Read Time:8 Minute, 36 Second
އެއްވެސް އިރެއްގައި އެހީގެ ގޮތުގައި 1،000 ޑޮލަރު ނުދޭ ކަމަށާއި މިދިޔަ ސަރުކާރުން އެފަދަ ގޮތަކަށް ފައިސާ ދިން ނަމަވެސް އެކަން އެއްވެސް ލިޔެކިޔުމަކުންނާއި ސިސްޓަމުން ފެންނަ ނެތް ކަމަށް ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ހާމަކޮށްފިއެވެ. އެންސްޕާއިން އެކަން ހާމަކޮށްފައިވަނީ އެހީގެ ގޮތުގައި މިދިޔަ ސަރުކާރުން 1000 ޑޮލަރު ދިން ނަމަވެސް މި ސަރުކާރުން އެވަރު ނުދީ، މަދު ފައިސާކޮޅެއްދޭ ކަމަށް ބުނެ ދައުރުކުރަމުން އަންނަ ވާހަކަތަކާއި ގުޅިގެން ކަމުގެ ހަގީގަތް ރައްޔިތުންނަށް އޮޅުން ފިލުވައި ދިނުމުގެ ގޮތުންނެވެ.
އެގޮތުން އެންސްޕާއިން ބުނީ، ކެންސަރު ފަރުވާ ހޯދަމުންދާ ފަރާތަކަށް އެއޭޖެންސީން އެހީ ހަމަޖައްސައި ނުދިން ކަމަށް ލިޔެ ކޮށްފައިވާ ޓުވިޓަކީ މުވައްޒަފުން ބަދުނާމުވާގޮތަށް ހަގީގަތާއި ހިލާފު ވާހަކަތަކެއް ކަމަށެވެ. އެ ދެންނެވުނު ފަރާތުން އާސަންދަ އަދި ވެލްފެއާގެ އެހީއަށް އެދި ހުށަހެޅި ކަމަށް ސިސްޓަމުން ފެންނަ އޮތީ ޖުމްލަ 9 ފަހަރު ކަމަށާއި އެހުރިހާ ފަހަރަކު އެހީތެރިކަން ފޯރުކޮށްދީފައިވާ ކަމަށް ވަނީ ބުނެފައެވެ.
އެފަރާތުން އެންމެ ފުރަތަމަ އެހީއަށް އެދި ހުށަހަޅާފައިވަނީ 2023 ވަނަ އަހަރުގެ މޭއި މަހުގައި ކަމަށާއި އެފަހަރު ވެލްފެއާ ކޭސްގެ ދަށުން ފައިސާގެ އެހީގެ ގޮތުގައި 3،855 ރުފިޔާ ހަމަޖައްސަދީފައިވާނެ ކަމަށެވެ.
އެއަށްފަހު:
- 11-05-2023: އާސަންދަ ކޭސްގެ ދަށުން ބަލިމީހާއާއި އެހީތެރިޔާގެ ޓިކެޓާއި ބޭސްފަރުވާގެ ފުލް ކަވާރޭޖް ހަމަޖެއްސި
- 10-07-2023: ވެލްފެއާ ކޭސްގެ ދަށުން އަމިއްލައަށް ނަގާފައިވާ 1 ޓިކެޓުގެ ރިއިމްބާސްމަންޓާއި ފައިސާގެ އެހީގެ ގޮތުގައި ޖުމްލަ 900 ޑޮލަރަށްވާ ފައިސާ ދިން
- 06-11-2023: އާސަންދަ ކޭސްގެ ދަށުން ބަލިމީހާއާއި އެހީތެރިޔާގެ ޓިކެޓާއި ބޭސްފަރުވާގެ ފުލް ކަވަރޭޖް ހަމަޖެއްސި
- 13-11-2023: ވެލްފެއާގެ ކޭސްގެ ދަށުން އާސަންދަ މެދުވެރިކޮށް އިތުރު އެހީތެރިއެއްގެ ޓިކެޓު އަދި 3،084 ރުފިޔާ ހަމަޖެއްސި
- 09-05-2024: އާސަންދަ ކޭސްގެ ދަށުން ބަލިމީހާއާއި އެހީތެރިޔާގެ ޓިކެޓާއި ބަލިމީހާގެ ބޭސްފަރުވާގެ ފުލް ކަވަރޭޖް ހަމަޖައްސައިދިން
- 24-0502024: ވެލްފެއާ ކޭސްގެ ދަަށުން ފައިސާގެ އެހީގެ ގޮތުގައި 3،855 ރުފިޔާ ހަމަޖައްސައިދިން
- 27-11-2024: އާސަންދަ ކޭސްގެ ދަށުން ބަލި މީހާގެ ޓިކެޓާއި ބޭސްފަރުވާގެ ފުލް ކަވަރޭޖް ހަމަޖެއްސި
- 28-11-2024: ވެލްފެއާގެ ކޭސްގެދަށުން އާސަންދަ މެދުވެރިކޮށް ބަލިމީހާގެ އެހީތެރިޔާގެ ޓިކެޓް އަދި 3،084 ރުފިޔާ ހަމަޖެއްސި
މިކަންކަމަށް ބަލާއިރު، އެފަރާތުން ހުށަހެޅި ކޮންމެ ފަހަރަކު އޮންނަ އުސޫލުގެ ތެރެއިން އެހީދީފައިވާނެ ކަމަށް އެންސްޕާއިން ވަނީ ބުނެފައެވެ. އަދި ހަމަ އެހެންމެ، އަމިއްލައަށް ނެގި ޓިކެޓުގެ ރިއިމްބާސްމަންޓުގެ ގޮތުގައި ދެވުނު ފައިސާ ފިޔަވައި ކޮންމެ ފަހަރަކު ވެސް ފައިސާގެ އެހީގެ ގޮތުގައި ދީފައިވަނީ 200-250 ޑޮލަރަށްވާ ދިވެހި ރުފިޔާކަން އެނގޭ ކަމަށެވެ. އަދި އެއްވެސް ފަހަރަކު 1000 ޑޮލަރު ދީފައިވާކަން ލިޔުމަކުން އަދި ސިސްޓަމުން ނުދައްކާ ކަމަށް ވެސް ވަނީ ބުނެފައެވެ.
