Read Time:3 Minute, 53 Second
(ފޮޓޯ ކްރެޑިޓްސް: ރޮއިޓާރސް)
ފަރަންސޭސިވިލާތުގެ ކުރީގެ ރައީސް ނިކޮލަސް ސަހްކޯޒީ ފަސް އަހަރަށް ޖަލަށް ލުމަށް އެ ޤައުމުގެ ކޯޓަކުން ހުކުމްކޮށްފިއެވެ. ސަހްކޯޒީއާ ދެކޮޅަށް މި ފަދަ ހުކުމެއް އައިސްފައި މި ވަނީ އޭނާގެ ކެމްޕޭނަށް ޚަރަދު ކުރުމަށް ބޭނުންވާ ފައިސާ ލީބިޔާއިން ހޯދުމަށް ޤާނޫނާ ޚިލާފަށް މަސައްކަތްކުރެއްވުމުގެ ކުށުގައެވެ. އެއާއެކު ސަހްކޯޒީ ވެގެން ގޮސްފައި މި ވަނީ ދެވަނަ ބޮޑު ހަނގުރާމައިގެ ދުވަސްވަރަށް ފަހު ޖަލަށް ލުމަށް ހުކުމްކޮށްފައިވާ ފަރަންސޭސިވިލާތުގެ ފުރަތަމަ ރައީސްއަށެވެ.
2007ވަނަ އަހަރުގެ ރިޔާސީ އިންތިޚާބަށް ސަހްކޯޒީ ކެންޕޭނު ކުރެއްވި ދުވަސްވަރު އޭނާގެ އަރިސް ބޭފުޅުން ވަނީ ލީބިޔާއިން ކެންޕޭނަށް ފައިސާ ހޯދުމަށް މަސައްކަތްކޮށްފައެވެ. އޭރު ލީބިޔާގެ ރައީސްގެ މަޤާމުގައި ހުންނެވީ މުޢައްމަރު ޤައްޒާފީއެވެ. ޤައްޒާފީއާއެކު ސަހްކޯޒީ އެއްބަސްވުމަކާ ހަމައަށް އައިސްފައި ވަނީ 2005ވަނަ އަހަރުގެ ތެރޭގައި ކަމަށްވެއެވެ. އޭރު ސަހްކޯޒީ ހުންނެވީ ފަރަންސޭސިވިލާތުގެ ދާޚިލީ ވަޒީރުގެ މަޤާމުގައެވެ. ކެންޕޭނަށް ފައިސާ ހޯދުމަށް ހުށަހަޅާފައި ވަނީ އޭރު އެކަހެރިވެފައި އޮތް ލީބިޔާއަށް ބައިނަލްއަޤްވާމީ މައިދާނުގައި ވާގިވެރުވުމުގެ ބަދަލެއްގެ ގޮތުގައެވެ. އެ ތުހުމަތުތައް ސަހްކޯޒީ ދޮގުުކުރައްވައެވެ.
ޤައްޒާފީއާއެކު އެ ފަދަ އެއްބަސްވުމަކާ ހަމައަށް އައިސްފައިވާ ކަމުގެ އެއްވެސް ހެއްކެެއް ނެތް ކަމަށް ފަނޑިޔާރު ވެސް ވަނީ ފާހަގަކުރައްވައިފައެވެ. ނަމަވެސް 2005ވަނަ އަހަރާއި 2007ވަނަ އަހަރާ ދެމެދު ޤާނޫނާ ޚިލާފަށް ސަހްކޯޒީ ޢަމަލުކުރައްވާފައިވާ ކަމަށް ފަނޑިޔާރު ވިދާޅުވިއެވެ. އެއީ އޭނާގެ އަރިސް ބޭފުޅުން ލީބިޔާއާއެކު މަޝްވަރާތައް ކުރުމަށް އޭނާ މަގުފަހިކޮށްދެއްވާފައިވާތީ ކަމަށް ވެސް ފަނޑިޔާރު ވިދާޅުވިއެވެ.
ކޯޓުގެ ނިންމުން ސަހްކޯޒީ ސިފަކުރައްވާފައި ވަނީ ފަޟީހަތްކޮށްލުމަށް ނިންމާފައިވާ ނިންމުމެއްގެ ގޮތުގައެވެ. އޭނާ ވިދާޅުވީ އޭނާގެ ކުށެއް ނެތް ކަމަށާއި، ނުކުރާ ކަމަކަށް މަޢާފަށް ނޭދޭނެ ކަމަށެވެ. ކޯޓުގެ ނިންމުމުގެ ސަބަބުން ކޯޓުގެ މިނިވަންކަމާމެދު ސުވާލު އުފެދޭ ކަމަށް ވެސް އޭނާ ވިދާޅުވިއެވެ.
Happy
0 %
Sad
100 %
Excited
0 %
Sleepy
0 %
Angry
0 %
Surprise
0 %
0
0