Read Time:5 Minute, 43 Second
(ފޮޓޯ ކްރެޑިޓްސް: މިހާރު)
ނަޝީދާއި އިބޫ ބައްދަލުކުރެއްވީ އެބޭފުޅުންގެ މެދުގައި ހުރި ޚިޔާލު ތަފާތުވުންތައް ނައްތާލައި، އެމް.ޑީ.ޕީ އަލުން ދިރުވައި ހަރުދަނާކުރުމަށް ކަމަށް ބުނެވުނު ނަމަވެސް، މި ބައްދަލުވުމަކުން ސިޔާސީ މަސްރަޙަށް މުހިންމު ބަދަލެއް އައިސްފައެއް ނުވެއެވެ. ރައީސް ޑރ. މުޙައްމަދު މުޢިއްޒު ގެންދަވަނީ ޤައުމީ ވެރިކަމެއް ޤާއިމުކުރައްވައި، ވެރިކަން ހިންގުން ވަރުގަދަކުރައްވައި، ރައްޔިތުންނަށް ފެންނަ ފަދަ ތަރައްޤީގެ މަސައްކަތްތައް ކުރައްވަމުންނެވެ.
މި ބައްދަލުވުމަކީ އެމް.ޑީ.ޕީގައި ދިގު މުއްދަތަކަށް ހުރި ފުން ބައިބައިވުންތަކުގެ ރަމްޒެކެވެ. މިދިޔަ ރިޔާސީ އިންތިޚާބުގެ ކުރިން އެބޭފުޅުންގެ މެދުގައި އުފެދުނު ބައިބައިވުމުގެ ސަބަބުން ޕާޓީ ބަލިކަށިވެ، ރައީސް މުޢިއްޒުއަށް ބޮޑު ކާމިޔާބީއެއް ހޯއްދެވުމަށް މަގުފަހިވިއެވެ. އޭގެފަހުން ޕާލިމެންޓް އިންތިޚާބުގައި އެމް.ޑީ.ޕީއަށް ލިބުނު ބޮޑެތި ނާކާމިޔާބީތަކުން ދައްކުވައިދިނީ، ޕާޓީގެ ދެބަސްވުންތަކާއި ގުޅިގެން މަސައްކަތް ނުކުރެވުމުން ރައްޔިތުން ނުރުހުން އެޕާޓީއަށް ރައްދުވެ، ޤައުމަށްޓަކައި ގުޅިފައިވާ ސާފު ފިކުރެއް ހުށަހަޅަން އެ ޕާޓީ ނުކުޅެދިފައިވާކަމެވެ. ރައީސް މުޢިއްޒުގެ ސަރުކާރުން އިސްކަންދެއްވަނީ ޤައުމީ ތަރައްޤީއާއި، ބޯހިޔާވަހިކަމުގެ މަޝްރޫޢުތަކާއި، އިޤްތިޞާދު ކުރިއެރުވުމަށެވެ. އަދި އެމަނިކުފާނު ވަނީ ދިވެހިރާއްޖޭގެ މިނިވަންކަމާއި ސިޔާދަތު ރައްކާތެރިކުރައްވައި، ވަރަށް ދުރުވިސްނޭ ބައިނަލްއަޤްވާމީ ސިޔާސަތެއްގެ މައްޗަށް ވެރިކަން އެކުލަވާލާފައެވެ. އެމް.ޑީ.ޕީ ފެކްޝަންތަކުގެ ތެރޭގައި ތާށިވެފައިވާއިރު، ރައީސް މުޢިއްޒުގެ ވެރިކަމުން ވަނީ ދެމިހުރުމާއި، ސިޔާސީ ހަމަޖެހުން ޤާއިމުކުރައްވައި، ރައްޔިތުންނާއި، އިންވެސްޓަރުންނަށް ވެސް އިތުބާރު ހޯދައިދެއްވައިފައެވެ.
ނަޝީދާއި އިބޫގެ މި ބައްދަލުވުމަކީ ވަގުތު ފާއިތުވެފައިވާ އަދި އެހާ އަސަރެއް ނުކުރާ ބައްދަލުވުމެކެވެ. އެބޭފުޅުންގެ މެދުގައި އާންމުކޮށް ހިނގާފައިވާ ދެބަސްވުންތަކާއި، ޕާޓީ ބައިބައިކުރެއްވުމުގެ ތާރީޚުގެ ސަބަބުން، މި ގުޅުމުގެ ދެމިހުރުމާމެދު ޝައްކުތައް އުފެދެއެވެ. “ދަ ޑިމޮކްރެޓްސް” ޕާޓީ އުފެއްދެވުމާއި އޭގެފަހުން އެހެން ޕާޓީތަކަށް މެންބަރުން ބަދަލުވުމުން އެމް.ޑީ.ޕީގެ ތެރޭގައި އިތުބާރު ގެއްލިފައިވާކަން ވަނީ ހާމަވެފައެވެ. ނަޝީދު މި އަހަރުގެ ކުރީކޮޅު އެނބުރި ވަޑައިގަތް ކަމުގައިވީ ނަމަވެސް، ޕާޓީގެ އަސާސީ ހާލަތަށް މާބޮޑު ބަދަލެއް އައިސްފައެއް ނުވެއެވެ.
ނަޝީދާއި އިބޫ 2028 ވަނަ އަހަރުގެ ރިޔާސީ އިންތިޚާބާ ބެހޭ ގޮތުން ވާހަކަ ދައްކަވަން ދެކޮޅު ހެއްދެވި ނަމަވެސް، އެބޭފުޅުންގެ ހަނު ހުރުމުން އެމް.ޑީ.ޕީގެ ލީޑަރޝިޕްގައި ހުސްކަމެއް ހުރިކަން ހާމަވެއެވެ. ނަޝީދާއި އިބޫގެ ބައްދަލުވުމަކީ ބޮޑު ސިޔާސީ ޙަބަރަކަށް ވެދާނެއެވެ. ނަމަވެސް، ސިޔާސީ މަސްރަޙަށް މާބޮޑު ބަދަލެއް މިކަމުން ނާދެއެވެ. ރައީސް މުޢިއްޒުގެ ސަރުކާރުން ދައްކުވައި ދެމުން މިގެންދަވަނީ ރައްޔިތުންނަށް ހެޔޮ ބަދަލު ގެނެސްދެވޭނީ ހަރުދަނާ ވެރިކަމަކާއި، ހަމަޖެހުމާއި، ތަރައްޤީއިން ކަމެވެ. ކުރީގެ ގުޅުންތައް އަލުން އައުކޮށްގެން ނޫން ކަމެވެ.
Happy
100 %
Sad
0 %
Excited
0 %
Sleepy
0 %
Angry
0 %
Surprise
0 %
0
0