މިދިޔަ އަހަރު ޑިޕާޗަރ ޓެކުހާއި އެއާޕޯޓް ޑިވެލޮޕްމަންޓް ފީއަށް 3.8 ބިލިޔަން ރުފިޔާ

Read Time:3 Minute, 56 Second

(ފޮޓޯ ކްރެޑިޓްސް: އެމްއޭސީޢެލް)

މިދިޔަ އަހަރު ޑިޕާޗަރ ޓެކުހާއި އެއާޕޯޓް ޑިވެލޮޕްމަންޓު ފީގެ ގޮތުގައި ދައުލަތަށް 3.8 ބިލިޔަނަށްވުރެ ގިނަ ރުފިޔާ ލިބިފައިވާ ކަމަށް ތަފާސްހިސާބުތަކުން ދައްކައިފިއެވެ. މިއީ، އޭގެ ކުރީ އަހަރާއި އަޅާބަލާއިރު 1.5 ބިލިޔަން ރުފިޔާގެ އިތުރުވުމެކެވެ. ޑިޕާޗަރ ޓެކުހަކީ، ރާއްޖޭގެ އެއާޕޯޓަކުން ރާއްޖެއިން ބޭރަށް ފުރާ ފަސިންޖަރުންގެ އަތުން ނަގާ ޓެކުހެކެވެ. ޑިޕާޗަރ ޓެކްސް ނަގަން ފެށީ، 2022 ވަނަ އަހަރުގެ ޖަނަވަރީ 1 ގައެވެ. އެއާޕޯޓް ޑިވެލޮޕްމަންޓް ފީއަކީ، ވެލާނާ އިންޓަރނޭޝަނަލް އެއާޕޯޓުން ރާއްޖޭން ބޭރަށް ފުރާ ކޮންމެ ފަސިންޖަރެއްގެ އަތުން ނަގާ ފީއެކެވެ.

މޯލްޑިވްސް އިންލޭންޑް ރެވެނިއު އޮތޯރިޓީ، މީރާގެ ތަފާސްހިސާބުތައް ދައްކާގޮތުން 2025 ވަނަ އަހަރު ޑިޕާޗަރ ޓެކުހުގެ ގޮތުގައި ލިބިފައިވަނީ 1.9 ބިލިޔަން ރުފިޔާއެވެ. 2024 ވަނަ އަހަރު ޑިޕާޗަރ ޓެކުހުގެ ގޮތުގައި ލިބުނީ، 1.1 ބިލިޔަން ރުފިޔާއެވެ. އެއާޕޯޓް ޑިވެލޮޕްމަންޓް ފީގެ ގޮތުގައި 2025 ވަނަ އަހަރު ދައުލަތައް ލިބުނީ، 1.9 ބިލިޔަން ރުފިޔާއެވެ. 2024 ވަނަ އަހަރު އެއާޕޯޓް ޑިވެޕޮލްމެންޓް ފީގެ ގޮތުގައި ލިބިފައިވަނީ، 1.2 ބިލިޔަން ރުފިޔާއެވެ. ޑިޕާޗަރ ޓެކުހާއި އެއާޕޯޓް ޑިވެލޮޕްމަންޓު ފީ އެއްކޮށްލައިގެން 2025 ވަނަ އަހަރު ދައުލަތައް ލިބުނު ޢާމްދަނީއަކީ 3.8 ބިލިޔަން ރުފިޔާއެވެ. 2024 ވަނަ އަހަރު ލިބިފައިވަނީ، 2.3 ބިލިޔަން ރުފިޔާއެވެ. އެހެންކަމުން މިއީ، %65.7 އިތުރުވުމެއް ކަމަށް މީރާގެ ތަފާސްހިސާބުތަކުން ދައްކައެވެ.

ޑިޕާޗަރ ޓެކުހާއި އެއާޕޯޓް ޑިވެލޮޕްމަންޓް ފީތައް:
* އިކޮނޮމީ ކްލާސް: ދިވެހިން – 12 ޑޮލަރު / ބިދޭސީން – 30 ޑޮލަރު
* ބިޒްނަސް ކްލާސް: ދިވެހިން – 60 ޑޮލަރު / ބިދޭސީން – 60 ޑޮލަރު
* ފަސްޓް ކްލާސް: ދިވެހިން – 90 ޑޮލަރު / ބިދޭސީން – 90 ޑޮލަރު
* ޕްރައިވެޓް ޖެޓު: ދިވެހިން – 120 ޑޮލަރު / ބިދޭސީން – 120 ޑޮލަރު

މީރާގެ ރިޕޯޓުގައި ބުނެފައިވަނީ އެއާޕޯޓު ޑިވެލޮޕްމަންޓް ފީގެ ގޮތުގައި ދައުލަތައް ލިބުނު އާމްދަނީ އިތުރުވީ، 2025 ވަނަ އަހަރު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އިތުރުވުމުން ކަމަށެވެ. 2025 ވަނަ އަހަރު ރާއްޖެއަށް 2.2 މިލިޔަން ފަތުރުވެރިން ޒިޔާރަތްކޮށްފައިވެއެވެ.