެ.
އެރަށުގައި ފެނާއި ނަރުދަމާގެ ނިޒާމު ގާއިމުކުރުމުގެ މަސައްކަތްވެސް އޮތީ މެދުކެނޑިފައެވެ. އެމަނިކުފާނު ވިދާޅުވީ ރަށްގިރުމުގެ މައްސަލަ ހައްލުކުރުމުގެ މަޝްރޫއާއެކު އެރަށުގައި މިހާރު ހިނގަމުންދާ އަދި ނުނިމި ހުރި އެކި ދާއިރާގެ މަޝްރޫއުތައްވެސް ކުރިއަށް ގެންގޮސްދެއްވާނެ ކަމަށެވެ. ޚާއްސަކޮށް ފުޓްސަލް ދަނޑު އަޅައިދިނުމަށްވެސް ވަރަށް ބޮޑު އިސްކަމެއް ދީގެން ކޮށްދެއްވާނެ ކަމަށް ރައީސް ވިދާޅުވިއެވެ. “ފުޓްސަލް ދަނޑުގެ މައްސަލަ އެންމެ އަވަސް ގޮތެއްގަ ހައްލުކުރުމަށް އަޅުގަނޑުމެން ކަންތައްތައް ފަހިކޮށްދޭނަން. ސްކޫލުގެ ކުރިއެރުމަށްވެސް މުހިއްމު ކަންތައްތައް ކުރަން އެބަހުރި” ރައީސް ވިދާޅުވިއެވެ.
ނިލަންދޫގެ ސްކޫލުގައި މަލްޓިޕާޕަސް ހޯލެއް އަޅުއްވައިދެއްވުމަކީ އެމަނިކުފާނުގެ ކެމްޕެއިން ވައުދުފުޅެއްކަން ފާހަގަކުރައްވަމުން ރައީސް ވިދާޅުވީ “އެ ވައުދު މަތިން ވަރަށް ރަނގަަޅަށް ހަނދާން އެބަހުރި” ކަމަށެވެ. އަދި އެ ވައުދު ފުއްދަވައިދެއްވާނެ ކަމުގެ ޔަގީންކަން އަރުވާކަމަށްވެސް ރައީސް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0