ޖަލުގައި ތިބި ފަލަސްޠީނުގެ އެތައް ހާސް ބަޔަކަށް ގަސްދުގައި ކާން ނުދޭ: ޔަހޫދީ ސުޕްރީމް ކޯޓް

Read Time:3 Minute, 49 Second

(ފޮޓޯ ކްރެޑިޓްސް: ރޮއިޓާރސް)

ޔަހޫދީ ޖަލުތަކުގައި ތިބި ފަލަސްޠީނުގެ އެތައް ހާސް ބަޔަކަށް ގަސްތުގައި ކާން ނުދޭ ކަމަށް ޔަހޫދީ ސުޕްރީމް ކޯޓުން ކަނޑައަޅައިފިއެވެ. ތިން ފަނޑިޔަރުންގެ މައްޗަށް އެކުލެވޭ ޔަހޫދީ ސުޕްރީމް ކޯޓުން މި މައްސަލަ ބަލާފައި ވަނީ ހައްޤުތަކަށް ވަކާލާތުކުރާ ޔަހޫދީ ދެ ޖަމްޢިއްޔާއެއްގެ އެދުމުގެ މަތިންނެވެ. އެ މައްސަލަ ބަލާފައި ވަނީ 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހުން ފެށިގެން ޔަހުދީން ފަލަސްޠީނުގެ ޣައްޒާއަށް ޢުދުވާނީ ޙަމަލާތައް ދެމުންދިޔަ ނަމަވެސް ފާއިތުވި 2 އަހަރެއްހާ ދުވަހުގެ ތެރޭގައި އެ މައްސަލައިގައި ސުޕްރީމް ކޯޓުން މާ ބޮޑު ބަހެއް ބުނުމެއް ނެތިއެވެ.

ޔަހޫދީ ސުޕްރީމް ކޯޓުގެ ނިންމުމުގައި ބުނީ ޒަޔަނިސްޓު އިސްރާއީލުގެ ބެލުމުގެ ދަށުގައި ތިބި ޤައިދީންނަށް ދުވާލަކު ތިންއިރު ކާބޯތަކެތި ފޯރުކޮށްދިނުމަކީ ޔަހޫދީންގެ މައްޗަށް ޤާނޫނީގޮތުން ލާމިޒުވާ ކަމެއް ކަމަށެވެ. އަދި އެ ޒިންމާ ޢަދާ ކުރުމަށް އެ ކޯޓުން ވަނީ ކަމާ ބެހޭ އިދާރާތަކަށް ޢަމުރުކޮށްފައެވެ. ޔަހޫދީ ސުޕްރީމް ކޯޓުން ވަނީ ޔަހޫދީ ދެ ޖަމްޢިއްޔާއަކުން ހުށަހަޅާފައިވާ ދެ ޕެޓިޝަނެއް ވެސް ބަލައިގަތުމަށް ނިންމައި، އެ ޕެޓިޝަންތަކުގައި ސަރުކާރުން ޤައިދީންނަށް ގަސްތުގައި ކާބޯތަކެތި ފޯރުނުކޮށްދޭ ކަމަށް ކޮށްފައިވާ ތުހުމަތަށް ތާއީދު ކޮށްފައެވެ. ޔަހޫދީން ދަނީ ޔަހޫދީ ޖަލުތަކުގައި ތިބި ފަލަސްޠީނުގެ ރައްޔިތުންގެ އިތުރުން ޣައްޒާގެ ރައްޔިތުންނަށް ކާބޯތަކެތި ލިބުން އިންތިހާއަށް ދަތިކޮށް، އެ މީހުން ގަސްތުގައި ބަނޑަށް ޖައްސަމުންނެވެ. ބަނޑުހައިހޫނު ކަމުގެ ސަބަބުން ޣައްޒާގައި ދުވާަލަކު އެތައް ބަޔަކު ދަނީ ޝަހީދުވަމުންނެވެ.

ޣައްޒާ ހަނގުރާމަ ފެށުނު ފަހުން ޔަހޫދީން ވަނީ ޣައްޒާއާއި ހުޅަނގު އައްސޭރިން ފަލަސްޠީނުގެ އެތައް ހާސް ރައްޔިތުންނެއް ޖަލަށްލައި ބަންދުކޮށްފައެވެ. އެކި ފަހަރު މަތިން މިނިވަންވެފައިވާ ޣައްޒާގެ ރައްޔިތުން ވަނީ ތޮއް ޖެހިފައިވާ ޔަހޫދީ ޖަލުތަކުގައި ޤައިދީންނަށް ކާންނުދީ، އަނިޔާކޮށް، ޞިއްޙީ ފަރުވާނުދީ ބަލިމަޑުކަމުގެ ތެރޭގައި ގެންގުޅޭ ކަމަށް ބުނެފައެވެ.