ގައުމީ ކޯޗު މޯހަންގެ ފުރަތަމަ މެޗު: ނަތީޖާއަށް ވުރެ އޭނާ އުފާކުރީ ޓީމުން ކުރި މަސައްކަތާ މެދު

Read Time:5 Minute, 39 Second

(ފޮޓޯ ކްރެޑިޓްސް: އެފްއޭއެމް)

ލަންކާއާ ދެކޮޅަށް ރާއްޖޭން ހޯދި ތިން ލަނޑުގެ ލީޑަށް ވުރެ އޭނާ އަށް މުހިންމީ ކުޅުންތެރިން ކުރި މަސައްކަތް ކަމަށް ގައުމީ ފުޓްބޯޅަ ޓީމުގެ ކޯޗު މުހައްމަދު ޝިޔާޒު (މޯހަން) ބުނެފި އެވެ. އިއްޔެގެ މެޗަކީ، މިދިޔަ މަހު ފަހުކޮޅު ރާއްޖޭގެ ކޯޗުކަމާ ހަވާލުވި މޯހަން ހެޑް ކޯޗުގެ ގޮތުގައި ރާއްޖެ ގޮވައިގެން ނުކުތް ފުރަތަމަ މެޗެވެ. ސައުތު އޭޝިއަން ސުޕަ ކަޕްގެ ނަމުގައި ލަންކާއިން އިންތިޒާމުކޮށް ރާއްޖެއާ ދެކޮޅަށް ކުޅޭ ދެ މެޗުގެ ތެރެއިން ފުރަތަމަ މެޗު ރާއްޖޭން ކާމިޔާބު ކުރީ 3-0 ންނެވެ. މެޗަށް ފަހު ވާހަކަ ދައްކަމުން މޯހަން ބުނީ މެޗުގެ ނަތީޖާ އަށް ވުރެ އޭނާ އަށް އެންމެ ބޮޑު ހިތްހަމަޖެހުމެއް ލިބެނީ ކުޅުންތެރިން ކުރި މަސައްކަތް ފެނުމުންނެވެ. އޭނާ ބުނި ގޮތުގައި ލަންކާގެ މައްޗަށް ތިން ލަނޑުން މޮޅުވިޔަސް، އެ ގައުމާ ދެކޮޅަށް ކުޅެން ފަސޭހައެއް ނުވި އެވެ. އެކަމަކު އެ ނަތީޖާ ނުކުތީ ކުޅުންތެރިން ކުރި ބުރަ މަސައްކަތުންކަން އޭނާ ފާހަގަ ކުރި އެވެ.

(ފޮޓޯ ކްރެޑިޓްސް: ފުޓްބޯލް ސްރީލަންކާ)

“ނަތީޖާ 3-0 ން ނިމުނަސް މިއީ ފަސޭހަ މެޗެއް ނޫން. މިއީ ވަރަށް އުނދަގޫ މެޗެއް. ޝްރީ ލަންކާއިން ވަރަށް ރަނގަޅަށް ކުޅުނު،” ގައުމީ ޓީމުގެ އެސިސްޓެންޓް ކޯޗުކަން ކުރި މޯހަން ބުންޏެވެ. “އެކަމަކު އަހަރެމެންގެ ކުޅުންތެރިން ވަރަށް ބުރަކޮށް މަސައްކަތް ކުރި. މުހިންމު ކަމަކީ ބުރަ މަސައްކަތް. ކުޅުންތެރިން ގާތު މެޗުގެ ކުރިން ވެސް އަހަރެން ބުނިން، ނަތީޖާއެއް ނޫނޭ އަހަންނަށް މުހިންމީކީ.” އޭނާ ބުނީ މެޗުން ކޮންމެ ނަތީޖާއެއް ނުކުތަސް ކުޅުންތެރިންގެ ބުރަކޮށް މަސައްކަތްކޮށްފިނަމަ ހިތްހަމަޖެހުން ލިބޭނެކަން މެޗުގެ ކުރިން ވެސް ކުޅުންތެރިންގެ ގާތު ބުނެފައިވާނެ ކަމަށެވެ.

“މިއަދު އެ ކުޅުންތެރިންގެ މަސައްކަތް އެންމެ މަތީ ދަރަޖައިގައި ދަނޑުމަތީގައި ދައްކައިފި. އަދި އަހަރެމެން މެޗުން މޮޅު ވެސް ވެއްޖެ. އަލްހަމްދުލިﷲ،” މޯހަން ބުންޏެވެ. ދެކުނު އޭޝިއާގެ ސުޕަ ކަޕްގެ ނަމުގައި ލަންކާއިން އެންމެ ފުރަތަމަ މަސައްކަތް ކުރީ ހަތަރު ގައުމު ބައިވެރިވާ މުބާރާތެއް އިންތިޒާމު ކުރުމަށެވެ. އެކަމަކު ފުޓްބޯލް ޝްރީ ލަންކާއިން ދައުވަތު ފޮނުވި ބައެއް ގައުމުތަކުން މުބާރާތުގައި ބައިވެރި ވެވެން ނެތްކަން އެންގި އެވެ. އޭރު ވެސް ރާއްޖޭން އޮތީ ދައުވަތު ގަބޫލުކޮށް ލަންކާ އަށް ދަތުރު ކުރާނެކަން އަންގައިފަ އެވެ.

(ފޮޓޯ ކްރެޑިޓްސް: ފުޓްބޯލް ސްރީލަންކާ)

ރާއްޖޭން ދައުވަތަށް އިޖާބަ ދިނުމުން، ލަންކާއިން ނިންމީ ރާއްޖެއާ އެކު ދެ މެޗު ކުޅެ، ދެ މެޗުގެ ނަތީޖާއިން ކުރި ހޯދާ ޓީމަކަށް ތަށި ދިނުމަށެވެ. ދެވަނަ މެޗު އޮންނާނީ އަންނަ އަންގާރަ ދުވަހު އެވެ. މިމޮޅާ އެކު ރާއްޖެ އޮތީ ތައްޓާ ވަރަށް ގާތުގައިކަން ލަންކާގެ ނޫސްވެރިޔާ ފާހަގަކޮށް ސުވާލު ކުރުމުން، މޯހަން ބުނީ މިއަދުގެ މެޗުގެ މަތިން ހަނދާން ނައްތާލަން ޖެހޭ ކަމަށެވެ. އޭނާ ބުނީ ދެވަނަ މެޗަށް ދާއިރު ފުރަތަމަ މެޗުގެ ނަތީޖާ ހިމަނަން އޭނާ ބޭނުން ނުވާ ކަމަށެވެ. “މުހިންމީ ކުރިއަށް އޮތް މެޗު،” މޯހަން ބުންޏެވެ. “އަނެއް މެޗަށް ދަންޏާ މި މެޗުގެ ނަތީޖާ އަހަރެމެން ގުނައިގެން ނުވާނެ.” އޭނާ ބުނީ ޓީމުން ސަމާލުކަން ދޭނީ ވެސް އެ މެޗަށް ކަމަށެވެ.