އެމްޑީޕީއިން ފެނަކަ ސައީދު ދިފާއުގައި؟

Read Time:3 Minute, 54 Second

(ފޮޓޯ ކްރެޑިޓްސް: ސީއޭ މޯލްޑިވްސް)

އެމްޑީޕީ ސަރުކާރުގެ ފަހު ތިން އަހަރު ފެނަކަ ކޯޕަރޭޝަން ހިންގިއިރު ހިންގާފައިވާ ކޮރަޕްޝަންގެ މައްސަލަތައް ހިމެނޭ އޮޑިޓް ރިޕޯޓަކީ، އޮޑިޓާ ޖެނެރަލް އިބްރާހިމް ނިޔާޒީއަށް ބިރު ދައްކައިގެން ސަރުކާރުން ނެރުނު ސިޔާސީ ރިޕޯޓެއް ކަމަށް އެމްޑީޕީން ތުހުމަތުކޮށްފިއެވެ. އޮޑިޓް ރިޕޯޓްގައި ބުނެފައިވަނީ އެ ތިން އަހަރު ފެނަކައިން ދެ ބިލިއަން ރުފިޔާއަށް ވުރެ ގިނަ މުއާމަލާތް ހިންގާފައިވާއިރު، އޭގެ ތެރެއިން ބޮޑުބައި ޚަރަދުކޮށްފައިވަނީ ރަނގަޅު އުސޫލަކުން ނޫން ކަމަށެވެ. އަދި ބިލިއަނަކަށް ވުރެ ގިނަ ރުފިޔާގެ މަސައްކަތް ބިޑްކުރުމެއް ނެތި އެކި ކުންފުނިތަކާ ހަވާލުކޮށްފައިވާކަން ވެސް ފާހަގަކޮށްފައިވެއެވެ.

މި ރިޕޯޓާ ގުޅިގެން އެމްޑީޕީން ނެރުނު ބަޔާނެއްގައި ބުނީ، މިނިވަން މުއައްސަސާއެއްގެ އޮފީސް ރޭގަނޑު ހުޅުވައިގެން، ސިޔާސީ ބަޔަކު ލިޔެފައިވާ އޮޑިޓް ރިޕޯޓެއް އޮޑިޓާ ޖެނެރަލްގެ އޮފީހުން ޝާއިއުކުރުމަކީ އެ ޕާޓީން ކުށްވެރި ކުރާ ކަމެއް ކަމަށެވެ. ރައީސް މުއިއްޒު ދައުލަތުގެ ހުރިހާ ބާރެއް މުށުތެރެއަށް ނަންގަވައި، އޮޑިޓާ ޖެނެރަލްއަށް މަގާމުން ވަކިކުރާނެ ކަމުގެ ބިރު ދައްކައިގެން ރިޕޯޓުތައް ނެރެމުންދަނީ ދައުލަތުގެ އިދާރާތަކަށް ފާރަވެރިވުމުގެ ނިޒާމު ފެއިލްވެފައިވާ ކަމުގެ ހެއްކެއް ކަމަށް އެމްޑީޕީން ބުނެއެވެ.

އެމްޑީޕީން ބުނީ ގާނޫނާ ޚިލާފު އެއްވެސް ކަމެއް ކޮށްފައިވާނަމަ، އިންސާފުވެރި ޝަރީއަތަކުން ގޮތް ކަނޑައެޅުމަށް މަރުހަބާ ކިޔާ ކަމަށެވެ. ނަމަވެސް ސަރުކާރުގެ “ޕްރޮޕަގަންޑާ މެޝިނުން” ފަތުރާ ވާހަކަތަކަށް ޖަވާބުދާރީވާނީ ޝަރީއަތުގެ މަޖިލީހެއްގައި ކަމަށެވެ. އަދި މިއީ ސަރުކާރުގެ ކޮރަޕްޝަން އޮއްބާލުމަށް ސިޔާސީ ބޭނުމެއްގައި، އަންނަ އޮކްޓޯބަރު 3 ގައި ބާއްވާ އެމްޑީޕީގެ އެއްވުމަށް ލިބެމުންދާ ތަރުހީބު ފެނިގެން ނެރުނު ރިޕޯޓެއް ކަމަށް ވެސް އެމްޑީޕީން ތުހުމަތުކުރެއެވެ. މި ރިޕޯޓާ ގުޅިގެން، ފެނަކައިގެ ކުރީގެ މެނޭޖިން ޑިރެކްޓަރު އަހުމަދު ސައީދު މުހައްމަދު ކޮރަޕްޝަންގެ މައްސަލައެއްގައި މިއަދު ވަނީ ހަތަރު އަހަރަށް ޖަލަށް ލުމަށް ކުރިމިނަލް ކޯޓުން ހުކުމް ކޮށްފައެވެ.