ކޯޑް އޮފް އެތިކްސް

މާދަމާ ނިއުސްގައި ނޫސްވެރިކަން ކުރިއަށް ގެންދެވޭއިރު، އިސްލާމް ދީނުގެ އަގުތަކަށާއި، ދިވެހިރާއްޖޭގެ ޤާނޫނުއަސާސީއަށާއި، ޤައުމީ ޤާނޫނުތަކަށް އިޚްލާޞްތެރިކަމާއި ޒިންމާދާރުކަމާއެކު އިޙްތިރާމް ކުރެއެވެ. އެ ނޫސްވެރިންގެ މަޤްޞަދަކީ ނަޒާހަތްތެރިކަމާއި ޕްރޮފެޝަނަލްކަމާއެކު ޢާންމު ރައްޔިތުންގެ މަޞްލަޙަތު ރައްކާތެރިކޮށް، މީޑިއާއަށް އޮންނަ އިތުބާރު ވަރުގަދަކޮށް، މުޖުތަމަޢަށް ހެޔޮ ބަދަލެއް ގެނައުމުގައި ހިއްސާކުރުމެވެ.

މާދަމާ ނިއުސްގެ ކޮންމެ ނޫސްވެރިއަކުވެސް މަސައްކަތްކުރަނީ ތިން އަސާސީ އުޞޫލެއްގެ މަތިންނެވެ؛ ޙަޤީޤަތްތައް ސީދާކޮށް އަދި ސާފުކޮށް ރިޕޯޓުކޮށް، އެއްވެސް ދިމާލަކަށް ބުރަވުމެއް ނެތި ނުވަތަ ތަޢައްސުބެއް ނެތި ހުރިހާ ފަރާތްތަކުގެ މަޢުލޫމާތު ހުށަހަޅައި، ނުފޫޒުތަކަށް ނުގޮވައި އެޑިޓޯރިއަލް މިނިވަންކަން ދިފާޢުކުރުމެވެ.

މި އަސާސުތައް ދެމެހެއްޓުމަށްޓަކައި، ނޫސްވެރިން މަޢުލޫމާތު ޝާއިޢުކުރުމުގައި ޞައްޙަކަމާއި ކަށަވަރުކުރުމަށް ސަމާލުވެ، ސިޔާސީ ޕާޓީތަކުން ވަކިވެފައި ދެމިތިބެ، ސޯޝަލް މީޑިއާގައިވެސް ސިޔާސީ ފިކުރުތަކަށް ތާއީދުކުރުމުން ދުރުހެލިވާން ޖެހެއެވެ. މަޢުލޫމާތުގެ މަސްދަރު ހާމަކުރެވޭނެ ކޮންމެ ފަހަރަކު އެ މަސްދަރެއް ހާމަކޮށް، އަމިއްލަވަންތަ މަޢުލޫމާތު ހާމަކުރަނީ ޢާންމު މަޞްލަޙަތަށް ކޮންމެހެން ބޭނުންވާ ހާލަތްތަކުގައި ނުވަތަ ހުއްދަ ނެގުމަށްފަހުއެވެ. މަޢުލޫމާތު އެއްކުރުމުގައި ވަޒީފާ ސާފުކޮށް ބަޔާންކޮށް، އޮޅުވާލުމުން ދުރުހެލިވެއެވެ. އިންޓަވިއު ރެކޯޑުކުރަނީ އިންޓަވިއު ކުރެވޭ ފަރާތުގެ ހުއްދައާއި އެނގުމާއެކުއެވެ. ބަހުރުވައާއި ހުށަހެޅުމުގައި ސާފު، ޕްރޮފެޝަނަލް އަދި ފަސޭހައިން ދޭހަވާ ބަހުރުވައެއް ބޭނުންކޮށް، ޚަބަރު ރިޕޯޓުކުރުމުގައި އަމިއްލަ ރައުޔުތަކާއި ބުރަވުންތަކުން ދުރުހެލިވެއެވެ.

ނޫސްވެރިންގެ އިޚްލާޞްތެރިކަމާއި މިނިވަންކަން ދެމެހެއްޓުމަށްޓަކައި، އެއްވެސް ސިފައެއްގައި އަތްމަތި ބަދަލާއި، ދޮށާއި، ނުފޫޒުތައް ބަލައިނުގަނެ، އަމިއްލަ ފައިދާއަށްޓަކައި ޕްރޮފެޝަނަލް ބާރުތަކުގެ ނާޖާއިޒު ފައިދާ ނުނަގައެވެ. ކުޑަކުދިންނާ ގުޅޭ ރިޕޯޓުތަކުގައި އެކުދިންގެ ވަނަވަރު ހާމަނުކޮށް، އެކުދިންގެ ކަރާމަތާއި ރީތި ނަން ރައްކާތެރިކުރެއެވެ. ޒިންމާދާރުކަމާއެކު ކޮންޓެންޓު ޝާއިޢުކުރުމުގައި ހިސާބުކުރުމާއި، ޖިންސީ ގޯނާކުރުމާއި، އަޚްލާޤީ ނޫން ޢަމަލުތަކަށް ހިތްވަރުދޭ މައްސަލަތައް ހިމަނައިގެން މަޢުލޫމާތު ޝާއިޢުނުކުރެއެވެ. އަދި ނުރައްކާތެރި އަނިޔާތަކާއި ގެއްލުންތައް ދައްކުވައިދޭ ގްރެފިކް ފޮޓޯ ނުވަތަ ވީޑިއޯތައް ޝާއިޢުނުކުރެއެވެ.

ކުއްތައް އަވަހަށް ރަނގަޅުކޮށް، އެހެން މަސްދަރުތަކުން ނަގާފައިވާ ފޮޓޯ ނުވަތަ ވީޑިއޯ ބޭނުންކުރާނަމަ އެ މަސްދަރުތަކަށް އިޝާރާތްކުރެއެވެ. ވިޒުއަލް ކޮންޓެންޓު ބޭނުންކުރާއިރު، އެއީ މަޢުލޫމާތާ ގުޅޭ ތަކެއްޗަށްވެފައި، އެއާގުޅޭ ލިޔުންތައް ޢަދުލުވެރިކަމާއެކު އަދި އިޙްތިރާމާއެކު ލިޔެފައިވެއެވެ. ނޫސްވެރިކަމުގެ ހުރިހާ މަސައްކަތެއްގައި ޒިންމާދާރުކަމާއި، ޕްރޮފެޝަނަލްކަމުގެ އެންމެ މަތީ ފެންވަރު ދެމެހެއްޓުމަށް މަސައްކަތްކުރާ އިރު، ވާދަވެރި މީޑިއާ އުފައްދާ ކޮންޓެންޓްތަކަށް ހިތްވަރުދިނުން ނުވަތަ ފުޅާކުރުމުން ދުރުހެލިވެއެވެ.

މި ސުލޫކީ މިންގަނޑު ކަނޑައަޅާފައިވަނީ މާދާމާ ނިއުސްގެ ބާނީ ނޫސްވެރިންގެ ބަޔަކާ ގުޅިގެންނެވެ. މުސްތަޤްބަލުގައި މި ކޯޑަށް ބަދަލެއް ގެނައުމަށްޓަކައި، އެ ވަގުތު މާދަމާ ނިއުސްގައި ފުރިހަމަ ވަގުތަށް މަސައްކަތްކުރާ ނޫސްވެރިންގެ ތިންބައިކުޅަ ދެބައިގެ ހުއްދަ ބޭނުންވާނެއެވެ.