ސައުތު އޭޝިއަން ސުޕަ ކަޕް: ފުރަތަމަ މެޗުން ރާއްޖެއަށް ބޮޑު މޮޅެއް

Read Time:4 Minute, 17 Second

ސައުތު އޭޝިއަން ސުޕަ ކަޕް 2025 ގައި ދިވެހިރާއްޖެ އާއި ސްރީލަންކާ ބައްދަލުކުރި ފުރަތަމަ މެޗު ރާއްޖެއިން ކާމިޔާބުކޮށްފިއެވެ. ލަންކާގެ ރޭސްކޯސް އިންޓަނޭޝަނަލް ސްޓޭޑިއަމްގައި ކުޅުނު މި މެޗު ރާއްޖެއިން ކާމިޔާބުކުރީ 3-0 ލަނޑުންނެވެ. ފުރަތަމަ ހާފްގެ 27 ވަނަ މިނިޓްގައި ކޯނަރަކުން ނާއިޒު ހަސަން ކާމިޔާބުކޮށްދިން ފުރަތަމަ ލަނޑާއިއެކު ރާއްޖޭން ވަނީ ލީޑު ނަގާފައެވެ. އަދި ރާއްޖޭން ދެވަނަ ލަނޑު ޖެހީ މެޗުގެ 34 ވަނަ މިނިޓްގައެވެ. މި ލަނޑު ކާމިޔާބުކޮށްދިނީ އިބްރާހިމް މަހުދީ ހުސެއިން (ފޭދޫ އިއްބެ) އެވެ. މި ލަނޑަކީ ނާއިޒު ހަސަން އޭރިއާތެރެއަށް ވަދެ ގޯލް އެއްކޮށް ހުސްކޮށްލާފައި އިއްބެއަށް ދިން ބޯޅައަކުން އޭނާ ކާމިޔާބުކޮށްދިން ލަނޑެކެވެ.

ރާއްޖޭގެ ދެވަނަ ލަނޑު ޖެހުމުގައި އެންމެ ބޮޑު ދައުރެއް އަދާކުރި މިއަދު މެޗުގައި ފުރަތަމަ އެގާރައިން ޖާގަ ހޯދައިގެން ކުޅެމުންދިޔަ މަޝްހޫރު ފޯވާޑް އަހުމަދު ރިޒުވާން (ރިޒޭ)އެވެ. އެއީ ޓީމުގެ މެދުތެރެއިން ލަންކާ ކުޅުންތެރިން އަތުން ބޯޅަ ހޯދާފައި ލަންކާ ޑިފެންސްލައިން ފޫއަޅުވާލާ ނާއިޒުއަށް ކުޅެލި ރީތި ބޯޅައަކުން ތަނަވަސްކުރި ލަނޑެކެވެ. މެޗުގެ 91 ވަނަ މިނިޓްގައި އުމުރުން އެންމެ 16 އަހަރުގައި ރާއްޖޭގެ ޤައުމީ ޓީމަށް ކުޅެދިން ފުރަތަމަ މެޗުގައި ޒުވާން ފޯވާޑް އިލާން ވަނީ އެސިސްޓެއް ހަދާފައެވެ. ކައުންޓަރގައި ލިބުނު ބޯޅައެއް އިލާން ހިފައިގެން ކުރިއަށް ގޮސް ޖައްސާލީ ހުސްކޮށްހުރި އަލީ ފާސިރު (ސެންޓޭ) އަށެވެ. އިލާން ޖައްސާލި ބޯޅަ އެއްފަހަރުން ކީޕަރުގެ ދުރުކަނަށް ތިރި ތިރިން ފޮނުވާލި ބޯޅައާއެކު ސެންޓޭ ވަނީ ރާއްޖޭގެ ތިންވަނަ ލަނޑު ކާމިޔާބުކޮށްދީފައެވެ.

ތިން ލަނޑުގެ އެޑްވާންޓޭޖާއެކު ސުޕާ ކަޕްގެ ދެވަނަ ލެގަށް ރާއްޖެ ނިކުންނާނީ މިއަންނަ އަންގާރަ ދުވަހުއެވެ. މިމެޗަށް ނިކުތުމުގެ ކުރިން ސްރީލަންކާގެ ކޯޗު ވަނީ ފުރަތަމަ މެޗުގައި ރާއްޖެ ބަލިކޮށް ދެވަނަ މެޗުގެ ކުރިން ސުޕަ ކަޕްގެ ތަށި ޔަގީންކުރާނެކަމަށް ބުނެފައެވެ. އަދި ދިވެހިރާއްޖެ ވަރަށް ރަނގަޅަށް އިނގޭކަމަށާއި ދިވެހި ޓީމުގެ ހުރިހާ ކަމެއް ދަސްކޮށްގެން މެޗާ ކުރިމަތިލި ކަމަށްވެސް ލަންކާގެ ކޯޗު ވަނީ މެޗުގެ ކުރިން ބުނެފައެވެ. މި މެޗުން ރާއްޖެ މޮޅުވިއިރު، މިއީ މުހައްމަދު ޝިޔާޒް (މޯހަން) ޓީމާ ހަވާލުވުމަށްފަހު ރާއްޖެއިން ކުޅުނު ފުރަތަމަ މެޗެވެ. ލަންކާ އާއި ރާއްޖެ ކުޅޭ ދެވަނަ މެޗު އޮންނާނީ އަންނަ އަންގާރަ ދުވަހެވެ.