ހިންގުން ހަރުދަނާކުރުމަށް މުހިންމު މަސައްކަތްތަކެއް އެބަކުރެވޭ: ސައްތާރު

Read Time:5 Minute, 3 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ރާއްޖޭގައި ހަރަކާތްތެރިވާ ކުޅިވަރު އެސޯސިއޭޝަންތަކުގެ ހިންގުން ހަރުދަނާ ކުރުމަށްޓަކައި މުހިންމު، ކާމިޔާބު މަސައްކަތްތަކެއް ކުރެވެމުންދާކަމަށް މޯލްޑިވްސް އޮލިމްޕިކް ކޮމެޓީ (އެމްއޯސީ) ގެ ރައީސް މުހައްމަދު އަބްދުއް ސައްތާރު (ޗަމްޕީ) ވިދާޅުވެއްޖެއެވެ. މި ސަރުކާރުން ވެރިކަމާ ހަވާލުވެ ކުޅިވަރާ މެދު ގެންގުޅޭ ތަސައްވުރަކީ، ކުޅިވަރުތަކާއި ކުޅިވަރު އެސޯސިއޭޝަންތަކުގެ ހިންގުން ހަރުދަނާ ކުރުމަށްޓަކައި އިންސާނީ ވަސީލަތްތައް ތަރައްގީކުރުމުގައި ތަމްރީނުތައް ދިނުންކަމުގައި ފާޙަގަކޮށް “ޕީއެސްއެމް ނިއުސް” ގެ “ރާއްޖެ މިއަދު” ޕްރޮގްރާމުގައި ވާހަކަދައްކަވަމުން ސައްތާރު ވަނީ، މި މަގުން މުހިންމު މަސައްކަތްތަކެއް ކުރަމުންދާކަން ފާހަގަކުރައްވާފައެވެ. އޭނާ ވިދާޅުވީ ރާއްޖޭގެ ކުޅިވަރު ވުޒާރާއާއި އެމްއޯސީއާ ދެމެދު މިހާރު ވަރަށް ގާތް، ބަދަހި ގުޅުމެއް އޮންނަ ކަމަށާއި، ދެ ފަރާތުން ވެސް މަސައްކަތްކުރަމުންދަނީ އެއް ލަނޑުދަނޑިއެއް ޙާސިލްކުރުމުގެ އަޒުމުގައި ކަމަށެވެ. އެގޮތުން ކުޅިވަރު އެސޯސިއޭޝަންތަކުގެ މެނޭޖްމަންޓް ހަރުދަނާކޮށް، ރަނގަޅުކުރުމަކީ ރާއްޖޭގެ ކުޅިވަރު މަތީ ހަރުފަތަކަށް ގެންދިއުމުގައި މުހިންމު ހިއްސާއެއްކަމަށް ދެކިގެން އެމްއޯސީއާއި ކުޅިވަރު ވުޒާރާއިން އަދި ހުރިހާ އެސޯސިއޭޝަންތަކުން ވެސް މަސައްކަތްކުރަމުންދާކަން ސައްތާރު ފާހަގަކުރެއްވިއެވެ.

“އެއަށް އަޅުގަނޑުމެންނަށް ވޯކް ކުރެވިފައި ހުރީ. ބައެއް ކޯސްތައް ވެސް ހިންގައިފިން. އޭގެތެރޭގައި އަޅުގަނޑުމެން ރާއްޖެއިން ބޭރަށް ގޮސްގެން ވެސް މެނޭޖްމަންޓް ބޭފުޅުން ފުރިހަމަކުރަންޖެހޭ ތަމްރީނުތަކާ ކަންކަން އެބަކުރިއަށް ގެންދޭ. މިސާލަކަށް އެސޯސިއޭޝަންތަކުގެ ބަޖެޓް ބެލެހެއްޓުމާއި ގެންގުޅެންޖެހޭ ކަންތައްތަކާ ގުޅޭ ވޯކްޝޮޕްތައް ވެސް އަޅުގަނޑުމެން ކުރިއަށް އެބަ ގެންދަން” ސައްތާރު ވިދާޅުވިއެވެ. އެހެންކަމުން، އެސޯސިއޭޝަންތަކުގެ ހިންގުން ހަރުދަނާކުރުމަށްޓަކައި އެމްއޯސީ އާއި ކުޅިވަރު ވުޒާރާއިން ގުޅިގެން މުހިންމު މަސައްކަތްތަކެއް ކުރެވޭކަމަށް ގަބޫލުކުރައްވާކަމަށް ވެސް ސައްތާރު ވިދާޅުވިއެވެ. މިގޮތަށް މިކަން ނުކުރާނަމަ އެތުލީޓުންގެ ޑިވެލޮޕްމަންޓަށް ވެސް އެކަމުގެ ނުރަނގަޅު އަސަރުކުރާނެކަން އޭނާ ފާހަގަކުރެއްވިއެވެ.

ސައްތާރު ފާހަގަކުރެއްވި ގޮތުގައި ކުރިއަށް އޮތް ދުވަސްތަކުގައި ރާއްޖޭގެ ކުޅިވަރު އެސޯސިއޭޝަންތައް ފެންނާނީ ހިންގުމުގެ ނިޒާމް ހަރުދަނާ، ހިންގުންތެރި، ޤާބިލް މެނޭޖްމަންޓުތަކެއް އޮތް އެސޯސިއޭޝަންތަކެއްގެ ގޮތުގައެވެ. ޙާއްސަ ގޮތެއްގައި މިހާރަށްވުރެ މާ ރަނގަޅަށް ކުރިއަށް އޮތްތަނުގައި އެސޯސިއޭޝަންތަކުގެ ބަޖެޓު ބެލެހެއްޓުމުގެ ކަންކަން ކުރިއަށްދާތަން ފެންނާނެކަމަށް ސައްތާރު ވިދާޅުވިއެވެ.