ސޫރިޔާގެ ދުރޫޒީންނަށް ރައްކާތެރިކަން ކަށަވަރުކޮށްދޭން ޝަރާ ވަޢުދުވެއްޖެ

Read Time:5 Minute, 39 Second

(ފޮޓޯ ކްރެޑިޓްސް: ރޮއިޓާރސް)

ޔަހޫދީން މަސައްކަތްކުރަމުން ދަނީ ސޫރިޔާގައި ބައިބައިވުން އުފެއްދުމަށް ކަމަށް ތުހުމަތުކޮށް، ސޫރިޔާގެ މީސްމަދު ދުރޫޒީން ހިމާޔަތްކޮށް އެ މީހުންނަށް ރައްކާތެރިކަން ދޭނެ ކަމަށް އެ ޤައުމުގެ އިންތިޤާލީ ރައީސް އަޙްމަދު އަލްޝަރާޢު ވައުދުވެއްޖެއެވެ. މިދިޔަ ހަފްތާގެ ތެރޭގައި ސޫރިޔާގެ އައްސުވައިދާގައި، އެ އަވަށުގައި ދިރިއުޅޭ މީސްމަދު ދުރޫޒީންނާއި ބަދަވީންނާ ދެމެދު ވަނީ ބޮޑެތި ހަމަނުޖެހުންތަކާއި ލޭއޮހޮރުވުންތައް ހިންގަން ފަށައިފައެވެ. އެއާއެކު ސޫރިޔާގައި ވެރިކަން ކުރާ ހަޔިއަތު ތަޙްރީރް އަލް-ޝާމް (އެޗްޓީއެސު)ން ވަނީ ސުވައިދާއަށް ސިފައިންނާއި ބަރުހަތިޔާރު ފޮނުވައިފައެވެ. އެއީ އެ ހަމަނުޖެހުންތައް ކޮންޓުރޯލު ކުރުމަށެވެ.އެއާއެކު ޔަހޫދީން ވަނީ ދުރޫޒީންގެ ހިމާޔަތުގައި ކަމަށް ބުނެ އެ ސަރަައްދަށް ވައިގެ ޙަމަލާތައް ދީފައެވެ. އޭގެ ފަހުން ހަމަނުޖެހުންތައް ކޮންޓްރޯލްކޮށްފައި ވަނީ އެމެރިކާގެ އެހީތެރިކަމާއެކު ޤާއިމުކުރި އެއްބަސްވުމެއްގެ ދަށުންނެވެ. އެއާއެކު ސަރުކާރުގެ ސިފައިން ވަނީ ސުވައިދާއިން ފައިބާފައެވެ.

ހަމަނުޖެހުންތައް ހުއްޓާލުމަށް އެއްބަސްވުމެއް ޤާއިމުކުރި ނަމަވެސް ބަދަވީން ވަނީ އަނެއްކާ ވެސް ދުރޫޒީންނަށް އަމާޒުކޮށް ޙަމަލާތައް ދޭން ފަށާފައެވެ. އެ މީހުން ބުނީ ހަމަނުޖެހުން ހުއްޓާލުމަށްވީ އެއްބަސްވުން އެ މީހުންނަށް ނިޞްބަތް ނުވާ ކަމަށެވެ. އަދި އެ އެއްބަސްވުން ނިޞްބަތް ވަނީ ހަމައެކަނި ސަރުކާރުގެ ސިފައިންނަށް ކަަމަށެވެ. އެއާއެކު އެ ސުވައިދާ ސަރަޙައްދުގައި އަނެއްކާ ވެސް ހަމަނުޖެހުންތައް ފެށުން އެކަށީގެންވެއެވެ. ބަދަވީން މަސައްކަތްކުރަމުން ދަނީ ދުރޫޒީންގެ ބެލުމުގެ ދަށުގައި ހުރި އެ މީހުުންގެ މީހަކު މިނިވަންކުރުމަށް ކަމަށް ބަދަވީންގެ އަސްކަރީ ކޮމާންޑަރަކު ވަނީ ބުނެފައެވެ.

ސޫރިޔާގެ ވަންހަތަކުގެ މެދުގައި ބަދަލުކުރަމުންދާ ޙަމަލާތަކުން ޤައުމުގައި ހަމަޖެހުން ޤާއިމުކުރުމުގައި ޝަރާޢުއަށް ކުރިމަތިވެފައިވާ ގޮންޖެހުންތައް ދައްކުވައިދެއެވެ. ސޫރިޔާގެ ރައްޔިތުންނާ މުޚާތަބުކޮށް ޖޫން މަހުގެ 17ވަނަ ދުވަހު ޝަރާޢު ބުނީ މި ޙާލަތުގައި ޔަހޫދީން މަސައްކަތް ކުރަމުންދަނީ ސޫރިޔާގައި ބައިބައިވުން އިތުރުކުރުމަށް ކަމަށެވެ. ޔަހޫދީންނަކީ އަބަދު ވެސް ސޫރިޔާގެ ހަމަޖެހުން ނަގައިލުމުގެ މަޤްޞަދުގައި އެ ޤައުމަށް ޙަމަލާދޭ ބައެއް ކަމަށް ވެސް ޝަރާޢު ވަނީ ފާހަގަކޮށްފައެވެ. މިދިޔަ އަހަރުގެ ޑިސެމްބަރު މަހުގެ ތެރޭގައި ސޫރިޔާގެ ކުރީގެ ރައީސް ބައްޝާރު އަލް-އަސަރުގެ ވެރިކަން ކުއްލި ގޮތަކަށް ނިމުމަކަށް އައުމުގެ ފަހުން، ޤައުމުގެ ރައްޔިތުންގެ މެދުގައި ބައިބައިވުން އުފެއްދުމަށް ޔަހޫދީން ވަކިން ޚާއްޞަކޮށް މަސައްކަތް ކުރަމުންދާ ކަމަށް އޭނާ ވަނީ ބުނެފައެވެ.

ޝަރާޢު އިތުރަށް ބުނީ ދުރޫޒީންނާއި އެ މީހުންގެ ހަައްޤުތައް ޙިމާޔަތްކުރުމަކީ ސަރުކާރުގެ ޒިންމާއެއް ކަމަށެވެ. އެހެންކަމުން ބޭރުގެ ނުފޫޒުގައި ދުރޫޒީން ޖެހުނަ ނުދޭނެ ކަމަށް ވެސް އޭނާ ބުންޏެވެ. ދުރޫޒީންނާ ދެކޮޅަށް ޙަމަލާދެމުންދާ މީހުން އިންސާފުގެ ކުރިމައްޗަށް ގެންނާނެ ކަމަށް ވެސް އޭނާ ވަނީ ބުނެފައެވެ.