ދިހަ ކުޅުންތެރިންނާއިއެކު ނިއުކާސަލް އިން ޔުނައިޓެޑް ބަލިކޮށްފި

Read Time:3 Minute, 4 Second

އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓެޑް އާއި ދެކޮޅަށް މެންޗެސްޓަރ ޔުނައިޓެޑް ކުޅުނު މެޗު 2-1 ގެ ނަތީޖާއަކުން ނިއުކާސަލް ޔުނައިޓެޑް ކާމިޔާބުކޮށްފި އެވެ. މެޗުގެ ފުރިހަމަ ހާފުގެ އިންޖަރީ ވަގުތުގެ ފުރަތަމަ މިނިޓުގައި ނިއުކާސަލްގެ ޖެކޮބް ރަމްސޭއަށް ދެވަނަ ރީނދޫ ކާޑަކާއިއެކު ރަތް ކާޑު ދައްކާ ދަނޑުން ފޮނުވާލުމާއި ގުޅިގެން އެ ކްލަބުން ދެވަނަ ހާފް ކުޅެފައިވަނީ އެއް ކުޅުންތެރިއަކު މަދުކޮށެވެ. ނިއުކާސަލް ޔުނައިޓެޑްގެ ސެއިންޓް ޖޭމްސް ޕާކުގައި ފަންސާސް ދެ ހާހަށްވުރެ ގިނަ މީހުންގެ ކުރިމަތީގައި ކުޅުނު މި މެޗުގެ ފުރަތަމަ ހާފުގެ އިންޖަރީ ވަގުތުގެ ހަވަނަ މިނިޓުގައި ނިއުކާސަލް އިން ލީޑު ނަގާފައިވަނީ އެ ޓީމަށް ލިބުނު ޕެނަލްޓީ އަކުންނެވެ. މި ލަނޑު ނިއުކާސަލް އަށް ކާމިޔާބުކޮށްދީފައިވަނީ އެންތޮނީ ގޯޑަން އެވެ.

މެޗުގެ ފުރަތަމަ ހާފުގެ އިންޖަރީ ވަގުތުގެ ގޮތުގައި 10 ވަރަކަށް މިނިޓު ކުޅުނު މި މެޗުގައި ނިއުކާސަލް އިން ލީޑު ނެގިތާ ތިން މިނިޓު ފަހުން އިންޖަރީ ވަގުތުގައި ޔުނައިޓެޑްގެ ކަސެމީރޯ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ. ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންގޮސްފައިވާ މި މެޗުން ނިއުކާސަލް ޔުނައިޓެޑް ތިން ޕޮއިންޓް ކަށަވަރުކޮށްފައިވަނީ ބަދަލު ކުޅުންތެރިއެއްގެ ގޮތުގައި ކުޅެން އެރި ވިލިއަމް އޮސޫލާ މެޗުގެ 90 ވަނަ މިނިޓުގައި ކާމިޔާބުކޮށްދިން ލަނޑުންނެވެ.

މި ނަތީޖާ އާއިއެކު ނިއުކާސަލް ޔުނައިޓެޑަށް ވަނީ 29 މެޗުން ލިބިފައިވާ 39 ޕޮއިންޓާއެކު ތާވަލުގެ 12 ވަނަ މަގާމް ލިބިފަ އެވެ. މެންޗެސްޓަރ ޔުނައިޓެޑަށް ލިބިފައިވާ 51 ޕޮއިންޓާއެކު އެ ޓީމު އޮތީ ތާވަލުގެ ތިންވަނައިގަ އެވެ.