ބޭރު ޤައުމުތަކުގައި ތިބެގެން ރާއްޖެއަށް މަސްތުވާތަކެތި ފޮނުވާ މައްސަލަތަކެއް!

Read Time:3 Minute, 15 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ފުލުހުންގެ ތަހުޤީގުތަކުން ހާމަވެފައިވާ ގޮތުގައި، ރާއްޖެއިން ބޭރުގައި، ޚާއްސަކޮށް ތައިލޭންޑާއި މެލޭޝިއާ ފަދަ އަވަށްޓެރި ޤައުމުތަކުގައި ދިވެހިން ތިބެގެން ރާއްޖެއަށް މަސްތުވާތަކެތި އެތެރެކުރަމުން އެބަދެއެވެ. ޑްރަގް އެންފޯސްމަންޓުގެ ވެރިޔާ، ޗީފް އިންސްޕެކްޓަރ އޮފް ޕޮލިސް އަޙްމަދު ނާއިފް ވިދާޅުވީ މިކަމުގައި މިހާތަނަށް ތިން ދިވެއްސަކު ފާހަގަކުރެވިފައިވާ ކަމަށާއި، އެމީހުންގެ ތެރޭގައި ޖިނާއީ ރެކޯޑު އޮތް މީހުން ހިމެނޭ ކަމަށެވެ.

މަސްތުވާތަކެތި އެތެރެކުރަނީ އެއަރ އަދި ސީ ކާގޯ މެދުވެރިކޮށް އަދި އިލެކްޓްރިކް ސާމާނުގެ ތެރޭގައި ފޮރުވައިގެންނެވެ. ނާއިފް ވިދާޅުވީ، ދުނިޔޭގެ ކޮންމެ ތަނެއްގައި ވިޔަސް މިފަދަ ކުށް ކުރާ ދިވެހިން އިންޓަޕޯލް ރެޑް ނޯޓިސް ނެރެގެންވިޔަސް ރާއްޖެ ގެނެސް ތަހުޤީގު ހިންގާނެ ކަމަށާއި، މިކަމުގައި އަވަށްޓެރި ޤައުމުތަކާއި ބައިނަލްއަޤްވާމީ ޖަމިއްޔާތަކުގެ އެހީ ހޯދަމުންދާ ކަމަށެވެ. މީގެ އިތުރުން، ފުލުހުން ވަނީ ވަޒީފާއެއް ނެތި ތިބި ސްކޫލް ދަރިވަރުންނަށް އަމާޒުކޮށް ސޯޝަލް މީޑިއާ ގްރޫޕްތަކުގައި މަސްތުވާތަކެތީގެ މުޢާމަލާތްތަކަށް ދައުވަތު ދެމުންދާކަން ފާހަގަކޮށް، ބެލެނިވެރިން ސަމާލުވުމަށް އިލްތިމާސްކޮށްފައެވެ. މިކަން ހުއްޓުވުމަށް ސައިބަރ ސެންޓަރާ ގުޅިގެން މަސައްކަތް ކުރަމުންދާ ކަމަށްވެސް ވިދާޅުވިއެވެ. މަސްތުވާތަކެތީގެ 648 މައްސަލައެއް މިހާރު ތަހުޤީގު ކުރަމުންދާ އިރު، އޭގެ ތެރެއިން 335 މައްސަލަ ދައުވާ ކުރުމަށް ޕީޖީއަށް ފޮނުވާފައިވެއެވެ. ޑްރަގް ކޯޓުގައި އެއް މީހެއްގެ މައްޗަށް ގިނަ މައްސަލަތައް ކުރިއަށްދާތީ، ހެއްކާ ގަރީނާ ހުރިނަމަވެސް ބައެއް މައްސަލަތައް ދައުވާއަށް ފޮނުވުމުގެ އިޚްތިސާސް ނެތް ކަމަށް ފުލުހުން ބުނެއެވެ.