Read Time:3 Minute, 48 Second
ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުރީގެ ރައީސް ބައްސާމް އަދީލް ޖަލީލުގެ މައްޗަށް ހިންގާ އެއް ޝަރީއަތުގެ ހެކިބަސް ނެގުމުގެ މަރުހަލާ ނިމި، ދެން އޮންނާނީ ތިން އަޑުއެހުން ކަމަށް ކޯޓުން މިއަދު އަންގައިފިއެވެ. މި މައްސަލައަކީ، 2018 ވަނަ އަހަރު ފީފާއިން އެފްއޭއެމްއަށް ޖަމާކުރި ފައިސާގެ ތެރެއިން 10،000 ޑޮލަރު، ބައްސާމްގެ އަމިއްލަ އެކައުންޓަށް ޖަމާކޮށް، އޭގެ ބޮޑު ބައެއް އޭނާގެ އަދި އަންހެނުންގެ ހިއްސާ އޮންނަ ގްލޭސިއާ އިންވެސްޓްމަންޓްސްގެ ކަންކަމަށާއި، 2،000 ޑޮލަރު އޭނާ ކުއްޔަށް ނަގައިގެން އުޅުނު ރެހެންދި ފްލެޓުގެ ކުލި ދެއްކުމަށް ބޭނުންކޮށްފައިވާ ކަމަށް ދައުލަތުން ތުހުމަތުކުރާ މައްސަލައެކެވެ.
މިއަދު ކްރިމިނަލް ކޯޓުގައި ބޭއްވި އަޑުއެހުމުގައި ބައްސާމްގެ ފަރާތުން ހުށަހެޅި ހަމައެކަނި ދިފާއީ ހެކީގެ ހެކިބަސް ނެގިއެވެ. މި ހެކިއަކީ އެފްއޭއެމްގެ އެކްސްކޯ މެންބަރު އަހުމަދު ޝަކީބް (ޑޮކް) އެވެ. ޝަކީބު ހެކިބަސް ދެމުން ވިދާޅުވީ، އެފްއޭއެމްގެ އެމަޖެންސީ ކޮމިޓީން ބައްސާމަށް މަހުން މަހަށް 3،000 ޑޮލަރުގެ އެލަވަންސެއް ދިނުމަށް ނިންމާފައިވާ ކަމަށެވެ. ނަމަވެސް އެފައިސާ ގަވައިދުން ބައްސާމަށް ޖަމާކުރިތޯ ނުވަތަ ނުކުރާތޯ އެނގިވަޑައިނުގަންނަވާ ކަމަށް ވިދާޅުވިއެވެ. ކޮވިޑް-19ގެ ސަބަބުން ކުރިމަތިވި މާލީ ދަތިތަކާ ހެދި، އެކްސްކޯ މެންބަރުންނަށް ވެސް ގަވައިދުން އެލަވަންސް ނުދެވޭ ކަމަށާއި، ބައެއް ފަހަރު ދެ ތިން މަހުގެ އެލަވަންސް އެއްފަހަރާ ޖަމާކުރާ ކަމަށާއި، އޭނާއަށް ވެސް 22 މަހުގެ އެލަވަންސް އަދި ލިބިފައިނުވާ ކަމަށް ޝަކީބު ފާހަގަކުރެއްވިއެވެ.
ހެކިބަސް ނެގުން ނިމުމާ އެކު، މައްސަލަ ބައްލަވާ ގާޒީ އިސްމާއީލް ޝަފީއު ވަނީ ދެން އޮންނަ ދެ އަޑުއެހުން އިއުލާންކުރައްވާފައެވެ. އެގޮތުން، މިމަހުގެ 23 ގައި ހެއްކާ ގުޅޭ ގޮތުން ވާހަކަ ދެއްކުމަށް އަޑުއެހުމެއް އޮންނާނެއެވެ. އަދި މިމަހުގެ 29 ގައި ދެ ފަރާތުން ހުލާސާ ބަޔާން އިއްވުމަށް އަޑުއެހުން ބާއްވާނެއެވެ. ގާނޫނު ބުނާ ގޮތުން ހުލާސާ ބަޔާނަށް ފަހު މަސްދުވަހުގެ ތެރޭގައި ހުކުމް އިއްވުމަށް ލާޒިމް ކުރެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0