Read Time:3 Minute, 6 Second
އިބްރާހީމް އިފްރާޙް ޢަރީފް އަކީ ދިވެހި ފުޓްބޯޅަ އަށް މުހިންމު ޚިދުމަތްތަކެއް ކޮށްދެއްވާފައިވާ ކީޕަރެކެވެ. 2007 ވަނަ އަހަރު ގައުމީ ކޯޗު ޖޯސެފް ޔަންކޭގެ ލަފައާއެކު، ކުރިމަގަށް ޒުވާން ޓީމެއް ބިނާކުރުމަށްފެށިއިރު، އެއް ކީޕަރަކަށް އިފްރާޙް ހިމަނައި، ސީނިއަރ ގައުމީ ޓީމުގެ ސްކޮޑުގައި އޭނާ ހިމެނުނެވެ. 2008 ވަނަ އަހަރު ރާއްޖެ ސާފް ޗެމްޕިއަންޝިޕް ކާމިޔާބުކުރިއިރު، ސްކޮޑުގައި އޭނާ ހިމެނުނު ނަމަވެސް، ފައިނަލް ޓީމުގައި ނުހިމެނުނުއިރު، ކޯޗު އޭނާއަށް މެޑަލް ހޯދައިދިނެވެ.
އޭރުގެ ޒުވާން ކުޅުންތެރިންގެ ތެރެއިން އެންމެ ސްޓައިލިޝް އެއް ކީޕަރަކަށް އޭނާ ވެފައި، ރަނގަޅު ފޯމުގައި ހުރެފިނަމަ މެޗެއް ކާމިޔާބުކުރެވޭ ފެންވަރަށް ކުޅެއެވެ. ވެލެންސިއާއިން ފެށިގެން މާޒިޔާ، ޔުނައިޓެޑް ވިކްޓަރީ، ނިއު ރޭޑިއަންޓް، އަދި ބީޖީ ސްޕޯޓްސް ފަދަ ކްލަބްތަކަށް އޭނާ ވަނީ މޮޅަށް ކުޅެދީފައެވެ. 19 އަހަރުން ދަށުގެ ކެޕްޓަންކަމާއި، 23 އަހަރުން ދަށުގެ ގައުމީ ޓީމުގެ އެއްވަނަ ކީޕަރުކަމާއި، 2011 އަދި 2013 ގެ ސާފް ޗެމްޕިއަންޝިޕްގައި ސީނިއަރ ގައުމީ ޓީމުގެ ރިޒާވް ކީޕަރެއްގެ ދައުރު އޭނާ އަދާކުރިއެވެ.
ކުރު ކެރިއަރެއް ނަމަވެސް، އޭނާ ކުޅުނު ގިނަ ޓީމުތަކަށް ކާމިޔާބު ހޯދައިދިނުމުގައި މުހިންމު ދައުރެއް އަދާކުރިއެވެ. ކުޅުން ހުއްޓާލުމަށްފަހު ސްޕޯޓްސް ފިޝިންގ އާއި އޭނާ ގުޅިފައި ހުއްޓެވެ. އިބްރާހީމް އިފްރާޙް ޢަރީފް ނިޔާވީ ސްޓްރޯކެއް ޖެހިގެން ފަރުވާދެމުންދަނިކޮށް، ވަރަށް ޒުވާން އުމުރުގައި، 36 އަހަރުގައެވެ. އޭނާގެ ކުޅުމާއި ހިތްވަރުގެ މަތިން ގިނަ ބަޔަކު ހަނދާން ހުންނާނެއެވެ. މާތް ﷲ އޭނާގެ ފުރާނައަށް ސުވަރުގޭގެ ނިއުމަތް ދެއްވައި، އާއިލާއަށް ކެތްތެރިކަން ދެއްވާށި! އާމީން.
Happy
0 %
Sad
100 %
Excited
0 %
Sleepy
0 %
Angry
0 %
Surprise
0 %
0
0