ވިސިލްބްލޯކުރި ކަމުގެ ތުހުމަތުގައިި މުވައްޒަފަކު ވަޒީފާއިން ވަކިކޮށްފި

Read Time:3 Minute, 41 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ހިއުމަން ރައިޓްސް ކޮމިޝަން (އެޗްއާރުސީއެމް)ގެ ދަށުން ހިންގާ ވިސިލްބްލޯވާ ޕްރޮޓެކްޝަން ޔުނިޓަށް، އޮމްބަޑްސްޕާސަންގެ އޮފީހުގެ ބައެއް މުވައްޒަފުން ވަނީ އެތަނުގެ މައްސަލަތަކެއް ހުށަހަޅާފައެވެ. މިކަމާ ގުޅިގެން، މައްސަލަތައް ފަޅާއެރުވީ އޭނާ ކަމަށް ތުހުމަތުކޮށް، ބަދަލު ހިފުމުގެ ގޮތުން މުވައްޒަފަކު ވަޒީފާއިން ވަކިކޮށްފައިވާ ކަމަށް ޔުނިޓުން ބުނެއެވެ. ޔުނިޓުން ބުނި ގޮތުގައި، މި މައްސަލަ ހުށަހެޅީ ކާކުކަން ނޭނގޭ ގޮތަށް ނަމަވެސް، އޮފީހުގެ މުވައްޒަފުން ސިއްރުކޮށް ސުވާލުކުރުމަށް ފަހު، ވަކި މުވައްޒަފަކު މައްސަލަ ފަޅާއެރުވީ ކަމަށް ތުހުމަތުކޮށް، އޭނާއަށް ނޭއްގާނީކޮށް ހެދިކަމުގެ ރިޕޯޓުތައް ލިބިފައިވެއެވެ. މިގޮތުން، މަސައްކަތުގެ މާހައުލުގައި އޭނާއާ މެދު ތަފާތުކޮށް، އެހެން މުވައްޒަފުން އޭނާއަށް ބާކީކޮށް އަޑުގަދަކޮށް އެއްޗެހި ކިޔާފައިވާ ކަމަށް ވެސް ވަނީ އެނގިފައެވެ.

އެހެންނަމަވެސް، ވަޒީފާއިން ވަކިކުރި މުވައްޒަފަކީ މައްސަލަ ފަޅާއެރުވި މީހާ ނޫން ކަމަށް ވިސިލްބްލޯވާ ޔުނިޓުން ވަނީ ޔަގީންކޮށްދީފައެވެ. ވަކިކުރުމުގެ ކުރިން، އޭނާއަކީ މަސައްކަތަށް ރަނގަޅު މީހެއް ކަމަށް ހުރި ބަޔާންތަކުން ދައްކާ ނަމަވެސް، “އަހުލާގު ހުރި ގޮތުންނާއި އެންގުންތަކަށް ނުކިޔަމަންތެރިވުމާއި އޮފީސް މާހައުލުގައި ފަސާދަ އުފެއްދުމާއި ސާބިތުނުހިފޭ ވާހަކަ ފަތުރާ ކަމަށް” ބުނެ އޮމްބަޑްސްޕާސަންގެ އޮފީހުން ވަނީ އޭނާ ވަޒީފާއިން ވަކިކޮށްފައެވެ. ޔުނިޓުން ބުނި ގޮތުގައި، ވަޒީފާއިން ވަކިކުރެވުނު މުވައްޒަފަށް ލިބުނު ގެއްލުމުގެ ބަދަލު ހޯދުމަށް ކޯޓަށް ދެވިދާނެކަން ވަނީ އަންގާފައެވެ.

މިފަދަ ކަމެއް މީގެ ކުރިންވެސް ހިނގާފައިވެއެވެ. މޯލްޑިވްސް ޕޯސްޓް ލިމިޓެޑް (ޕޯސްޓް އޮފީސް)އާ ގުޅޭ ކޮރަޕްޝަންގެ މައްސަލަތަކެއް ފެންމަތި ކުރި މުވައްޒަފަކު ވަޒީފާއިން ވަކިކުރުމުން، ވިސިލްބްލޯ ޕްރޮޓެކްޝަން ޔުނިޓުގެ އަމުރަށް ނުކިޔަމަންވި ކަމަށް ބަލައި 900،000 ރުފިޔާއިން ޕޯސްޓް އޮފީސް ވަނީ ޖޫރިމަނާކޮށްފައެވެ.