ފުރަތަމަ ފަހަރަށް ބޮޑު ޓާމިނަލަށް: މިއީ އަޖައިބެއް!

Read Time:4 Minute, 13 Second

ވެލާނާ އިންޓަނޭޝަނަލް އެއާޕޯޓުގެ (ވީއައިއޭ) އާ ޓާމިނަލް ހިތްގައިމުކަމާއި އުސްކަމުން ހައިރާންކުރުވާ ކަމަށް އެތަނަށް ޒިޔާރަތްކުރި ނޫސްވެރިން ބުނެއެވެ. މި ޓާމިނަލް ގާތްގަނޑަކަށް 9 އަހަރުގެ މަސައްކަތުން ނިންމާލެވޭން ކައިރިވެފައިވާއިރު، އަހަރަކު 7.5 މިލިއަން ފަސެންޖަރުންނަށް ހިދުމަތް ދިނުމަށް ތައްޔާރުވެފައިވެއެވެ. މި މަޝްރޫއަކީ ރާއްޖޭގެ އިގްތިސާދަށާއި ރައްޔިތުންގެ ކުރިއެރުމަށް އިންގިލާބީ ބަދަލެއް ގެނުވާނެ ވަރަށް މުހިންމު މަޝްރޫއެކެވެ. ޓާމިނަލްގެ ފަސާޑް (ބޭރު ފެންނަ ގޮތް) އަދި އެތެރޭގެ ޑިޒައިންގައި ބޭނުންކޮށްފައިވަނީ މާލޭ ހުކުރު މިސްކިތުގެ މުންނާރުގައި ހުންނަ ސިއްކައިގެ ނަމޫނާއެވެ.

(ފޮޓޯ ކްރެޑިޓްސް: ވަގުތު)

އާ ޓާމިނަލްގައި 47 ޗެކިން ކައުންޓަރާއި، އޭވިއޭޝަން ސެކިއުރިޓީ ކޮމާންޑާއި އިމިގްރޭޝަން ކައުންޓަރުތައް ގާއިމުކޮށްފައިވެއެވެ. ފަސެންޖަރުންނަށް ފަސޭހަކޮށްދިނުމަށް ޑިއުޓީ ފްރީ ފިހާރަތަކާއި ކެއިންބުއިމުގެ އައުޓްލެޓްތައް ހުންނާނެއެވެ. ބޯޑިން ގޭޓު ސަރަހައްދުގައި 12 އެއިރޯ ބްރިޖާއި 12 ބޯޑިން ގޭޓު (އެރައިވަލް 6، ޑިޕާޗާ 6) ހިމެނެއެވެ. ޓާމިނަލްގެ ތެރޭގައި މަގު ދައްކާ ފާހަގަތަކާއި ޓީވީ ސްކްރީންތައް ގާއިމުކޮށްފައިވާއިރު، މުވައްޒަފުން އެހީތެރިވުމަށް ތިބޭނެއެވެ. އައުމުގެ ސަރަހައްދުގައި މާލޭގެ މަލަމަތި ފެންނަން ހުންނާނެއެވެ. ލަގޭޖް ބެލްޓް ސަރަހައްދު މިހާރުގެ ޓާމިނަލަށް ވުރެ ތަނަވަސްކޮށް 6 ބެލްޓާއެކު ގާއިމުކޮށްފައިވެއެވެ. ކަސްޓަމްސް ޕޯސްޓާއި ރިޒޯޓް ރެޕްރެޒެންޓޭޓިވުންނަށް ޚާއްސަ ޖާގައެއްވެސް ހުއްޓެވެ.

ޓާމިނަލްގެ އޮޕަރޭޝަން ތައްޔާރުކުރުމުގެ (ORAT) ޓްރައިލްތައް ފުޅާ ދާއިރާއެއްގައި ކުރިއަށްދާކަމަށް ފާތުމަތު ޝާހިދާ ވިދާޅުވިއެވެ. މި ޓްރައިލްތަކުގެ މަގްސަދަކީ މުވައްޒަފުން ތަމްރީނުކޮށް، ފަސެންޖަރުންނަށް އެއްވެސް ދަތިކަމެއްނެތި ހިދުމަތްދެވޭނެކަން ކަށަވަރުކުރުމެވެ. މި ޓާމިނަލް މިމަހު 26 ވަނަ ދުވަހު ހުޅުވޭނެކަމަށް ބެލެވެއެވެ. މިއީ ރާއްޖޭގެ މިނިވަންކަމަށް 60 އަހަރު ފުރުމާ ދިމާކޮށް ހުޅުވޭ ތަނެކެވެ. ޓާމިނަލް މަސައްކަތް ކުރިއަށް ގެންދަނީ ދުވާލު 24 ގަޑިއިރު ދެ ޝިފްޓަށް ބަހާލައިގެންނެވެ. މިއީ ރާއްޖޭގެ ތާރީހު ބަދަލުކޮށްލާނެ އަދި ދިވެހިން ފަހުރުވެރިވާނެ ތަނެކެވެ.