Read Time:4 Minute, 12 Second
އިނގިރޭސި ޕްރިމިއާ ލީގުގައި ރޭ ލީޑްސް ޔުނައިޓެޑް އާއި ދެކޮޅަށް ޗެލްސީ ކުޅުނު މެޗުން 3-1 ގެ ނަތީޖާއަކުން ޗެލްސީ ބަލިވެއްޖެ އެވެ. ރަށުން ބޭރުގައި ޗެލްސީ ކުޅުނު މި މެޗަށް އެ ޓީމު ނިކުތްއިރު ކޯޗު އެންޒޯ މަރެސްކާ ވަނީ ޓީމަށް ގިނަ ބަދަލުތަކެއް ގެނެސްފަ އެވެ. އެގޮތުން ކެޕްޓަން ރީސް ޖޭމްސް އާއި ޕެޑްރޯ ނެޓޯގެ އިތުރުން އަލެހަންދްރޯ ގަރްނާޗޯ މެޗު ފަށާފައިވަނީ ބެންޗުންނެވެ. މި މެޗަށް ލީޑްސް އަމިއްލަ ދަނޑުގައި ނިކުތްއިރު އެ ޓީމު އެންމެ ފަހުން ކުޅުނު ހަތަރު މެޗުންވެސް ވަނީ ބަލިވެފަ އެވެ. އަދި މި ނަތީޖާ އާއިއެކު ލީގު ހޯދުމުގެ ރޭހަށް އެރުމަށް ޗެލްސީ އަށް ވަނީ އިތުރު ދަތިތަކާއި ކުރިމަތިލާން ޖެހިފަ އެވެ.
ލީޑްސް އިން މި މެޗުގައި ކުރި ހޯދާފައިވަނީ މެޗުގެ ހަވަނަ މިނިޓުގައި އެ ޓީމަށް ލިބުނު ޕެނަލްޓީއެއް ކެޕްޓަން ސްޓޭޗް ނަގައިދިން ވަގުތު އޭރިޔާ ތެރޭގައި ހުރެ ޖަކާ ބިޖޯލް ބޮލުން ޖަހާ ގޯލުގެ ތެރެއަށް ފޮނުވާލައިގެންނެވެ. އަދި މެޗުގެ ފުރަތަމަ ހާފުގެ ކުޅުން ނިމެން ދެ މިނިޓަށް ވެފައިވަނިކޮށް އައޯ ޓަނާކާ ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފަ އެވެ. މެޗުގެ ދެވަނަ ހާފަށް ނިކުތްއިރު ޗެލްސީގެ ކޯޗު އެންޒޯ މަރެސްކާ ވަނީ އެ ޓީމަށް ބަދަލުތަކެއް ގެނެސްފަ އެވެ. އެގޮތުން ބަޑިއަޝޭލް އާއި އެސްޓެވާއޯ ވިލިއަމްސްގެ ބަދަލުގައި މާލޯ ގުސްޓޯ އާއި ޕެޑްރޯ ނެޓޯ ވަނީ ކުޅެން އަރުވާފަ އެވެ. އަދި އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާއި ދުރުގައި ހުރި ކޯލް ޕާމާ ވަނީ މެޗުގެ 61 ވަނަ މިނިޓުގައި ލިއާމް ޑެލަޕްގެ ބަދަލުގައި ކުޅެން އަރުވާފަ އެވެ. ޗެލްސީ އިން މި މެޗުގައި ލަނޑު ޖަހާފައިވަނީ މެޗުގެ ދެވަނަ ހާފުގެ ކުޅުން ފެށުނުތާ ފަސްވަނަ މިނިޓުގައި ޕެޑްރޯ ނެޓޯ ކާމިޔާބުކޮށްދިން ލަނޑުންނެވެ.
ލީޑްސް އިން މޮޅު ކުޅުމެއް ދައްކާފައިވާ މި މެޗުގައި އެ ޓީމުން ޖެހި ތިންވަނަ ލަނޑަކީ މެޗުގެ 72 ވަނަ މިނިޓުގައި ޗެލްސީގެ ޑިފެންޑަރުންނަށް ހެދުނު ގޯހެއްގެ ފައިދާ ނަގާ ޑޮމިނިކް ކެލްވަޓް ލެވިން ވަނީ ލަނޑެއް ޖަހާ މެޗުގެ ނަތީޖާ 3-1 އަށް ބަދަލުކޮށްފަ އެވެ. މި ނަތީޖާ އާއިއެކު ލީޑްސް އަށް ވަނީ 14 މެޗުން ލިބިފައިވާ 14 ޕޮއިންޓާއެކު ރެލިގޭޝަން ޒޯނުން ސަލާމަތްވެ ތާވަލުގެ 17 ވަނަ މަގާމް ލިބިފަ އެވެ. ޗެލްސީ އަށްލިބިފައިވާ 24 ޕޮއިންޓާއެކު އެ ޓީމު އޮތީ ތާވަލުގެ ހަތަރުވަނައިގަ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0