Read Time:2 Minute, 45 Second
(ފޮޓޯ ކްރެޑިޓްސް: ރައީސް އޮފީސް)
ޖަރުމަނުވިލާތަށް ކުރައްވާ ރަސްމީ ދަތުރުފުޅުގައި “ޖަރމަން ކައުންސިލް އޮން ފޮރިން ރިލޭޝަންސް” ގައި ތަޤުރީރު ކުރައްވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ކަނޑުތަކުގެ މައްޗަށް ބިނާކުރެވޭ ޚާރިޖީ ސިޔާސަތަކީ ރާއްޖެއަށް ވުޖޫދީ ގޮތުން ނުހަނު މުހިންމު ކަމެއް ކަމަށެވެ. މޫސުމީ ބަދަލުތަކާއި، ކާބޯތަކެތީގެ ރައްކާތެރިކަމާއި، ދުނިޔޭގެ އިޤްތިޞާދުގައި ކަނޑުތަކުގެ ދައުރު ބޮޑު ނަމަވެސް، ބައިނަލްއަޤުވާމީ ސިޔާސީ ފިކުރުގައި އެކަމަށް އެކަށީގެންވާ ސަމާލުކަމެއް ދެވިފައި ނުވާކަން އެމަނިކުފާނު ފާހަގަކުރެއްވިއެވެ.
ހިންދު ކަނޑަކީ އިސްތިރާޖީ ގޮތުން ވާދަވެރިކަން ބޮޑު، އަދި ކަނޑުގެ އަޑީގެ ޑިޖިޓަލް ބިނާރުތައް ހިމެނޭ މުހިންމު ސަރަޙައްދެއްކަން ފާހަގަކުރައްވައި، ކަނޑުތަކުގެ ރައްކާތެރިކަން ކަށަވަރުކުރުމަށްޓަކައި ޖަރުމަނާއި އެހެނިހެން ބައިވެރިންނާ ގުޅިގެން މަސައްކަތްކުރަން ރާއްޖެ ތައްޔާރަށް އޮތްކަމަށް ރައީސް ވިދާޅުވިއެވެ. އަދި ރާއްޖޭގެ ޚާއްޞަ އިޤްތިޞާދީ ސަރަޙައްދު ބެލެހެއްޓުމުގެ ޤާބިލިއްޔަތު އިތުރުކުރުމަށާއި، އަވައްޓެރި ޤައުމުތަކާއެކު އޮންނަ ގުޅުން ބަދަހިކުރުމަށް އިސްކަންދެއްވާނެ ކަމަށްވެސް އެމަނިކުފާނު ވިދާޅުވިއެވެ. މީގެ އިތުރުން، ރާއްޖެއާއި ޖަރުމަނާ ދެމެދު އޮތް 60 އަހަރުވީ ގުޅުން ބަދަހިކޮށް، ތިމާވެށި ހިމާޔަތްކުރުން ފަދަ ދާއިރާތަކުން އެއްބާރުލުން ދިނުމުގެ މުހިންމުކަން ރައީސް ފާހަގަކުރެއްވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0