މެދުއިރުމަތީގެ ހަނގުރާމަ: ވިލާތުގެ ޤައުމުތައް ބައިބައިވެފައި

Read Time:5 Minute, 25 Second

(ފޮޓޯ ކްރެޑިޓްސް: ރޮއިޓާރސް)

އެމެރިކާއާއި ޔަހޫދީން ގުޅިގެން އީރާނަށް ހަމަލާ ދިނުމުން މެދުއިރުމަތީގައި އުފެދިފައިވާ ހަމަނުޖެހުމާމެދު ޢަމަލުކުރާނެ ގޮތަކާ މެދު ވިލާތުގެ ޤައުމުގެ ދެމެެެދުގައި ޚިޔާލތަފާތުވުންތަކެއް އެބަހުއްޓެވެ. ވިލާތުގެ އިއްތިޙާދަށް ނިސްބަތްވާ ގިނަ ޤައުމުތަކަކުން އީރާނުން ރައްދުގައި ދެމުންދާ ޙަމަލާތައް ކުށްވެރިކޮށް، އެ ޙަމަލާތަކާމެދު ކަންބޮޑުވުން ފާޅު ކުރި ނަމަވެސް މި ޙާލަތުގައި ވިލާތުގެ އިއްތިޙާދުން އެކަތި ގަނޑެއްގެ ގޮތުގައި ނަގާނެ މަޤާމެއް ކަނޑައެޅިފައެއް ނުވެއެވެ. ޚާއްޞަގޮތެއްގައި އެމެރިކާއާއި ޔަހޫދީންގެ އަސްކަރީ ޙަރަކާތްތަކަށް ސީދާ ވާގިވެރިވުމާމެދު ޚިޔާލު ތަފާތުވުންތައް އެބަހުއްޓެވެ. ބައެއް ޤައުމުގެ ވެރިން މި ޙާލަތުގައި މަޝްވަރާގެ މަގު ޚިޔާރުކޮށް ޞުލްޙަ ޤާއިމް ކުރުމަށް ހިތްވަރު ދެމުންދާއިރު، އަނެއް ބައި ޤައުމުތަކުގެ އިސްވެރިން ދަނީ ސަލާމަތީ ދާއިރާއިން ކަންބޮޑުވުންތައް ފާޅުކުރަމުންނެވެ.

މި ވަގުތު ކުރިމަތިވެފައިވާ މި ޙާލަތުން ވިލާތުގެ ޤައުމުތަކުގެ މެދުގައި ސަލާމަތީ އަދި ދިފާޢީ މައްސަލަތަކުގައި އިސްކަންދޭނެ ކަންކަމާ ގުޅޭގޮތުން ބައިބައިވުން އޮތް މިންވަރު ދަނީ ހާމަވަމުންނެވެ. ސްޕެއިން ފަދަ ޤައުމުތަކުން އެމެރިކާއިން ކުރިމަތިކުރުވާ ފިއްތުންތަކާ ދެކޮޅަށް ފާޅުގައި ބަސް ބުނަމުންދާއިރު ޖަރުމަނުވިލާތް ފަދަ ޤައުމުތަކުން ދަނީ އެމެރިކާގެ އިސްތިރާޖީ ލަނޑުދަނޑިތަކާ އެ ޤައުމުތަކުގެ ފިކުރު އެއްގޮތް ކަމަށް ހާމަކުރަމުންނެވެ. އީރާނުން ވަނީ މައްސަލައިގެ ތެރެއަށް ވިލާތުގެ ޤައުމުތަކުން ނުވަނުމަށް އިންޒާރު ދީފައެވެ. އެ ފަދަ ގޮތަށް އެ ޤައުމުތަކުން ޢަމަލުކޮށްފި ނަމަ އެއީ ހަނގުރާމައިގެ ޢަމަލެއް ކަމަށް އީރާނުން ދެކި ރައްދު ޙަމަލާ ދޭނެ ކަމަށް އެ ޤައުމުން ވަނީ ބުނެފައެވެ. އީރާނުން މި ފަދަ އިންޒާރެއް ދީފައި ވަނީ ޖަރުމަނުވިލާތާއި ފަރަންސޭސިވިލާތާއި އިނގިރޭސިވިލާތް ފަދަ ބައެއް ޤައުމުތަކުން، އެ ޤައުމުތަކުގެ އަމިއްލަ ދިފާޢުގައި މި ޙާލަތުގައި ފިޔަވަޅުތަކެއް އެޅުން އެކަށީގެންވާ ކަމަށް ބުނަމުން ދަނިކޮށެވެ. ކަން މިހެން އޮތް އިރު، ވިލާތުން އެކަތިގަނޑެއްގެ ގޮތުގައި ދިފާޢީ މަސައްކަތްތައް ކުރުމާއި އެއްބާރުލުން ދިނުމުގެ މަސައްކަތް ކުރުމާ ގުޅޭގޮތުން މިހާރު ދަނީ ބަހުޘް ކުރަމުންނެވެ.

ސަރަޙައްދީ ނުތަނަވަސްކަން އިތުރުވަމުންދާ މި ދަނޑިވަޅުގައި ވިލާތުގެ ބައެއް ޤައުމުތަކުން ދަނީ އެމެރިކާއަށް ދިފާޢީ ދާއިރާއިން އެއްބާރުލުން ދެމުންނެވެ. ގްރީސްއިން ވަނީ ސައިޕްރަސްގެ ދިފާޢުގައި ފައިޓަރު ޖެޓުތަކެއް ފޮނުވައިފައެވެ. އަދި ސަރަޙައްދީ ސަލާމަތްތެރިކަން އިތުރުކުރުމަށް ފަރަންސޭސިވިލާތާއި އިނގިރޭސިވިލާތުން ވައިގެ ދިފާޢީ ނިޒާމުތަކާއި ހަނގުރާމަމަތީ މަނަވަރު ފޮނުވުމަށް ވަނީ ނިންމައިފައެވެ. އޭގެ އިތުރުން ވެސް ވިލާތުގެ އިސްވެރިން ދަނީ ހުރިހާ ޤައުމަކުން އެކުގައި ދިފާޢީ ދާއިރާއިން އެއް ފިޔަވަޅުތަކެއް އެޅުމަށް ގާނޫނީ ހުރަސްތަކެއް ހުރިތޯ ދިރާސާކުރަމުންނެވެ.