މިއީ މަސްވެރިކަމުގެ ތަރައްގީގައި ކުލަޖެހިގެންދާ އަހަރަށް ވެގެންދާނެ: ޝިޔާމް

Read Time:4 Minute, 27 Second

(ފޮޓޯ ކްރެޑިޓްސް: ވަގުތު)

މަސްވެރިކަމުގެ ސިނާއަތުގެ ތަރައްގީއަށް، ރައީސުލްޖުމްހޫރިއްޔާ، ޑރ. މުޙައްމަދު މުއިއްޒު ކުރައްވަމުން ގެންދަވާ މަސައްކަތްޕުޅު، މަސްވެރި ކޮމިއުނިޓީތަކުން ވަރަށް ބޮޑަށް ބަލައިގަންނަކަމަށާއި، 2025 ވަނަ އަހަރު ވެގެންދާނީ މި ސިނާއަތުގެ ތަރައްގީގައި ކުލަ ޖެހިގެންދާ އަހަރަށްކަމަށް، މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު، އަޙުމަދު ޝިޔާމް ވިދާޅުވެއްޖެއެވެ. ވަޒީރު ޝިޔާމް މިހެން ވިދާޅުވެފައިވަނީ ރައީސް މިހާރު ހުވަދު އަތޮޅަށް ކުރައްވަމުން ގެންދަވާ ދަތުރުފުޅާ ގުޅޭގޮތުން، އެކްސްގައި ކުރެއްވި ޕޯސްޓެއްގައެވެ.

“ރައީސުލްޖުމްހޫރިއްޔާ ރާއްޖޭގެ އެންމެ މަސްވެރިން ގިނަ ހުވަދުއަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ހުވަދުއަތޮޅު ދެކުނުބުރީގެ ގިނަ ރަށްތަކަކަށް ދަތުރުކުރެއްވި އިރު ފާހަގަކުރެވުނު އެއްކަމަކީ މަސްވެރިކަމުގެ ސިނާއަތުގެ ތަރައްޤީއަށް ރައީސް ކުރައްވަމުން ގެންދަވާ ކަންކަމާ އަދި ކުރައްވަން ރާއްވަވާފައިވާ ކަންކަން މަސްވެރި ކޮމިއުނިޓީ ތަކުން ވަރަށް ބޮޑަށް ބަލައިގަންނަކަން.” ވަޒީރު ވިދާޅުވެފައިވެއެވެ. މީގެއިތުރުންވެސް ވަޒީރު ވަނީ މި ދަތުރުފުޅުގެ ތެރެއިން ހުވަދު އަތޮޅު ދެކުނުބުރީގެ ހޯނޑެއްދޫ، ނަޑެއްލާ، ވާދޫ، އަދި ފިޔޯރީގެ ރައްޔިތުން ރައީސަށް ކިޔުއްވި މަރުޙަބާއަށް ޝުކުރު ދަންނަވާފައެވެ.

ރައީސުލް ޖުމްހޫރިއްޔާ ރާއްޖޭގެ އެންމެ މަސްވެެރިން ގިނަ ހުވަދުއަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ހުވަދުއަތޮޅު ދެކުނުބުރީގެ ގިނަ ރަށްތަކަކަށް ދަތުރުކުރެއްވި އިރު ފާހަގަކުރެވުނު އެއްކަމަކީ މަސްވެރިކަމުގެ ސިނާއަތުގެ ތަރައްޤީއަށް ރައީސް ކުރައްވަމުން ގެންދަވާ ކަންކަމާ… pic.twitter.com/V9LN3dSDuV

— Ahmed Shiyam (@Shiyamaldives) January 8, 2025

ސަރުކާރުގެ މަސް ކުންފުނި، މިފްކޯ އިން ހާމަކޮށްފައިވާ ގޮތުގައި މި އަހަރުގެ އެންމެ ފުރަތަމަ ދެ ދުވަހުވެސް އެންމެ ގިނައިން މަސް ކިރުވާފައިވަނީ ހުވަދު އަތޮޅުންނެވެ. އެގޮތުން ހުވަދު އަތޮޅު ދެކުނުބުރިން 22 ދޯންޏަކުން 92.6 މެޓްރިކް ޓަނުގެ މަސް ކިރުވާފައިވާއިރު، ހުވަދު އަތޮޅު އުތުރުބުރި 20 ދޯންޏަކުން 80.7 މެޓްރިކް ޓަނުގެ މަސް ކިރުވާފައިވެއެވެ.

ރައީސް މުއިއްޒުގެ ވައުދުފުޅާއި އެއްގޮތަށް މިހާރު މިފްކޯއިން ދަނީ މަސްކިރާތާ ދެ ދުވަސްތެރޭ ކިރުވި މަހަށް ފައިސާ ދޫކުރަމުންނެވެ. އަދި މަސްވެރިކަމަށް ބޭނުންވާ ތެޔޮ ކްރެޑިޓަށް ދޫކުރުމުގެ މަސައްކަތްވެސް މިފްކޯއިން ދަނީ ކުރަމުންނެވެ.