Read Time:3 Minute, 9 Second
(ފޮޓޯ ކްރެޑިޓްސް: ފެނަކަ)
ފެނަކަ ކޯޕަރޭޝަންގެ ޚާއްސަ އޮޑިޓު ރިޕޯޓަކުން ހާމަވެފައިވާ ގޮތުގައި، 2021 އިން 2023 އާ ދެމެދު ތިން އަހަރުގެ ތެރޭގައި ޕްރޮޖެކްޓު މުވައްޒަފުންގެ ކެއުމުގެ ޚަރަދަށް ބިލު ކުރަން ޖެހޭ ވަރަށް ވުރެ އިތުރަށް 14.2 މިލިއަން ރުފިޔާ ކޮންޓްރެކްޓަރުންނަށް ދީފައިވެއެވެ. އޮޑިޓާ ޖެރެނަލްގެ އޮފީހުން ނެރެފައިވާ މި ރިޕޯޓުގައި ފާހަގަކޮށްފައިވަނީ، ފެނަކައިން މަސައްކަތް ހަވާލުކޮށްފައިވާ ކޮންޓްރެކްޓަރުންނަށް ކެއުމުގެ ޚަރަދު ދީފައިވަނީ މަސައްކަތަށް ހާޒިރުވި މުވައްޒަފުންގެ އަދަދަށް ވުރެ އިތުރަށް ބިލުކޮށްގެން ކަމެވެ. މި މައްސަލައިގައި ލިޔެކިޔުންތައް އެކަށީގެންވާ ގޮތެއްގައި ބަލަހައްޓާފައި ނުވާކަމަށް ވެސް އޮޑިޓުގައި ބުނެއެވެ.
އެންމެ ބޮޑަށް އިތުރު ޚަރަދުކުރެވިފައިވަނީ ގދ. ގައްދޫ އިންޖީނުގެ އިމާރާތުގެ މަޝްރޫޢުގައެވެ. މި މަޝްރޫޢުގައި ކެއުމަށް ޚަރަދުކުރަންޖެހޭ 4.14 މިލިއަން ރުފިޔާގެ ބަދަލުގައި 9.98 މިލިއަން ރުފިޔާ ދައްކާފައިވާއިރު، އެއީ 5.83 މިލިއަން ރުފިޔާގެ އިތުރުވުމެކެވެ. މީގެ އިތުރުން ގދ. ވިލިނގިލީ މަޝްރޫޢުގައި 1.95 މިލިއަން ރުފިޔާ އިތުރަށް ދީފައިވެއެވެ.
ފެނަކަ މެދުވެރިކޮށް ހިންގި ކޮރަޕްޝަންގެ ތުހުމަތުތައް މީގެ ކުރިން ބަލާފައި ނުވުމާއެކު، މިކަމާ ގުޅިގެން ރައީސް ޑރ. މުހައްމަދު މުއިއްޒު ވިދާޅުވީ، ކުރިއަށް އޮތް މަޖިލީހުގެ ދައުރުގައި އެސެޓް ރިކަވަރީ ބިލެއް ހުށަހަޅުއްވައި، އެ ބިލު ގާނޫނަކަށް ވުމާއެކު ވައްކަންކޮށްފައި ތިބި އެންމެންގެ ފަހަތުން ސަރުކާރުގެ އިދާރާތައް ބާރަށް ދާނެ ކަމަށެވެ. އެ ބިލުގެ މަގުސަދަކީ ކޮރަޕްޝަންގެ މައްސަލަތައް ބަލައި، ޝާމިލުވާ ފަރާތްތަކުން ބަދަލު ނެގުން ކަމަށް ވެސް ރައީސް ފާހަގަކުރެއްވިއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0