އަހަރުމެންނާ ޖެހުނުއިރު ޑޮލަރުތައް ހުރީ ކައި ހުސްކޮށްފައި: ޝުޖާއު

Read Time:4 Minute, 24 Second

(ފޮޓޯ ކްރެޑިޓްސް: ވަގުތު)

މި ސަރުކާރުން ވެރިކަމަށް އައިރު ގައުމުގައި ޑޮލަރު ނެތް ކަމަށާއި “ޑޮލަރު ކައި ހުސްކޮށްފައިވާ” ކަމަށް ރައްޔިތުންގެ މަޖިލިހުގެ ބާރަށު ދާއިރާގެ ޕީއެންސީގެ މެމްބަރު އިބްރާހިމް ޝުޖާއު ވިދާޅުވެއްޖެއެވެ. ޕީއެންސީން ބޭއްވި ހަރުގެ ޖަލްސާގައި މިރޭ ވާހަކަ ދައްކަވަމުން ޝުޖާއު ވިދާޅުވީ ޑޮލަރު ހުސްކޮށްފައި އޮތުމުން، ވެރިކަމަށް އައިސް އެންމެ ފުރަތަމަ ކުރަންޖެހުނު ކަމަކީ “ސޮވެރިން ޑިވަލޮޕްމަންޓް ފަންޑް ތަޅު އެޅުވުން” ކަމަށެވެ. އެގޮތުން ސޮވެރިން ޑިވަލޮޕްމަންޓާ ބެހޭ ގާނޫނެއް ވުޖޫދުކޮށް، ވެރިކަމަށް ވަޑައިގަންނަވާ ބޭފުޅަކަށް އޭގައި އަތް ނުލެވޭގޮތް ހެއްދެވި ކަމަށް ވިދާޅުވިއެވެ.

“ސޮވެރިން ޑިވަލޮޕްމަންޓް ފަންޑަށް އަތް ނުބޭނޭ ގޮތް، ރައީސް މުއިއްޒަށް ހައްދަވަން ޖެހުނީ ލޮބުވެތި ދިވެހި ރައްޔިތުންގެ ހައްގުގައި. އޭގެ ލޯނު ނަގާފައި ކުރީ ސަރުކާރުން ހުރީ، އެކަމަކު ހަމަ އެބޭފުޅުން މިހާރު ވިދާޅުވަނީ ޑޮލަރުގެ މައްސަލަ ހައްލުނުވާ ކަމަށް” ޝުޖާއު ވިދާޅުވިއެވެ. ޝުޖާއު ވިދާޅުވީ މި ސަރުކާރުން ވެރިކަމަށް އައިއިރު ގައުމުގެ ހާލަތު އޮތްގޮތް އެމްޑީޕީން ހަނދާން ނެތޭ ކަމަށެވެ. އަދި ގައުމު އެހާލަތަށް ވައްޓާލީވެސް އެޕާޓީން ކަމަށް ވިދާޅުވިއެވެ. މި ސަރުކާރުން ވެރިކަމާ ހަވާލުވުމަށްފަހު އިގްތިސާދު ހަމަމަގަށް އެޅުވުމަށް ގިނަ މަސައްކަތްތަކެއް ކުރެއްވި ކަމަށް އޭނާ ވިދާޅުވިއެވެ. އަދި ގައުމުގައި ހުރި ބޮޑެތި މައްސަލަތައް ހައްލުކުރެއްވުމުގެ މަސައްކަތް ފެށިކަން ފާހަގަކުރައްވާ ޝުޖާއު ވަނީ ދުންފަތުގެ ގާނޫނު ތަންފީޒު ކުރިކަމަށް ވިދާޅުވިއެވެ.

ޖަލްސާގައި ޝުޖާއު ވިދާޅުވީ ޕީއެންސީން އަތޮޅުތެރޭގެ ރަށްތަކަށް ދަތުރުކުރައްވާ ޕާޓީގެ ހަރަކާތް ވަރުގަދަ ކުރުމުގެ މަސައްކަތް ކުރަމުންދާ ކަމަށެވެ. އަދި ކުރިއަށްް އޮތް ލޯކަލް ކައުންސިލް އިންތިޚާބުގައި މާލެ ދާއިރާގެ ގޮނޑިތައް ކާމިޔާބު ކުރާނީ އެ ޕާޓީން ކަމަށް ވިދާޅުވިއެވެ. ޝުޖާއު ވަނީ ކުރީގެ ރައީސް ޔާމީން އަބްދުލްގައްޔޫމަށް ފާޑުވިދާޅުވެ ޖަލްސާގައި ވާހަކަ ދައްކަވާފައެވެ. އެގޮތުން ޕީއެންސީ މެމްބަރުންނަކީ ވަގުން ކަމަށް އެންމެ ގިނައިން ވިދާޅުވާ އެއް ބޭފުޅަކީ އެމަނިކުފާނު ކަމަށް ތުހުމަތު ކުރެއްވިއެވެ. ޕީއެންސީން ވައްކަން ނުކުރާނެ ކަމަށާއި އެއީ ޕާޓީގެ ސިޔާސަތު ނޫން ކަމަށް ވެސް ޝުޖާއު ވިދާޅުވިއެވެ. ޝުޖާއު ވިދާޅުވީ މި ސަރުކާރުން ބޭނުންވަނީ ޕާޓީ ވެރިކަމެއް ހިންގުމަށް ކަމަށެވެ.