“މަޝްރޫޢުތައް ހަވާލުކުރަނީ ކުންފުނިތަކުގެ ފަންނީ ޤާބިލު ކަމަށް ބަލައިގެން”

Read Time:5 Minute, 10 Second

(ފޮޓޯ ކްރެޑިޓްސް: އެމްއޭސީޢެލް)

ސަރުކާރުން މިހާރު ތަރައްޤީގެ މަޝްރޫޢުތައް ކުރިއަށްގެންދަވަނީ އެ މަސައްކަތްތައް ހިންގޭނެ ފަދަ ފަންނީ އަދި މާލީ ޤާބިލުކަން ހުރި ކުންފުނިތަކާ ހަވާލުކުރައްވައިގެން ކަމަށް މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވެއްޖެއެވެ. ހއ. ދިއްދޫ އެއާޕޯޓާއި، ބޯހިޔާވަހިކަމުގެ މަޝްރޫއުތަކުގެ އިތުރުން ބިން ހިއްކުމުގެ އަމަލީ މަސައްކަތް ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރައްވާ މަސައްކަތުގެ ނަތީޖާ މިހާރު ފެންނަމުންދާ ކަމަށެވެ.

ވަޒީރު ވިދާޅުވީ މާޒީގައި ކަންކަން ހިނގާފައިވާ ގޮތަށް ބަލާއިރު، ބައެއް މަޝްރޫޢުތަކަކީ އެންމެ ފައިދާހުރި ގޮތަށް ކުރިއަށްގެންގޮސްފައިވާ ކަންކަން ނޫން ކަމަށެވެ. އަދި ރާއްޖޭގައި މީގެ ކުރިން އެޅި ގިނަ އެއަރޕޯޓުތަކަކީވެސް އެއްވެސް ޕްލޭނެއް ނެތި، ހިންގޭނެ ގޮތެއް ނުބަލައި އަޅާފައިވާ ތަންތަން ކަމަށާއި، އޭގެ ސަބަބުން ދައުލަތުގެ ބަޖެޓަށް ބޮޑެތި ބުރަތަކެއް އުފުލަން ޖެހުނުކަން ވަޒީރު ފާހަގަކުރެއްވިއެވެ.

(ފޮޓޯ ކްރެޑިޓްސް: އެމްއޭސީއެލް)

“އަޅުގަނޑު ހަނދާންއެބަހުރީ 2014 ވަނަ އަހަރު އަޅުގަނޑު ޓޫރިޒަމް މިނިސްޓަރުކަން ކުރެއްވިއިރު އޭރު ގިނަ އެއަރޕޯޓުތައް ހިންގަމުންދިޔައީ ސިވިލް އޭޝިވޭޝަންގެ ދަށުން. ސަރުކާރުން ބަޖެޓު ދީގެން އެއަރޕޯޓުތައް ހިންގަމުން ދިޔައީ. ދެން ވަރަށް އުނދަގޫކޮށް އޮންނަނީ، އެތަން ހަލާކުވިޔަސް އެއްވެސް ކަމެއް ނުއެއް ކުރެވޭ” ވަޒީރު ޒަމީރު ވިދާޅުވިއެވެ. މާލީ ވަޒީރު ވިދާޅުވީ، ރައީސް ޑރ. މުޢިއްޒު މިހާރު މަޝްރޫޢުތައް ކުރިއަށްގެންދަވަނީ ސަރުކާރުގެ އެސްއޯއީތަކުގެ ހުރި ފަންނީ އަދި މާލީ ޤާބިލުކަން ބޭނުންކުރައްވައިގެން ކަމަށެވެ. މިސާލެއްގެ ގޮތުން އެމްއޭސީއެލް ފާހަގަކުރައްވައި ވަޒީރު ވިދާޅުވީ، އެ ކުންފުންޏަކީ މިހާރުވެސް ކާމިޔާބު މަޝްރޫޢުތަކެއް ހިންގާފައިވާ، އެކަމުގެ ޤާބިލުކަން ހުރި ކުންފުންޏެއް ކަމަށެވެ.

ވަޒީރުގެ ވާހަކަފުޅު ނިންމަވާލައްވަމުން ވިދާޅުވީ، މާޒީގައި ކަންކަން ހިނގާފައިވާ ގޮތަށް ބަލައިގެން ރައީސް ޑރ. މުޢިއްޒު ކުރައްވާ ކަންކަމާ މެދު ސުވާލު އުފެއްދޭނެ ޖާގައެއް މިހާރު ނެތް ކަމަށެވެ. އަދި ރައީސަކީ ދުރު ވިސްނުންފުޅާއެކު، ކަންކަން ވަރަށް ޤާބިލުކަމާއެކު ކުރައްވާ ބޭފުޅެއް ކަމަށްވެސް މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރު ވިދާޅުވިއެވެ. ސަރުކާރުން ދަނީ އެސްއޯއީތަކުގެ ގާބިލުކަން އިތުރުކުރުމަށް ތަފާތު އެކި މަސައްކަތްތައް މިހާރުވެސް ކުރަމުންނެވެ. މީގެ އިތުރުން، އަމިއްލަ ކުންފުނިތަކުގެ ގާބިލުކަން އިތުރުކުރުމަށް އެކުންފުނިތާކާއި ގުޅިގެންވެސް ތަފާތު އެކި މަސައްކަތްތައް ދަނީ ކުރަމުންނެވެ.