Read Time:3 Minute, 50 Second
(ފޮޓޯ ކްރެޑިޓްސް: ސަން)
2025ވަނަ އަހަރު ސިވިލް ކޯޓުން މައްސަލަ ނިންމި މިންވަރު އޭގެ ކުރީ އަހަރާއި ބަލާއިރު 23 އިންސައްތަ އިތުރުވެއްޖެއެވެ. އެކޯޓުން ވަނީ މިދިޔަ އަހަރު އެކޯޓަށް ހުށަހެޅުނު މައްސަލަތަކާއި ނިންމި މައްސަލަތަކުގެ ތަފާސްހިސާބު އާންމުކޮށްފައެވެ. ސިވިލް ކޯޓުގެ ތަފާސް ހިސާބުތައް ދައްކާ ގޮތުން މިދިޔަ އަހަރު 5680 މައްސަލަ ވަނީ އެކޯޓުގައި ރަޖިސްޓްރީކޮށްފައެވެ. 2024ވަނަ އަހަރު ރަޖިސްޓްރީކޮށްފައިވަނީ 5142 މައްސަލައެވެ. އެގޮތުން މިއީ 2024ވަނަ އަހަރާއި އަޅާ ބަލާއިރު 10.46 އިންސައްތަ އިތުރު އަދެކެވެ.
މިދިޔަ އަހަރު ސިވިލް ކޯޓުން ނިންމި މައްސަލަތަކަށް ބަލާއިރު 6718 މައްސަލަ ވަނީ ނިންމާފައެވެ. 2024ވަނަ އަހަރު ނިންމާފައިވަނީ 5432 މައްސަލައެވެ. މިއީ 2024ވަނަ އަހަރު ނިންމު މައްސަލަތަކާއި އަޅާބަލާއިރު 23.68 އިންސައްތަ އިތުރު އަދަދެކެވެ. މީގެއިތުރުން އިޖުރާއީ ނިންމުމާއި އިޚްތިޞާޞާމެދު ނިންމި ނިންމުންތައް އަދަދުވެސް ސިވިލް ކޯޓުން ވަނީ ހިއްސާކޮށްފައެވެ. އެގޮތުން 2024ވަނަ އަހަރު 135 ނިންމުން އަދި މިދިޔަ އަހަރު 126 ނިންމުން ވަނީ ނިންމާފައެވެ. ސިވިލް ކޯޓުގެ ތަފާސްހިސާބުތައް ދައްކާގޮތުން ދައުވާގެ ތެރެއިން ހުށަހެޅުނު ވަގުތީ އަމުރާއި ކޯޓު އަމުރާމެދު ނިންމި ނިންމުންތައް ބަލާއިރު 2025ވަނަ އަހަރު 166 މައްސަލަ ވަނީ ނިންމާފައެވެ. 2024ވަނަ އަހަރު 103 މައްސަލަ ނިންމާފައިވާއިރު މިއީ 2024 އަހަރާއި ބަލާއިރު 63 މައްސަލައިގެ އިތުރު އިތުރުވުމެވެ.
ސިވިލް ކޯޓަކީ 21 އޮކްޓޯބަރ 2010ގައި ތަޞްދީޤު ކުރި ދިވެހިރާއްޖޭގެ ކޯޓުތަކުގެ ޤާނޫނުގެ ދަށުން އުފެދިފައިވާ ސުޕީރިއަރ ކޯޓެކެވެ. މި ކޯޓަކީ މަދަނީ މައްސަލަތަކުގެ ތެރެއިން ޢާއިލީ މައްސަލަތައް ފިޔަވައި އެންމެހައި މަދަނީ މައްސަލަތައް ފުރަތަމަ މަރުޙަލާގައި ބެލުމުގެ އިޚްތިޞާޞް ލިބިގެންވާ ކޯޓެކެވެ. ސިވިލް ކޯޓު އުފެދުމާ ހަމައަށް ސިވިލް ކޯޓުގެ އިޚްތިޞާޞްގައި ހިމެނޭ މައްސަލަތައް ބަލަމުން އައީ 01 އޮގަސްޓް 1997 ގައި އުފެއްދި މަދަނީ ކޯޓުންނެވެ. ހުޅުމާލޭގައި ސިވިލް ކޯޓުގެ ޑިވިޜަނެއް ޤާއިމުކޮށްފައިވަނީ 13 އޭޕްރިލް 2016 ގައި ދިވެހިރާއްޖޭގެ ސުޕްރީމް ކޯޓުގެ ޤަރާރަކުންނެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0