Read Time:3 Minute, 58 Second
ޤައުމެއްގެ ފުރިހަމަ މިނިވަންކަމުގެ ތާރީޚަކީ، އެ ޤައުމެއްގެ ޤައުމިއްޔަތުގެ އަސާސެކެވެ. ދިވެހިރާއްޖޭގެ މިނިވަންކަމަށް 60 އަހަރު ފުރުމާގުޅިގެން، އިނގިރޭސީންގެ ހިމާޔަތުން ނެއްޓުމަށް ކުރި މަސައްކަތުގެ މުހިންމު ފިލާވަޅުތަކެއް އަދުގެ ޖީލަށް އެބަހުއްޓެވެ. މިނިވަންކަމަކީ ޤައުމެއްގެ ރައްޔިތުންނަށް އަމިއްލަ ކަންކަން ނިންމުމުގެ ބާރު ލިއްބައިދޭ އެންމެ އަގުހުރި ނިޢުމަތެވެ. ދިވެހިރާއްޖެ އިނގިރޭސީންގެ ހިމާޔަތުގެ ދަށަށް ދިޔައީ 1887 ވަނަ އަހަރު، އިޤްތިޞާދީ އަދި ސިޔާސީ ނާޒުކު ޙާލަތަކުން ޤައުމު ސަލާމަތްކުރުމަށްޓަކައެވެ. ނަމަވެސް، 77 އަހަރުގެ ދިގު މުއްދަތެއްގައި އެތެރޭގެ ކަންކަމަށް އިނގިރޭސީންގެ ނުފޫޒު ވެއްދުމުގެ މަސައްކަތް ކުރަމުން ދިއުމުން، ދިވެހިންގެ ހިތްތަކުގައި ފުރިހަމަ މިނިވަންކަމަށް އޮންނަ ޝައުޤު އިތުރުވެގެން ދިޔައެވެ.
1965 ވަނަ އަހަރުގެ ޖުލައި މަހުގެ 26 ވަނަ ދުވަހު، ދިވެހިރާއްޖެ ފުރިހަމަ މިނިވަންކަން ހޯދިއެވެ. މި މަސައްކަތުގެ އެންމެ އިސް މޭސްތިރިއަކީ އޭރުގެ ބޮޑުވަޒީރު ސުމުއްވުލް އަމީރު އިބްރާހީމް ނާޞިރު ރަންނަބަނޑޭރި ކިލެގެފާނުއެވެ. އެމަނިކުފާނާއި އެކު މަސައްކަތްކުރެއްވި ބޭފުޅުން ވަރަށް ވަރުގަދަ ޤައުމީ ރޫޙެއްގައި، އެއްވެސް ދޫކުރުމެއްނެތި ފުރިހަމަ މިނިވަންކަމަށް ވަކާލާތު ކުރެއްވިއެވެ. މިނިވަންކަމަކީ ޤައުމެއްގެ ސިޔާދަތާއި، އިޤްތިޞާދީ އަދި އިޖްތިމާޢީ ކުރިއެރުމުގެ މައިގަނޑު އަސާސެވެ. މިނިވަންކަމުގެ ސަބަބުން ޤައުމުގެ ވަސީލަތްތައް ބޭނުންކުރުމުގެ ބާރާއި އިޚްތިޔާރު ލިބި، ބޭރުގެ ނުފޫޒުތަކުން ސަލާމަތްވެ، ޤައުމީ މަޞްލަޙަތު ޙިމާޔަތްކުރެވެއެވެ. މި މިނިވަންކަމަކީ ދިވެހި އެތައް ބަޠަލުންގެ ޤުރުބާނީގެ ނަތީޖާއެވެ.
ޤައުމިއްޔަތު ދެމެހެއްޓުމަށްޓަކައި މިނިވަންކަން ދެމެހެއްޓުމަކީ މުހިންމު ކަމެކެވެ. މިއަދުގެ ޖީލު މިނިވަންކަން ދެމެހެއްޓުމަށްޓަކައި ޤައުމިއްޔަތުގެ އަސާސްތައް ކަމުގައިވާ އިސްލާމްދީނާއި، ދިވެހިބަހާއި، ސަޤާފަތަށް ޚާއްސަ އަހައްމިއްޔަތުކަމެއް ދީ، ޤައުމީ ލޯބި އާލާކޮށް، މުޖްތަމަޢެއްގެ ގޮތުގައި އެކުގައި މަސައްކަތްކުރުމަކީ ކޮންމެ މީހެއްގެ ވެސް އަޒުމަކަށް ހަދަންޖެހޭނެ ކަމެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0