ކޮރަޕްޝަންގެ ކުރީގެ މައްސަލަތައް ބަލައި ފިޔަވަޅު އަޅަން އެސެޓް ރިކަވަރީ ގާނޫނެއް ހަދާނަން: ރައީސް

Read Time:3 Minute, 28 Second

(ފޮޓޯ ކްރެޑިޓްސް: މިހާރު)

ރައީސް ޑރ. މުހައްމަދު މުއިއްޒު ވަނީ ކުރީގެ ސަރުކާރުތަކުގެ ދުވަސްވަރު ހިންގާފައިވާ ކޮރަޕްޝަންގެ މައްސަލަތައް ބެލުމަށް “އެސެޓް ރިކަވަރީ” ގާނޫނެއް ހަދާނެ ކަމަށް ވިދާޅުވެފައެވެ. ރައްޔިތުންގެ މަޖިލީހުގެ ފަހު ދައުރަށް އަންނަ މަހު ހުޅުވުމުން މި ބިލު ފޮނުވާނެ ކަމަށް ވިދާޅުވިއެވެ. ރައީސް ވިދާޅުވީ މި ސަރުކާރުން ތަރައްގީގެ މަޝްރޫއުތައް ހިންގާއިރު، ކޮރަޕްޝަން ނައްތާލުމަށް އިސްކަންދޭނެ ކަމަށާއި، ސަރުކާރާއި ދައުލަތުގެ ތެރެއިން މި ވަބާ ނައްތާލާނެ ކަމަށެވެ. ޑިޖިޓަލައިޒް ކުރުމުގެ ބޭނުމަކީ ވައްކަމާއި ކޮރަޕްޝަން ހިންގުމުގެ ފުރުސަތު ކުޑަކުރުން ކަމަށްވެސް އެމަނިކުފާނު ވިދާޅުވިއެވެ.

މިހާރު އޮތް ނިޒާމުން ކޮރަޕްޝަންގެ ތުހުމަތުވާ މީހުންގެ އަތުން އެއްވެސް އެއްޗެއް ހޯދަން ދަތިކަން ފާހަގަކުރައްވައި، ރައްޔިތުންގެ ފައިސާ ފޮރުވައިގެން އުޅޭ މީހުންނަށް ފުރުސަތު ނުދެއްވާނެ ކަމަށް ރައީސް ވިދާޅުވިއެވެ. މަޖިލީހުން ބިލު ފާސްކުރައްވާ ދުވަހުން ފެށިގެން، މީގެ ކުރިން ބޮޑެތި ވައްކަން ކޮށްފައިވާ ހުރިހާ ފަރާތްތަކެއްގެ ފަހަތުން ވަރަށް ބާރަށް ދާނެ ކަމަށް ރައީސް ވިދާޅުވިއެވެ. އެމްޑީޕީގެ ސަރުކާރުގައި ފެނަކަ އަށް ލިބުނު ގެއްލުންތައް އޮޑިޓް ރިޕޯޓުން ފެނިވަޑައިގެންފައިވާ ކަމަށާއި، މިއީ އެތައް ސަތޭކަ މިލިއަން ރުފިޔާގެ ވައްކަން ކަމަށް ވިދާޅުވިއެވެ. އަދި މި މައްސަލަތައް އަވަސްކުރުމަށް ފުލުހުންނާއި، އޭސީސީ، އަދި ޕްރޮސެކިއުޓާ ޖެނެރަލްގެ އޮފީހަށް އަންގަވާފައިވާނެ ކަމަށް ވިދާޅުވިއެވެ.

ކޮރަޕްޝަން ނައްތާލުމަށް މަސައްކަތް ކުރާނީ އެއްވެސް މީހަކަށް ބެލުމެއް ނެތި، ކުރި އަމަލަށް ބަލައިގެން، ސިޔާސީ ނުވެ، އެންމެ އަދުލުވެރި ގޮތަކަށް ކަމަށް ރައީސް ވިދާޅުވިއެވެ. އަދި މިނިވަން މުއައްސަސާތަކާއި ޖުޑީޝަރީގެ ތެރެއަށް ނުފޫޒު ނުފޯރުއްވާނެ ކަމަށްވެސް އެމަނިކުފާނު ވަނީ ޔަގީންކަން ދެއްވާފައެވެ.