Read Time:5 Minute, 16 Second
ގައުމީ ޓީމުގެ ކުރީގެ ގޯލްކީޕަރު އިބްރާހީމް އިފްރާޙް ޢަރީފް ނިޔާވުމުގެ ހިތާމައިގައި މަރްޙޫމުގެ އާއިލާއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުޒިއްޔާ ވިދާޅުވެއްޖެއެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ ދިވެހިރާއްޖޭގެ ގައުމީ ފުޓްބޯޅަ ޓީމުގެ ގޯލްކީޕަރެއްގެ ގޮތުގައި މަގުބޫލުކަން ހޯދި ހުނަރުވެރި ކުޅުންތެރިޔާ އިފްރާޙް ނިޔާވުމުގެ ހިތާމައިގައި މަރްޙޫމުގެ އާއިލާއަށް އަދި ދިވެހި ފުޓްބޯޅައަށް ލޯބިކުރައްވާ ހުރިހާ ރައްޔިތުންނަށް ތަޢުޒިޔާ ދަންނަވާ ކަމަށެވެ. މަރްޙޫމް އިފްރާޙް ޢަރީފަށް ސުވަރުގޭގެ ދާއިމީ ނިޢުމަތް މާތްﷲ މިންވަރު ކުރެއްވުން އެދި ދުއާ ދަންނަވާ ކަމަށް ރައީސް ވިދާޅުވިއެވެ.
އިފްރާޙުގެ އާއިލާއަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފުވެސް ވަނީ ތައުޒިޔާ ދަންނަވާފައެވެ. ނައިބު ރައީސް އިއްޔެ ކުރެއްވި ޕޯސްޓެއްގައި ވިދާޅުވެފައިވަނީ ރާއްޖޭން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ގައުމީ ޓީމުގައި ހިމެނުނު ގޯލްކީޕަރު އިބްރާހީމް އިފްރާޙް ޢަރީފް (އިފުރާ) ނިޔާވި ޚަބަރު އެހީ ފުން ހިތާމައާ އެކުގައި ކަމަށެވެ. އަދި މަރްޙޫމް އިފްރާޙުގެ ލޮބުވެތި އާއިލާއަށް އިޚުލާސްތެރިކަމާއެކު ތައުޒިޔާ ދަންނަވައި، މާތްﷲ މަރްޙޫމުގެ ފުރާނަ ޖަންނަތުލް ފިރުދައުސްގައި ލައްވައި، އާއިލާއަށް ކެތްތެރިކަންދެއްވުން އެދި ދުއާކުރައްވާ ކަމަށެވެ. އިފްރާޙް ނިޔާވީ މިދިޔަ ހޯމަ ދުވަހު ސްޓްރޯކެއް ޖެހިގެން އޭޑީކޭ ހޮސްޕިޓަލްގައި ފަރުވާދެމުންދަނިކޮށް ބުރާސްފަތި ދުވަހުގެރެއެވެ. ހުކުރު ނަމާދަށްފަހު އިސްލާމީ މަރުކަޒުގައި އިފްރާޙުގެ ޖަނާޒާ ބޭއްވުމަށްފަހު މިއަދު ވަނީ އާސަހަރާގައި ވަޅުލާފައެވެ.
އިއްޔެ ގައުމީ ފުޓްބޯޅަ ދަނޑުގައި ކުރިއަށްދިޔަ ދިރާގު ދިވެހި ޕްރިމިއަރ ލީގު ފެށުމުގެ ކުރިން އިފްރާޙުގެ ހަނދާނުގައި ވަނީ ފުޓްބޯޅަ އާއިލާއިން ހަމަހިމޭންކަމުގެ ވަގުތުކޮޅެއް ގެނެސްފައެވެ. އަދި ފުޓްބޯޅަ އާއިލާގެ އެހާރާއި މިހާރުގެ ކުޅުންތެރިންނާއި ކޯޗުންނާއި އޮފިޝަލުން ވަނީ އިފްރާޙްގެ ކުއްލި ވަކިވެދިއުމާއި ގުޅިގެން އޭނާގެ އާއިލާއަށް ތައުޒިޔާ ކިޔާފައެވެ. ފުޓްބޯޅަ އާއިލާގައި އުފެދުނު ކުޅަދާނަ ކީޕަރު އިފްރާޙް ނިޔާވިއިރު އޭނާ ހުރީ ފުޓްބޯޅަ ކުޅުމާއި ދުރުގައެވެ. އެންމެ ފަހުން ސްޕޯޓްސް ފިޝިންގައި ހަރަކާތްތެރިވި އިފްރާޙް ނިޔާވީ ސްޓްރޯކެއް ޖެހި ސިކުނޑިއަށް ލޭއެޅުމުގެ ސަބަބުންނެވެ. ފުޓްބޯޅަ އާއިލާއިން ސިފަކުރާ ގޮތުގައި އިފްރާޙަކީ މޮޅު ކުޅުންތެރިއެއްގެ އިތުރުން މީހުންނަށް އޯގާތެރި ހިތްހެޔޮ އުފާވެރި މިޒާޖެއްގެ މީހެކެވެ.
އިފްރާޙް ވަނީ ރާއްޖޭގެ 19 އަހަރުން ދަށުގެ ފުޓްބޯޅަ ޓީމުގެ ކެޕްޓަންކަންވެސް އަދާކޮށްފައެވެ. އަދި ބައިނަލްއަގުވާމީ އެކި މުބާރާތްތަކުގައި އޭނާ ވަނީ ރާއްޖެ ތަމްސީލުކޮށްދީފައެވެ.
Happy
0 %
Sad
100 %
Excited
0 %
Sleepy
0 %
Angry
0 %
Surprise
0 %
0
0