ޕެލޭއަށްވުރެ މެސީ މޮޅު: ޓްރަމްޕް

Read Time:4 Minute, 15 Second

(ފޮޓޯ ކްރެޑިޓްސް: ރޮއިޓާރސް)

ފުޓުބޯޅައިގައި އެންމެ ޝަރަފުވެރި، އެންމެ ހައިބަތު ބޮޑު “ލެޖެންޑް” އެއްގެ ދަރަޖަ ދެވިފައިވާ ބްރެޒިލްގެ ޕެލޭއަށްވުރެ، ފުޓުބޯޅައިގައި ހޯދެން އޮތް ހުރިހާ ކާމިޔާބީއެއް ކަހަލަ ގޮތަކަށް ހޯދައި ފުޓުބޯޅަ “ކޮމްޕްލީޓް” ކޮށްފައިވާ އާޖެންޓީނާގެ ކެޕްޓަން ލިއޮނެލް މެސީ މާ މޮޅު ކަމަށް އެމެރިކާގެ ރައީސް ޑޮނާލްޑް ޓްރަމްޕް ވިދާޅުވެއްޖެއެވެ. ޓްރަމްޕް މިހެން ވިދާޅުވީ، މެސީއާއި އޭނާގެ ކުލަބު، އިންޓަރ މަޔާމީ އާއެކު ވައިޓް ހައުސްގައި ބޭއްވެވި ބައްދަލުކުރެއްވުމުގައެވެ. މި ބައްދަލުކުރެއްވުމަކީ މަޔާމީ އިން، އެމްއެލްއެސް ކަޕް ކާމިޔާބުކުރުން ފާހަގަކުރުމުގެ ގޮތުން ވައިޓް ހައުސްގައި ބޭއްވެވި ބައްދަލުކުރެއްވުމެކެވެ. މި ބައްދަލުކުރެއްވުމުގައި ވާހަކަފުޅުދައްކަވަމުން ޓްރަމްޕް ވަނީ މެސީއަށް ވަރަށް ބޮޑަށް ތައުރީފުކޮށް ޝުކުރު ވެސް އަދާކުރައްވާފައެވެ.

އެގޮތުން ޓްރަމްޕްގެ ދަރިކަލުން ބެރޮން ޓްރަމްޕް އަކީ މެސީގެ ވަރަށް ބޮޑު “ފޭން” އެއް ކަމަށާއި، މެސީއަކީ ފުޓުބޯޅައިގެ އެންމެ ކާމިޔާބު، އެންމެ ގިނަ ޓްރޮފީ އުފުލާލި އެއް ކުޅުންތެރިޔާކަން ޓްރަމްޕް ފާހަގަކުރެއްވިއެވެ. ޓްރަމްޕް ވިދާޅުވީ، ޕެލޭ ފުޓުބޯޅަ ކުޅުނު ދުވަސްވަރު ވެސް ފުޓުބޯޅަ ބެއްލެވިކަމަށާއި އެހެންނަމަވެސް ޕެލޭ އަށްވުރެ ވެސް މެސީ މާ މޮޅުކަމަށް ގަބޫލުފުޅުކުރައްވާ ކަމަށެވެ. މި ބައްދަލުވުމުގައި މެސީގެ ހާޒިރުގައި ޓްރަމްޕް ވަނީ މެސީއާ ވާދަވެރި ކްރިސްޓިއާނޯ ރޮނާލްޑޯގެ ވާހަކަވެސް ދައްކަވާފައެވެ. ފާހަގަކޮށްލަން ޖެހޭ ގޮތުގައި ޓްރަމްވަނީ މީގެކުރިން ރޮނާލްޑޯއާ ވެސް ވައިޓް ހައުސްގައި ބައްދަލުކުރައްވާފައެވެ. އެ ބައްދަލުވުމުގައި ޓްރަމްޕް ވަނީ ރޮނާލްޑޯއަށް ވެސް ވަރަށް ބޮޑަށް ތައުރީފުކުރައްވާފައެވެ. އަދި ބެރޮން ޓްރަމްޕް އަކީ ރޮނާލްޑޯގެ ވަރަށް ބޮޑު ސަޕޯޓަރެއް ކަމަށާއި، ރޮނާލްޑޯއާ ބައްދަލުކެއްވުމުގެ ފުރުސަތު ލިބިވަޑައިގަތުމުން ދަރިކަލުން ކުރައްވާ އިޚްތިރާމް އިތުރުވެގެންދިޔަކަމަށް ވެސް ޓްރަމްޕް ވަނީ އެ ބައްދަލުކުރެއްވުމުގައި ވިދާޅުވެފައެވެ.

އުމުރުން 38 އަހަރުގެ މެސީ އެމެރިކާގެ މޭޖަރ ލީގް ސްކާ (އެމްއެލްއެސް) ގެ އިންޓަރ މަޔާމީއާ ގުޅުނީ 2023 ވަނަ އަހަރުގެ ޖުލައި މަހުގެ ތެރޭގައެވެ. މެސީ މިހާރު ވަނީ 2028 ވަނަ އަހަރުގެ ނިޔަލަށް އެ ކުލަބުގައި މަޑުކުރަން އެއްބަސްވުން އައުކޮށްފައެވެ.