އެކްސިޑެންޓްތަކުގައި އިހުމާލުވާ ފަރާތްތަކަށް ފިޔަވަޅު ނޭޅޭތީ އިދާރާތައް މަޖިލީހަށް ހާޒިރުކުރަން ހުށަހަޅައިފި

Read Time:3 Minute, 18 Second

(ފޮޓޯ ކްރެޑިޓްސް: ވަގުތު)

އެކްސިޑެންޓްތަކާ ގުޅިގެން އެކަށީގެންވާ ފިޔަވަޅުތައް ނޭޅޭ މައްސަލައިގައި ޖަވާބުދާރީކުރުވުމަށް، ޕްރޮސެކިއުޓާ ޖެނެރަލް އާއި، ފުލުހުންގެ ހިދުމަތުގެ އިސްވެރިން އަދި މާލެ ސިޓީ ކައުންސިލްގެ އިސްވެރިން، ރައްޔިތުންގެ މަޖިލީހަށް ހާޒިރުކުރުމަށް ހުށަހަޅައިފިއެވެ. މާލޭ ބޮޑުތަކުރުފާނު މަގުގައި ނުރައްކާތެރި އެކްސިޑެންޓެއް ހިނގާ، އުމުރުން 17 އަހަރުގެ ކުއްޖަކު ނިޔާވެފައިވަނީ މި މައްސަލައިގައި އިދާރާތަކާ ސުވާލުކުރުމަށް ހުށަހަޅާފައިވަނިކޮށެވެ. އިދާރާތަކާ ސުވާލުކުރުމަށް އެދި، ގަލޮޅު އުތުރު ދާއިރާގެ އެމްޑީޕީ މެންބަރު، މުހައްމަދު އިބްރާހީމް، މަޖިލީހުގެ އިދާރާއަށް ސިޓީ ފޮނުއްވާފައިވަނީ މިދިޔަ ހޮނިހިރު ދުވަހުއެވެ.

މަޖިލީހަށް އޭނާ ހުށަހެޅުއްވި ސިޓީގައި ބަޔާންކުރައްވާފައިވަނީ ފާއިތުވި ހަ މަސް ދުވަހު އެކަނިވެސް މާލެ ސަރަހައްދުގައި އެއް ހާހަށްވުރެ އެކްސިޑެންޓްވެގެން ރިޕޯޓް ކޮށްފައިވާކަމަށެވެ. އެހެންނަމަވެސް، މި އެކްސިޑެންޓްތަކުގައި އިހުމާލުވާ ފަރާތްތަކާ ދެކޮޅަށް އެކަށީގެންވާ ގާނޫނީ ފިޔަވަޅެއް ނޭޅޭކަމުގައެވެ. ހަމައެހެންމެ، އެކްސިޑެންޓްތަކުގައި ދުނިޔެ ދޫކުރާ ފަރާތްތަކާއި ނުކުޅެދުންތެރި ހާލަތަށް ދާ ފަރާތްތަކުގެ އަދަދު އިތުރުވަމުންދާކަމަށްވެސް ބަޔާންކުރައްވާފައިވެއެވެ. މިކަމާ ގުޅިގެން މެންބަރުގެ ސިޓީގައި ބަޔާންކުރައްވާފައިވަނީ މި އެކްސިޑެންޓްތަކުގައި އިހުމާލުވާ ފަރާތްތަކަށް ފިޔަވަޅު އެޅުމަށް އޮތް ގޮންޖެހުންތަަކަކީ ކޮބައިކަން، ފުލުހުންގެ ހިދުމަތާއި، ޕްރޮސެކިއުޓާ ޖެނެރަލްގެ ފަރާތުން ސާފުކުރަން ބޭނުންވާކަމުގައެވެ.

އާދީއްތަ ދުވަހުގެ ރޭ ހިނގި ނުރައްކާތެރި އެކްސިޑެންޓުގެ އިތުރުން، ރޭ ހަލި މަގުގައިވެސް އެކްސިޑެންޓެއް ހިނގާ ބަޔަކަށް އަނިޔާވެފައިވެއެވެ.