Read Time:5 Minute, 54 Second
(ފޮޓޯ ކްރެޑިޓްސް: ރައީސް އޮފީސް)
ގއ. ކަނޑުހުޅުދޫގެ ރައްޔިތުން ބޭނުންވާ ގޮތަށް އެ ރަށުގެ ބަނދަރާއި ސްކޫލާއި ސިއްހީ މަރުކަޒުގައި ހުރި މައްސަލަތައް ހައްލުކޮށްދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެެއްވައިފިއެވެ. ކަނޑުހުޅުދޫއަށް ވަޑައިގެން ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ މި އަހަރަކީ ގިނަ މައްސަލަތަކަކަށް ދާއިމީ ގޮތެއްގައި ރަނގަޅު ހައްލެއް ގެނެސްދޭނެ އަހަރެއް ކަމަށެވެ. އެގޮތުން ބައެއް ކަންކަމަކީ ރިޔާސީ އިންތިހާބުގެ ތެރޭގައި އެމަނިކުފާނު ވައުދުވެވަޑައިގެންފައިވާ ކަންކަންކަމުގައި ފާހަގަކުރެއްވިއެވެ.
(ފޮޓޯ ކްރެޑިޓްސް: ރައީސް އޮފީސް)
ރައީސް ވިދާޅުވީ ކަނޑުހުޅުދޫ ބަނދަރުގެ ޖާގަ ކުޑަ ވުމުގެ މައްސަލައަކީ ވަރަށް މުހިންމު މައްސަލައެއް ކަމަށެވެ. އެހެންކަމުން އެ މައްސަލައަށް ހައްލެއް ގެނައުމަށް ސަރުކާރުގެ ބަޖެޓްގެ ތެރެއިން އަމަލީ ގޮތުން އެ މަސައްކަތް ފަށައި އެ މައްސަލަ ހައްލުކޮށްދޭނެ ކަމުގެ ޔަގީންކަންދެއްވާކަމަށް ވިދާޅުވިއެވެ. ކައުންސިލާއި މިނިސްޓްރީއިން މަޝްވަރާ ކޮށްގެން އެކަމުގައި ކައުންސިލުން ބޭނުންވާ ގޮތަށް ބަނދަރު މައްސަލަ ހައްލުކޮށްދެއްވާނެ ކަމަށް ވިދާޅުވިއެވެ.
” ސްކޫލްގެ ޖާގައިގެ ދަތިކަން. އެގޮތުން ސްކޫލްގެ ހޯލުގެ މަސައްކަތް ނުހިނގާ ލަސްވެގެންދާ މައްސަލަ ހައްލުކޮށް. ކްލާސްރޫމްގެ ޖާގަ އިތުރުކުރުން. ޖުމްލަކޮށް ސްކޫލްގެ ކެޕޭސިޓީ އިތުރުކުރުން. ސްކޫލަށް މަލްޓިޕާޕަސް ހޯލާއި. އަޅަމުންދާ ކްލާސްރޫމްތަކުގެ އިތުރަށް ވެސް އަޅުގަނޑު ގަބޫލްކުރަނީ މި ސްކޫލްގައި އިތުރު ކްލާސްރޫމް އެޅުމަކީ ކުރަންޖެހޭ ކަމެކޭ. އެހެންވީމަ މިހާރު މަސައްކަތް ކުރަމުންދާ މަޝްރޫގެ ސްކޯޕްގެ އިތުރަށް ވެސް ކްލާސްރޫމްތައް ހިމަނައިގެން މި ރަށުގައި ކްލާސްރޫމާއި އަދި މަލްިޕާޕަސް ހޯލް ނިންމަދޭނަން.” ރައީސް ވިދާޅުވިއެވެ.
ރައީސް ކަނޑުހުޅުދޫއަށް ވެލެއްވި އިތުރު ވައުދުތައް:
- ފުޓްސެލްދަނޑުގައި ފެންސް ޖެހުން
- ފުޓްސެލްދަނޑުގައި ކުޅިވަރު ބަލަން ތިބޭނެ ޖާގަ އިތުރުކުރުން
- ފުޓްބޯޅަދަނޑުގެ ޓާފް ބަދަލުކޮށް އެތްލެޓިކްސްއަށް ބޭނުންކުރެވޭގޮތަށް ތަރައްގީކުރުން
- އަންނަ އަހަރު ބިން ހިއްކުމުގެ މަޝްރޫއެއް ފެށުން
- ބިން ހިއްކާ ނިމުމުން ރޯ ހައުސްގެ މަޝްރޫއެއް ފެށުން
- ސީއެމްބިއުލެންސްގައި ހުރި ދަތިތަކަށް ހައްލެއް ގެނައުން
(ފޮޓޯ ކްރެޑިޓްސް: ރައީސް އޮފީސް)
ރައީސް ވިދާޅުވީ މި އަހަރުގެ ބަޖެޓްގައި ދެވަނައަށް އިސްކަންދެނީ ތައުލީމީ ދާއިރާއާއި ސިއްހީ ދާއިރާއަށް ކަމަށެވެ. އެގޮތުން ކަނޑުހުޅުދޫގެ ސިއްހީ މަރުކަޒަށް ދިމާވެފައިވާ އެކިއެކި ކަންތައްތައް އެބަހުރި ކަަމަށާއި ކުދިކުދި ކަންކަމުން ގޮސް މުހިންމު ކަންކަމާ ހަމައަށް މައްސަލަ އެބަހުރި ކަމަށެވެ. އެގޮތުން އެރަށުގެ ސިއްހީ މަރުކަޒުން 24 ގަޑިއިރު ހިދުމަތް ދެވޭނެ ފެންވަރަށް އެތަން ތަރައްގީކޮށްދެއްވާނެ ކަމަށް ވިދާޅުވިއެވެ. ރައީސް ވިދާޅުވީ ސިއްހީ މަރުކަޒުން އެދިފައިވާ ކަންކަމަށް އިޖާބަދީ މި އަހަރުގެ ތެރޭގައި ނަތީޖާ ނެރެދެއްވާނެ ކަމަށެވެ.
ރަށުގެ ތަރައްގީއަށް ބޭނުންވާ ކަންކަން ކޮށްދެއްވާނެ ކަމަށާއި އަދި އެކަމުން ރައްޔިތުންނަށް ފުރިހަމަ އުފާވެރިކަން ލިބިގެންދާނެ ކަމަށް ވެސް ރައީސް ވިދާޅުވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0