Read Time:4 Minute, 15 Second
އޭނާ އަށް ވަޒީފާގެ ބިރެއް ނެތް ކަމަށާއި ކުލަބުގެ ނަތީޖާތަކާ ބެހޭ ގޮތުން ރެއާލް މެޑްރިޑްގެ ރައީސް ފްލޮރެންޓީނޯ ޕެރޭޒްއާ މަޝްވަރާކޮށްފައިވާނެ ކަމަށް ރެއާލް މެޑްރިޑްގެ ކޯޗު ޒަބީ އަލޮންސޯ ބުނެފިއެވެ. އޭނާ މިހެން ބުނީ އެތްލެޓިކް ކުލަބާ ދެކޮޅަށް މިރޭ ކުޅޭ މެޗުގެ ކުރިން ނޫސްވެރިން ސުވާލު ކުރުމުންނެވެ. އަލޮންސޯ މިހެން ބުނި ނަމަވެސް ކުލަބުގެ ނަތީޖާތައް ގޯސްވުމުން ރެއާލް މެޑްރިޑުން ވަނީ އަންނަ ބުރާސްފަތި ދުވަހު ކުއްލި ބައްދަލުވުމެއް ބާއްވަން ނިންމައިފަ އެވެ. މިރޭގެ މެޗުން ރެއާލް މޮޅުނުވެއްޖެނަމަ އެ ބައްދަލުވުމުގައި އަލޮންސޯ މަގާމުން ވަކިކުރަން ނިންމުން ގާތް ކަމަށް ސްޕޭނުގެ ނޫސްތަކުން ބުނެ އެވެ.
ނަމަވެސް މިކަމާ ބެހޭ ގޮތުން ސުވާލު ކުރުމުން އަލޮންސޯ ބުނީ މިއީ އޭނާ އަށް އަމާޒު ކުރަންޖެހޭ ސުވާލެއް ނޫން ކަމަށެވެ. “އަހަރެން ވާނީ ރައީސްއާ ބައްދަލުކޮށްފައި ނަތީޖާތަކޭ ބެހޭ ގޮތުން. ރައީސް ހުންނެވީ ވަރަށް ޕޮޒިޓިވްކޮށް. އަހަރުމެން މަޝްވަރާ ކުރީ ނަތީޖާތައް ރަނގަޅު ކުރެވޭނެ ގޮތަކާމެދު. ކުލަބުގެ ކުޅުންތެރިންނާ ވެސް އަހަރެން ވާހަކަ ދެއްކިން. އަހަރުމެން ވާހަކަ ދެއްކީ މިހާރަށްވުރެ ބޮޑަށް އެކުވެރިވެ، އެންމެން އެކީގައި ނަތީޖާ ރަނގަޅުކޮށް، ޗޭންޖިން ރޫމުގައި ކަންކަން ރަނގަޅު ކުރެވިދާނެ ގޮތްތަކާ ބެހޭ ގޮތުން،” އަލޮންސޯ ބުންޏެވެ.
އޭނާ އަދި ބުނީ ފުޓްބޯޅައިގައި ކޮންމެ ގޮތެއް ވެސް ވެދާނެ ކަމަށާއި އެއްވެސް ކަމަކާ މެދު ޖެހިލުންވެން އޭނާ ނޫޅޭ ކަމަށެވެ. އަލޮންސޯގެ ކޯޗުކަމުގައި އެންމެ ފަހުން ކުޅުނު ތިން މެޗުން ވެސް ރެއާލް ވަނީ އެއްވަރުވެފަ އެވެ. މިކަން ގަބޫލުކޮށް އޭނާ ބުނީ އެތްލެޓިކް ކުލަބާ ދެކޮޅަށް ނަތީޖާ އަނބުރާލަން މަސައްކަތް ކުރާނެ ކަމަށެވެ. “މި ސީޒަނުގައި އަހަރުމެންނަށް އިދިކޮޅު ޓީމުގެ ދަނޑުގައި ނަތީޖާ ހޯދުން މިވަނީ އުނދަގޫވެފައި. މިއީ އެކަން ބަދަލު ކުރަން ލިބޭ ޗާންސެއް،” އަލޮންސޯ ބުންޏެވެ. އޭނާ މިހެން ބުނެފައިވާއިރު ސީނިއާ ބައެއް ކުޅުންތެރިންނާ އަލޮންސޯއާ ވަނީ މައްސަލަ ޖެހިފަ އެވެ. އަދި އޭނާ މަގާމުން ވަކިކޮށްފިނަމަ މި ސީޒަނުގެ ނިޔަލަށް ކުރީގެ ކުޅުންތެރިޔާ އަދި ކޯޗު ޒައިނުއްދީން ޒިދާނާ ޓީމު ހަވާލު ކުރަން ރެއާލްއިން ވިސްނާފައިވާ ކަމަށް ވެސް ރިޕޯޓްތައް ބުނެ އެވެ. އަދި ރެއާލްގެ ގިނަ ކުޅުންތެރިންގެ ނަޒަރުގައި ޒިދާނަކީ ކުޅުންތެރިންގެ މެދުގައި މަގުބޫލު ކޯޗެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0