މަސައްކަތެއްގައި އުޅުއްވާތީ ވަޒީރު ހަލީލް މިއަދު މަޖިލީހަށް ހާޒިރުވަޑައިނުގަތް

Read Time:3 Minute, 24 Second

އެހެން މަސައްކަތެއް ކުރަން ޖެހިވަޑައިގަތުމުން މިއަދު ހާރިޖީ ވަޒީރު ޑރ. އަބްދުﷲ ހަލީލް މަޖިލީހަށް ހާޒިރުވަޑައިގެން ސުވާލުތަކަށް ޖަވާބުދެއްވުމަށް އުޒުރުވެރިވެވަޑައިގެންފިއެވެ. މިއަދުގެ މަޖިލީހުގެ އެޖެންޑާގައި ވަޒީރު ހަލީލް ހާޒިރުވެވަޑައިގަތުމަށް ތާވަލްކޮށްފައި އޮތެވެ. ހަލީލަށް ސުވާލުކުރެއްވުމަށް މަޖިލީހަށް ހާޒިރުކުރެއްވުމަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމެވެ. އެއީ ސައުދީގެ ޝާހީ އާއިލާގެ ބޭފުޅެއް ކަމަށް ބުނެ ދާދި ފަހުން ރާއްޖޭގައި ރައީސް ޑރ. މުހައްމަދު މުއިއްޒުއާ ބައްދަލުކުރި، ޕްރިންސް ފަހަދް ސައުދު އަލްޝަލަންގެ މައްސަލައިގައި ހަލީލާ ސުވާލު ކުރެއްވުމަށެވެ.

މި މައްސަލައިގައި ވަޒީރަށް ތިން ސުވާލެއް މީކާއީލް ވަނީ ކުރައްވާފައެވެ. އެއީ ފަހުދަކީ ޝާހީ އާއިލާގެ ބޭފުޅެއްތޯ؟ އާއި އެ ބައްދަލުވުމުގައި ސައުދީ އެމްބަސީން ބައިވެރިވެފައި ނުވަނީ ކީއްވެތޯ؟ އާއި ފަހުދަކީ ޝާހީ އާއިލާއަށް ނިސްބަތްވާ ބޭފުޅެއްގެ ގޮތުގައި ބަޔާންކޮށްފައިވަނީ ހަގީގަތާ ހިލާފަށްނަމަ ސައުދީ އާއި ރާއްޖެއާ ދެމެދު އޮތް ހާރިޖީ ގުޅުމަށް ނޭދެވޭ އަސަރެއް ކޮށްފާނެތޯ؟ އެވެ. މިއަދުގެ ޖަލްސާ ފައްޓަވައިދެއްވަމުން ރިޔާސަތުގައި އިންނެވި މަޖިލީހުގެ ނައިބު ރައީސް އަހުމަދު ނާޒިމް ވިދާޅުވީ ވަޒީރު ހަލީލް ކޮންމެހެންވެސް ހާޒިރުވެވަޑައިގަންނަވާން ޖެހިވަޑައިގަންނަވާ ރަސްމީ އެހެން މަސައްކަތެއް ކުރައްވާން ޖެހިވަޑައިގަންނަވާ ވަގުތާއި މިއަދުގެ ޖަލްސާއަށް ހާޒިރުވެވަޑައިގަންނަވާން ޖެހިވަޑައިގަންނަވާ ގަޑި ދިމާވާތީ، މަޖިލީހަށް ހާޒިރުވެވަޑައިގަނެވެން ނެތްކަން އަންގަވައިފައިވާ ކަމަށެވެ.

ވަޒީރު މަޖިލީހަށް ހާޒިރު ކުރުމުގެ ކަންކަން ވީ އެންމެ އަވަސް ޖަލްސާއަކަށް ތާވަލުކުރައްވާން މަސައްކަތް ކުރައްވާނެ ކަމަށް ނާޒިމް ވިދާޅުވިއެވެ.