އެންސްޕާއިން ޓުވިޓް ކުރި ފަރާތާ ބައްދަލު ކުރުން
އެންސްޕާއިން ބުނީ، އެކަމާއި ގުޅިގެން މިއަދު އެއޭޖެންސީގެ އިސްވެރިންނާއި ކަމާބެހޭ ކޮމިޓީއާއެކު ޓުވިޓް ކުރި ފަރާތާ ބައްދަލުކޮށްފައިވާނެ ކަމަށެވެ. އަދި އިސްވެ ދެންނެވުނު އެހީތައް އެފަރާތުގެ ހާޒިރުގައި އެންސްޕާގެ ސިސްޓަމްތަކުން ބަލައި، އެ އެހީތަކަކީ އެކައުންޓަށް ޖަމާވެފައިވާ އެހީތައްކަން އެފަރާތުން އެއްބަސްވެ، މައުލޫމާތުގެ ސައްހަކަމަށް “އިއުތިރާފު”ވެފައިވާ ކަމަށެވެ.
ނަމަވެސް ކުރީ ސަރުކާރުގައި 1000 ޑޮލަރު ލިބެމުންދިޔަ ކަމަށް ޓުވިޓުގައި ބުނެފައިވާތީއާއި ބައްދަލުވުމުގައި ވެސް ތަކުރާރުކޮށް އޭރު ލިބުނު ކަމަށް ބުނެފައިވާތީ، އެކަމާިއ ބެހޭ ގޮތުން އޮޅުން ފިލުވުމުން އެފަރާތުން ބުނެފައިވަނީ “ކޭސް އަވަސް ކުރުމުގެ ގޮތުން އޭރު އާސަންދަ ހިންގެވުމަށް ހުންނެވި އިސްބޭފުޅާއަށް ގުޅާފައި ދެންނެވި ކަމަށާއި، އެއަށްފަހު ކުއްޖަކު ގުޅާފައި އަންނަނ ބުނި ކަމަށާއި، ދިއުމުން އޭ4 ސައިޒް ގަނޑެއްގައި ސޮއިކުރުވާފައި އެއަދަދަށް ފައިސާ ހަވާލުކުރި” ކަމަށެވެ.
އެންސްޕާއިން ބުނީ، އޭރު ދިން ކަމަށް އެފަރާތުން ބަޔާން ކުރާ 1000 އަށްވާ ފައިސާ ހަމަޖައްސައިދީފައިވާ ކަމަށް އެއްވެސް ލިޔެކިޔުމަކުން އަދި އޭޖެންސީގެ އެއްވެސް ސިސްޓަމެއްގައި ފެންނަން ނެތް ކަމަށެވެ. އަދި އެކަމާއި ގުޅުން ހުރި ލިޔެކިޔުމެއް އެފަރާތުގައި ވެސް ނެތް ކަމަށް އެފަރާތުން އެއްބަސްވެފައިވާ ކަމަށެވެ.
އެހެން ކަމުން އެއްވެސް ލިޔެކިޔުމަކުން ފެންނަން ނެތް ފައިސާއެއް ދޫކޮށްފައިވާ ކަމަށްވާނަމަ، އެއީ އެހީ ހަމަޖައްސައިދެވޭ އުސޫލާއި މިންގަނޑުތަކާއި ހިލާފަށް އަދި އެހީދޭ ނިޒާމުން ބޭރުން ހިންގާފައިވާ އުސޫލުތަކާ ހިލާފު އަމަލެއް ކަމަށް އެންސްޕާއިން ވަނީ ބުނެފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0