Read Time:2 Minute, 40 Second
ފުޓުބޯޅައަކީ ހަމައެކަނި ކުޅިވަރެއް ނޫނެވެ. ޚިޔާލުތަފާތުވުންތަކާއި ސިޔާސީ ވާދަވެރިކަން ދުރުކޮށް، ފަރުދުންނާއި ޤައުމުތައް ގުޅުވައިދޭ ވަސީލަތެކެވެ. މިކަމުގެ އެންމެ ރަނގަޅު މިސާލަކީ 2008 ވަނަ އަހަރެވެ. ސިޔާސީ ހަލަބޮލިކަމުގެ ތެރޭގައި، ރާއްޖެ ސަރަހައްދީ ފުޓުބޯޅަ ތަށި ހޯދިއެވެ. ޕާކިސްތާނާ ދެކޮޅަށް ކުޅެ ލިބުނު ކާމިޔާބީން ފެށިގެން، ކޮޅުނބުގައި އިންޑިއާ 1-0 އިން ބަލިކޮށް ތަށި ހިފައިގެން ރާއްޖެ އެނބުރި އައި ދުވަހާ ހަމައަށް، ސިޔާސީ ކުލަތަކުން ބެހިފައި އޮތް ޤައުމު ޤައުމީ ކުލަތަކުން ބަދަހިވިއެވެ.
މިހާރު ވެސް ހަމަ އެފަދަ ފުރުސަތެއް ވަނީ ލިބިފައެވެ. މި މަހުގެ 23 ވަނަ ދުވަހު ގަލޮޅު ދަނޑުގައި ފަށާ 20 އަހަރުން ދަށުގެ ސާފް ޗެމްޕިއަންޝިޕަކީ، ފުރަތަމަ ފަހަރަށް ރާއްޖޭގައި ބާއްވާ އުމުރުފުރައިގެ ބޮޑު ފުޓުބޯޅަ ހަރަކާތެކެވެ. ރާއްޖޭގެ ސްކޮޑުގައި ތިބީ ހުނަރުވެރި ޒުވާން ކުޅުންތެރިންތަކެކެވެ. ސިންގަޕޫރު ކޭމްޕުގައި އެ ޤައުމުގެ ޒުވާން ޓީމު ބަލިކުރި ކުރުމުން ވެސް ދިވެހި ޓީމުގެ ފެންވަރު ހާމަވެއެވެ. ބައިވެރިވަނީ ރާއްޖޭގެ އިތުރުން އިންޑިއާ، ބަންގްލަދޭޝް، ނޭޕާލް، ބޫޓާން، ޕާކިސްތާން، އަދި ސްރީލަންކާ ހިމެނޭ ޖުމްލަ 7 ޓީމެކެވެ. 23 ވަނަ ދުވަހުގެ ހަވީރު ނޭޕާލާއި ބޫޓާން ބައްދަލުކުރާ މެޗަކުން މުބާރާތް ފަށާ، ހަމަ އެ ރޭ ރާއްޖެ ލަންކާއާ ދެކޮޅަށް ނިކުންނާނެއެވެ. ދިވެހި ކުޅުންތެރިންނަށް ބޭނުންވަނީ، އަމިއްލަ ފަސްގަނޑުގައި ހިތްވަރު ދޭނެ ދިވެހި ސަޕޯޓަރުންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0