އެމެރިކާއިން އީރާނަށް އެއްގަމު ސިފައިން ފޮނުވަފާނެތަ؟

Read Time:3 Minute, 9 Second

(ފޮޓޯ ކްރެޑިޓްސް: ރޮއިޓާރސް)

އީރާނާ ދެކޮޅަށް ކުރާ ހަނގުރާމައިގައި އެއްގަމު ސިފައިން ފޮނުވުމުގެ ފުރުޞަތު އެބައޮތް ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން އަސްކަރީ ތަޖުރިބާކާރުން ސުވާލު އުފައްދައިފިއެވެ. އެމެރިކާ އާއި ޔަހޫދީން ގުޅިގެން ފެބުރުވަރީ 28 ގައި ފެށި މި ހަނގުރާމައިގައި މިހާތަނަށް އީރާނުގެ 1,045 މީހުން ވަނީ ޝަހީދުވެފައެވެ. ޓްރަމްޕް މިފަދަ ނިންމުމެއް ނިންމެވި ނަމަވެސް، އީރާނުގެ ބިމުގެ ހާލަތާއި ފަރުބަދަ ގިނަވުމުގެ ސަބަބުން އެއްގަމު މަގުން ހަނގުރާމަކޮށް ކާމިޔާބު ހޯދުމަކީ ދަތި ކަމެއް ކަމަށް މަސްރަޙް ދިރާސާކުރާ ފަރާތްތަކުން ދެކެއެވެ.

އަސްކަރީ މާހިރުން ބުނާ ގޮތުގައި، މުޅި ލަޝްކަރެއް ފޮނުވުމުގެ ބަދަލުގައި އެމެރިކާއަށް ކުރިއަށް ގެންދެވޭނީ ޖާސޫސީ މައުލޫމާތަށް ބިނާކޮށް ހިންގާ ވަކިވަކި “ޚާއްޞަ އޮޕަރޭޝަންތަކެކެވެ.” އެމެރިކާގެ ހަނގުރާމައާ ބެހޭ ވަޒީރު ވެސް ވަނީ ގިނަ އަދަދެއްގެ ސިފައިން ފޮނުވައިގެން ދިގުލީ ހަނގުރާމައެއް ކުރުމުގެ ވިސްނުން ނެތްކަން ހާމަކުރައްވާފައެވެ. އަދި މިފަދަ ބޮޑު ހަނގުރާމައަކަށް ތައްޔާރުވުމުގެ އަސްކަރީ ގާބިލުކަން މިވަގުތު އެމެރިކާގައި ނެތްކަން ވެސް ތަޖުރިބާކާރުން ފާހަގަކުރެއެވެ.

ހަނގުރާމަ ފެށި ސަބަބާ މެދު ޓްރަމްޕް ދައްކަވާ ވާހަކަފުޅުތަކުގައި ފުށުއެރުންތަކެއް ހުރިއިރު، މިއީ އޭނާ އިސްވެ ފެއްޓެވި ހަނގުރާމައެއް ކަމަށް އަމިއްލައަށް ވަނީ އެއްބަސްވެފައެވެ. ނަމަވެސް މި ހަނގުރާމައަށް އެމެރިކާ ރައްޔިތުންގެ މެދުގައި އޮތް ތާއީދު ވަރަށް ބޮޑަށް ވަނީ ކުޑަވެފައެވެ. ދިރާސާތަކުން ދައްކާ ގޮތުގައި ޓްރަމްޕް ފެއްޓެވި މި ހަނގުރާމައަށް ތާއީދުކުރަނީ އެމެރިކާގެ އެންމެ 27 އިންސައްތަ ރައްޔިތުންނެވެ.