Read Time:2 Minute, 49 Second
(ފޮޓޯ ކްރެޑިޓްސް: ޕޮލިސް)
ފުލުހުން ވިދާޅުވީ މާލޭގައި މަސްތުވާތަކެތީގެ ވިޔަފާރިކުރާ 30 ތަނެއް ފާހަގަކުރެވިފައިވާ ކަމަށާއި، މި އަހަރު އެއިގެ ތެރެއިން 11 ތަން ބަންދުކޮށްފައިވާ ކަމަށެވެ. އަދި މިހާރުވެސް 20 އެއްހާ ތަން މާލޭގައި ހިންގަމުންދާ ކަމަށް ލަފާކުރެވޭ ކަމަށާއި، މިތަންތަނަށް ފުލުހުން އަބަދުވެސް އޮޕަރޭޝަންތައް ހިންގައި ބަލަމުންދާ ކަމަށް ޗީފް އިންސްޕެކްޓަރ އޮފް ޕޮލިސް ފާތިޙް މުޙައްމަދު ވިދާޅުވިއެވެ. މަސްތުވާތަކެއްޗާ ދެކޮޅަށް ރާއްޖޭގެ އެކި ހިސާބުތަކުގައި ފުލުހުން ހިންގާފައިވާ އޮޕަރޭޝަންތަކުގެ ތެރެއިން މި އަހަރުގެ ޖެނުއަރީ މަހުން މި މަހުގެ 20 ވަނަ ދުވަހާ ހަމައަށް 498.99 ކިލޯގެ މަސްތުވާތަކެއްޗާއި 6860 ފުޅި ނުވަތަ ދަޅުގެ ބަނގުރާ އަތުލައިގަނެވިފައިވެއެވެ. މި ތަކެތީގެ މަގުމަތީ އަގު 975 މިލިއަން ދިވެހި ރުފިޔާއަށް ވުރެ ގިނަ ކަމަށް ފުލުހުން ފާހަގަކުރައްވައެވެ.
މީގެ އިތުރަށް، މަސްތުވާތަކެއްޗާ ގުޅޭގޮތުން ހިންގި 188 އޮޕަރޭޝަންގައި 16024 މީހުންނާ ސުވާލުކޮށް، 997 މީހަކު ފުލުހުންގެ ބެލުމުގެ ދަށަށް ގެނެސްފައިވެއެވެ. މި މީހުންގެ ތެރެއިން 137 ބިދޭސީން ވަނީ އިމިގްރޭޝަނާ ހަވާލުކޮށް ރާއްޖެއަށް އަނބުރާ ނާދެވޭ ގޮތަށް ފޮނުވާލާފައެވެ. އަދި 301 މީހަކު ޑްރަގް ކޯޓު މެދުވެރިކޮށް ފަރުވާއަށް ފޮނުވާފައި ވެއެވެ. ފުލުހުން ވިދާޅުވީ މާލެއާއި އަތޮޅުތަކުގައި ކުއްޔަށް ތަންތަން ހިފައިގެން މަސްތުވާތަކެތީގެ ވިޔަފާރިކުރާ ފަރާތްތައް ހުއްޓުވުމަށް ކުރިއަށް އޮތްތާނގައިވެސް އޮޕަރޭޝަންތައް ކުރިއަށްގެންދާނެ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0