އައު ބްރޭންޑުގެ ސަބަބުން ރާއްޖޭގެ މަހުގެ އުފެއްދުންތައް މާކެޓުކުރުމަށް ހުރި ދަތިތަކަށް ޙައްލެއް ލިބޭނެ: ވަޒީރު

Read Time:6 Minute, 20 Second

(ފޮޓޯ ކްރެޑިޓްސް: މަސްވެރިކަމާއިބެހޭ ވުޒާރާ)

މަސްވެރިކަމުގެ އުފެއްދުންތަކަށް ޚާއްސަ ގައުމީ އައު ބްރޭންޑުކަމަށްވާ “ފްރޮމް މޯލްޑިވްސް”ގެ ސަބަބުން ދުނިޔޭގެ ބާޒާރަށް ރާއްޖޭގެ އުފެއްދުންތައް ނެރުމަށް ދިމާވާ ދަތިތަކަށް ހައްލުތަކެއް ލިބިގެންދާނެކަމަށް މަސްވެރިކަމާ ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ. މަސްވެރިކަމުގެ އުފެއްދުންތަކަށް ޚާއްޞަ ޤައުމީ ބްރޭންޑުކަމަށްވާ “ފުރޮމް މޯލްޑިވްސް” އިފްތިތާޙްކޮށްފައިވަނީ އިނގިރޭސިވިލާތުގައި ބޭއްވި ބިޒްނަސް ފޯރަމްގައެވެ. މި ބްރޭންޑް އިފްތިތާޙްކޮށްދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

މި ބްރޭންޑާ ގުޅޭގޮތުން ބިޒްނަސް ފޯރަމްގައި ވާހަކަފުޅު ދައްކަވަމުން މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް ވަނީ ދިވެހިރާއްޖޭގެ މަސްވެރިކަމަށް ބައިނަލްއަގުވާމީ ބާޒާރުގައި ކުރިމަތިވެފައިވާ ގޮންޖެހުންތަކާ ގުޅޭ ގޮތުން އަލިއަޅުވައިލެއްވިއެވެ. ވަޒީރު ވިދާޅުވީ ދުނިޔޭގެ ބޮޑެތި ބައެއް މާކެޓްތަކުގައި ރާއްޖެއިން އަދިވެސް ބޮޑު ޓެރިފެއް ދައްކަންޖެހުމަކީ މަސްވެރިކަމުގައި އޮތް އެންމެ ބޮޑު އެއް ގޮންޖެހުން ކަމަށެވެ. ވަޒީރުގެ ވާހަކަފުޅުގައި މަސްވެރިކަމުގެ ދެމެހެއްޓެނިވި ކަންކަމަށް މަސައްކަތްތަކެއް ނުކުރާ ބޮޑެތި ސިނާއީ ފްލީޓްތަކަށް ޑިއުޓީ ފްރީ އެކްސެސް ލިބޭއިރު، ދުނިޔޭގެ އުތުރުގައި މުހިންމު މާކެޓްތަކުގައި ރާއްޖެއަށް ބޮޑު ޓެރިފްތަކެއް ދައްކަންޖެހޭކަމަށެވެ. އެހެންކަމުން ރާއްޖޭގެ ހާއްސަ ބްރޭންޑެއް މުހިންމުވާކަމަށް ވަޒީރު ވިދާޅުވިއެވެ.

އުންމީދަކީ، ދިވެހި މަސްވެރިން އުފުލަމުންދާ ބުރައަށް އައު ބްރޭންޑުގެ ސަބަބަުން ކޮންމެވެސް ވަރެއްގެ ލުޔެއް ލިބުންކަން ފާހަގަކުރައްވަމުން ވަޒީރު ވިދާޅުވީ، އުންމަީދަކީ ދިވެހިންގެ އުފެއްދުންތަކުގެ ހަގީގީ އަގު ދުނިޔޭގެ ބާޒާރުގައި ބަލައިގަނެ ބައިނަލްއަގުވާމީގޮތުން ބަލައިގެންފައިވާ އުފެއްދުމަކަށް ރާއްޖޭގެ މަސްވެރިންގެ އުފެއްދުންތައް ވެގެންދިއުންކަމަށެވެ.

At the Business Forum, Minister @Shiyamaldives joined the Q&A session and spoke about the market challenges facing Maldivian fisheries.

He highlighted how the Maldives continues to face high tariffs in key markets, especially in the global North, even as large industrial fleets… pic.twitter.com/QqrphdLnyV

— Ministry of Fisheries and Ocean Resources (@MFORmv) July 17, 2025

“ފްރޮމް މޯލްޑިވްސް” ގެ މަޤްޞަދަކީ ދުނިޔޭގެ ބާޒާރާއި ރާއްޖޭގެ ކަނޑުގެ ވަސީލަތްތަކާ ގުޅުވާލުމެވެ. އަދި ބައިނަލްއަގުވާމީ ވިޔަފާރީގެ ފައިދާ މުޖުތަމައަށް ކުރާނެކަން ކަށަވަރު ކުރުމެވެ. އައު ބްރޭންޑްގެ އަމާޒަކީ ވިޔަފާރީގެ ފައިދާއާއި ރާއްޖޭގެ ކަނޑުގެ މުއްސަނދިކަން ކުރިއަށް އޮތް އަހަރުތަކަށް ގެންގޮސްދިނުމެވެ.

މި ބްރޭންޑް ތަޢާރަފުކުރުމަކީ ކަނޑުގެ ވަޞީލަތްތަކުން ދިވެހިންނަށް ލިބޭ ނަފާ އިތުރުކުރުމަށް ސަރުކާރުން ކުރަމުންގެންދާ މަސައްކަތްތަކުގެ ތެރެއިން މުހިންމު މަސައްކަތެކެވެ. މިއީ އަގުއެއްކުރި މަހާއި މަހުގެ އުފެއްދުންތައް ރާއްޖޭގައި ތައްޔާރުކޮށް، ބަންދުކުރުމުގެ ކެޕޭސިޓީ އިތުރުކުރުމަށާއި، ޕްރޮސެސްކުރުމުގެ އިތުރުން، މަސް ފިނިކޮށް، ރައްކާކުރުމުގެ ނިޒާމު އިތުރަށް ފުޅާކުރުމަށް ސަރުކާރުން ކުރަމުންގެންދާ މަސައްކަތްތަކަށްވެސް ލިބިގެންދާ ކުރިއެރުމެކެވެ. ރާއްޖޭގައި މަހުގެ އުފެއްދުންތައް ތައްޔާރުކުރާ މީހުންނަށް ބައިނަލްއަގްވާމީ ބާޒާރުގައި ވާދަވެރިކަމާއެކު ބައިވެރިވުމުގެ މަގު އިތުރަށް ހުޅުވިގެންދާނެއެވެ. “ފްރޮމް މޯލްޑިވްސް” މި ބްރޭންޑަކީ މޯލްޑިވްސް ފިޝަރީސް އެންޑް އޯޝަން ރިސޯސަސް މާކެޓިންގ އެންޑް ޕްރޮމޯޝަން ކޯޕަރޭޝަން ގެ އުފެއްދުމެކެވެ.